Mabuku Marĩa Magwetetwo Thĩinĩ wa Kabuku ka Mũcemanio wa Ũtũũro na Ũtungata
© 2025 Watch Tower Bible and Tract Society of Pennsylvania
MACHI 2-8
Kũmaatha Maũndũ ma Bata Maandĩko-inĩ
w01 10/1 20 kĩb. 3
Gũkorũo Mũndũ arĩ Mwĩhokeku nĩ Kuuga Atĩa?
Jehova eerire mũrata wake Iburahimu ũũ: “Niĩ nĩ niĩ ngo yaku.” (Kĩambĩrĩria 15:1; Isaia 41:8) Jehova to kuuga aaugire ciugo icio, no nĩ aacihingirie. Kwa ngerekano, nĩ aagitĩrire Iburahimu na nyũmba yake kuumana na Firauni na Abimeleku. Nĩ aateithirie Iburahimu kũhonokia Loti kuumana na athamaki ana arĩa maanyitanĩire kũmũũkĩrĩra. Ningĩ Jehova nĩ aacokeirie Iburahimu na Sara hinya wa kũgĩa mwana, o na gũtuĩka Iburahimu aarĩ na mĩaka 100, nake Sara arĩ mĩaka 90, nĩguo kũgerera harĩ o, mbeũ ĩrĩa yeranĩirũo yũke. O na Jehova nĩ aaragia na Iburahimu kaingĩ kũgerera cioneki, iroto, na araika. Ma nĩ atĩ, Jehova aarĩ mwĩhokeku harĩ Iburahimu arĩ muoyo na nginya o na thutha wake gũkua. Kwa ihinda rĩa mĩaka mĩingĩ, Jehova nĩ aahingirie ciĩranĩro ciake kũrĩ Aisiraeli, arĩa maarĩ njiarũa cia Iburahimu, o na gũtuĩka nĩ maamũremagĩra. Ũrata wa Jehova na Iburahimu nĩ woonanirie wega atĩ wĩhokeku nĩ wendo ũronanio kũgerera ciĩko.—Kĩambĩrĩria mũrango wa 12 nginya 25.
MACHI 9-15
MŨTHITHŨ KUUMA KIUGO-INĨ KĨA NGAI ISAIA 43-44
Ũrathi Waandĩkirũo Mĩaka 200 Mbere ya Rĩrĩa Wahingire
it “Cyrus” kĩb. 7
Kurusu
Gũtoorio kwa Itũũra rĩa Babuloni. Kurusu nĩ eeharĩirie kũngʼethanĩra na Babuloni, na kuuma hĩndĩ ĩyo akĩnyita itemi harĩ kũhinga kwa ũrathi wa Bibilia. Thĩinĩ wa ũrathi wa Isaia wĩgiĩ ũrĩa Jerusalemu ĩngĩgaakwo rĩngĩ hamwe na hekarũ, Kurusu nĩ aagwetetwo na rĩĩtwa atĩ nĩwe waamũrĩtwo nĩ Jehova Ngai nĩguo anange Babuloni na arekererie Ayahudi arĩa mangĩgatwarũo ithamĩrio kuo. (Isa 44:26–45:7) Ũrathi ũcio waandĩkirũo makĩria ma mĩaka 150 mbere ya Kurusu atuĩkĩte mũthamaki, na andũ a Juda maatwarirũo ithamĩrio mbere ya Kurusu aciarĩtwo. O na kũrĩ ũguo, Jehova aaugire atĩ Kurusu nĩwe ũngĩgatuĩka “mũrĩithi” wa andũ a Juda. (Isa 44:28; ringithania Ro 4:17.) Nĩ ũndũ wa ũguo Kurusu aamũrirũo mĩaka mĩingĩ kabere, eetirũo “mũitĩrĩrie maguta” wa Jehova (kiugo kĩhaanaine na gĩa Kĩhibirania kĩrĩa kiugĩte mesia, na gĩa Kĩngiriki kĩrĩa kiugĩte kristo). (Isa 45:1) Gũkorũo atĩ Ngai nĩ ‘aamwĩtire na rĩĩtwa rĩake’ mĩaka mĩingĩ kabere, ti kuuga atĩ nĩwe wamũheire rĩĩtwa aaciarũo. Ũndũ ũcio wonanagia atĩ Jehova nĩ aamenyaga atĩ nĩ kũngĩgaaciarũo mũndũ wĩtagwo ũguo, na nĩwe Jehova aamũrĩte ĩmwe kwa ĩmwe, na nĩ aamũĩ na rĩĩtwa.
