Ihinda inini thutha wa Jesu kũbatithio, aambĩrĩirie kũhunjia atĩ ‘Ũthamaki wa Ngai nĩ ũkuhĩrĩirie.’ Arutwo ake nĩ maamũrũmagĩrĩra akĩhunjia Galili na Judea. Rĩrĩa Jesu aacokire kwao Nazarethi, aathiire thunagogi-inĩ, akĩhingũra gĩkũnjo kĩa Isaia, na agĩthoma ũũ anĩrĩire: ‘Jehova nĩ aahete roho mũtheru nĩguo hunjie ũhoro ũrĩa mwega.’ Ciugo icio cieendaga kuonania atĩa? Cieendaga kuonania atĩ o na gũtuĩka andũ nĩ meendaga kuona Jesu akĩringa ciama, gĩtũmi kĩrĩa kĩnene gĩatũmĩte aheo roho mũtheru kĩarĩ kũhunjia ũhoro ũrĩa mwega. Aacokire akĩra athikĩrĩria ake ũũ: ‘Ũrathi ũcio nĩ wahinga ũmũthĩ.’

Thutha ũcio, Jesu nĩ aathiire Iria-inĩ rĩa Galili harĩa aacemanirie na ategi ana a thamaki arĩa maacokire gũtuĩka arutwo ake. Aameerire ũũ: ‘Nũmĩrĩrai na nĩ ngũmũtua ategi a andũ.’ Maarĩ Petero, Andrea, Jakubu, na Johana. Maatigire biacara yao ya gũtega thamaki o hĩndĩ ĩyo na makĩmũrũmĩrĩra. Maathiire Galili guothe makĩhunjagia ũhoro wĩgiĩ Ũthamaki wa Jehova. Maahunjagia thunagogi-inĩ, thoko-inĩ, na barabara-inĩ. Kĩrĩndĩ kĩnene nĩ kĩamarũmagĩrĩra kũrĩa guothe maathiaga. Ũhoro wĩgiĩ Jesu nĩ watheremire kũndũ guothe, nginya Siria.

Thutha wa ihinda, Jesu nĩ aaheire arũmĩrĩri amwe ake hinya wa kũhonania na wa kũingata ndaimono. Angĩ nao nĩ maathiaga hamwe nake akĩhunjia taũni-inĩ na icagi-inĩ. Atumia ehokeku ta Mariamu Mũmagidali, Joana, Susana, na angĩ, nĩ maarũmbũyagia Jesu na arũmĩrĩri ake.

Jesu arĩkia kũmenyeria arutwo ake, nĩ aamatũmire mathiĩ makahunjie. O ũrĩa maathiire mahunjĩtie Galili, noguo andũ angĩ aingĩ maatuĩkire arutwo na makĩbatithio. Kwarĩ na andũ aingĩ mũno meendaga gũtuĩka arutwo, nginya Jesu akĩmaringithania na mũgũnda wakinyĩtie ihinda rĩa kũgethwo. Aaugire ũũ: ‘Hoyai Jehova atũme aruti angĩ a wĩra nĩguo magethe.’ Agĩcoka agĩthuura arutwo 70 na akĩmatũma erĩ erĩ nĩguo makahunjie Judea guothe. Maarutire andũ a mĩthemba yothe ũhoro wa Ũthamaki. Rĩrĩa arutwo acio maacokire, nĩ meeriragĩria kwĩra Jesu maũndũ marĩa meeyoneire. Gũtirĩ ũndũ o na ũmwe Mũcukani angĩekire nĩguo arũgamie wĩra wa kũhunjia.

Jesu nĩ aatigĩrĩire atĩ arutwo ake nĩ mangĩathiire na mbere kũruta wĩra ũcio wa bata o na acoka igũrũ. Aameerire ũũ: ‘Hunjiai ũhoro ũrĩa mwega thĩinĩ wa thĩ yothe. Rutagai andũ Kiugo kĩa Ngai, na mũmabatithagie.’

Jesu ookĩte gũkũ thĩ nĩguo ahunjie ũhoro ũrĩa mwega wa Ũthamaki wa Ngai. Nĩguo Jehova onanie ũrĩa Jesu ageeka arĩ Mũthamaki, nĩ aamũheire roho wake mũtheru nĩguo ahote kũringa ciama nyingĩ. Gũtirĩ mũrimũ atangĩahotire kũhonia. Andũ arĩa maarĩ arwaru nĩ maathiaga gũcaria ũteithio kũrĩ we kũrĩa guothe aathiaga, na nĩ aamahonagia. Atumumu nĩ maahotaga kuona, arĩa mataaiguaga makahota kũigua, cionje ikahota gwĩtwara, na arĩa maarĩ na ndaimono, cikarutwo thĩinĩ wao. O na mangĩahutirie gĩcũrĩ kĩa nguo ya Jesu, nĩ maahonaga. Andũ nĩ maamũrũmagĩrĩra kũrĩa guothe aathiaga. O na rĩrĩa eendaga gũkorũo handũ arĩ wiki, andũ moka kũrĩ we ndaamaingataga.

Harĩ hĩndĩ ĩmwe andũ maatwarire mũndũ warĩ kĩonje thĩinĩ wa nyũmba ĩmwe Jesu aaikaraga. No nyũmba ĩyo yarĩ na andũ aingĩ mũno ũndũ matangĩahotire kũingĩra. Nĩ ũndũ ũcio, maatũrire irima nyũmba igũrũ na magĩikũrũkia mũndũ ũcio harĩ Jesu. Jesu akĩra mũndũ ũcio ũũ: ‘Ũkĩra wĩtware.’ Andũ nĩ maagegire mũno rĩrĩa mũndũ ũcio eetwarire.

Nĩ kũrĩ hĩndĩ ĩngĩ Jesu aaingĩraga itũũra-inĩ rĩmwe, na andũ ikũmi maarĩ na mangũ nĩ maarũgamire handũ haraihu makĩanĩrĩra ũũ: ‘Jesu, tũteithie!’ Matukũ-inĩ macio, mũndũ angĩakorirũo na mangũ ndeetĩkagĩrio gũkuhĩrĩria andũ arĩa angĩ. No Jesu eerire andũ acio mathiĩ hekarũ-inĩ, o ta ũrĩa Watho wa Jehova waugĩte maagĩrĩirũo nĩ gwĩka thutha wa kũhona. Marĩ njĩra-inĩ magĩthiĩ hekarũ-inĩ, makĩhona. Rĩrĩa ũmwe wao oonire atĩ nĩ ahona, nĩ aacokire na thutha gũcokeria Jesu ngatho na kũgooca Ngai. Harĩ andũ acio ikũmi, no ũcio ũmwe tu wacokire gũcokeria Jesu ngatho.

Mũtumia ũmwe warwarĩte kwa ihinda rĩa mĩaka 12, ndoonaga ta angĩahonire. Nĩ aathiire thutha wa Jesu arĩ gatagatĩ-inĩ ga kĩrĩndĩ, na akĩhutia gĩcũrĩ kĩa nguo yake ya igũrũ. Aahonire o hĩndĩ ĩyo. Rĩrĩa ũndũ ũcio wekĩkire, Jesu ooririe ũũ: “Nũũ wahutia?” Mũtumia ũcio nĩ aamakire mũno, no nĩ aathiire harĩ Jesu na akĩmwĩra ũrĩa eekĩte. Jesu nĩ aamũmĩrĩirie na njĩra ya kũmwĩra ũũ: ‘Mwarĩ wakwa, thiĩ na thayũ.’

Mũthigari ũmwe wetagwo Jairo nĩ aathaithire Jesu akĩmwĩra: ‘Nĩ tũthiĩ gwakwa! Kairĩtu gakwa nĩ karwaru mũno.’ No Jesu atanakinya kwa Jairo mũciĩ, kairĩtu kau nĩ gaakuire. Rĩrĩa Jesu aakinyire kwa Jairo, nĩ aakorire andũ aingĩ arĩa maathiĩte gũcakaya hamwe na famĩlĩ ĩyo. Jesu aameerire ũũ: ‘Tigai kũrĩra, nĩ gũkoma gakomete.’ Agĩcoka akĩnyita kairĩtu kau guoko na agĩkeera: ‘Kairĩtu, ũkĩra!’ Gagĩikara thĩ o hĩndĩ ĩyo, na Jesu akĩra aciari ako makahe kĩndũ gĩa kũrĩa. Ũgwĩciria aciari ako maaiguire atĩa?