MACHI 16-22
MŨTHITHŨ KUUMA KIUGO-INĨ KĨA NGAI ISAIA 45-47
Kũmaatha Maũndũ ma Bata Maandĩko-inĩ
Hihi Ngai nĩ Ooĩ atĩ Adamu na Hawa nĩ Mangĩehirie?
Ningĩ Maandĩko nĩ monanagia atĩ Jehova nowe “wiki mũũgĩ.” (Aroma 16:27) Araika nĩ meeyoneire maũndũ maingĩ moonanagia ũũgĩ wake mũnene. Nĩ maambĩrĩirie “kwanĩrĩra makenete” rĩrĩa moonire Jehova akĩũmba indo thĩinĩ wa thĩ. (Ayubu 38:4-7) Hatarĩ nganja ciũmbe icio cia roho nĩ ciaroraga na kinyi maũndũ marĩa meekĩkaga mũgũnda-inĩ wa Edeni. Gũkĩrĩ ũguo-rĩ, hihi nĩ ũngĩarĩ ũndũ wa ũũgĩ harĩ Ngai kũũmba igũrũ na thĩ na indo cia magegania iria irĩ thĩinĩ wa thĩ, acoke ombe ciũmbe igĩrĩ cia mwanya araika makĩĩyonagĩra, o akĩmenyaga atĩ nĩ cingĩehirie? Hatarĩ nganja ũcio ndũngĩarĩ ũndũ wa ũũgĩ.
O na kũrĩ ũguo mũndũ no eyũrie, ‘Ngai ũrĩ na ũũgĩ mũingĩ ũguo aagire kũmenya nĩkĩ?ʼ Nĩ ma ũndũ ũmwe wĩgiĩ ũũgĩ mũnene wa Jehova nĩ atĩ nĩ arĩ ũhoti wa kũmenya “kuuma kĩambĩrĩria . . . maũndũ marĩa mageekĩka.” (Isaia 46:9, 10) O na kũrĩ ũguo, to mũhaka ahũthĩre ũhoti ũcio, o ta ũrĩa atabataraga kũhũthĩra hinya wake wothe hĩndĩ ciothe. Jehova ahũthagĩra ũũgĩ gũthuura nĩ rĩ ekũhũthĩra ũhoti wake wa kũmenya maũndũ kabere. Aũhũthagĩra rĩrĩa ona kwagĩrĩire.
MACHI 23-29
MŨTHITHŨ KUUMA KIUGO-INĨ KĨA NGAI ISAIA 48-49
Rũmagĩrĩra Ũrutani wa Jehova na nĩ Ũrĩgunĩkaga
it “Teacher, Teaching” kĩb. 2
Mũrutani, Ũrutani
Jehova Ngai Mũũmbi witũ, nĩwe mũrutani ũrĩa mũnene wa ndungata ciake. (1Ath 8:36; Thb 27:11; 86:11; 119:102; Isa 30:20; 54:13) Indo iria Ngai ombĩte cio nyene nĩ itũrutaga atĩ arĩ kuo na nĩ arĩ ũũgĩ mũingĩ, na nginya ũmũthĩ ũyũ andũ matirĩ mahota gũthuthuria biũ maũndũ mothe megiĩ ũũmbi. (Ayu 12:7-9) Ũndũ ũngĩ nĩ atĩ, Jehova Ngai nĩ aaguũririe maũndũ na njĩra ya mwanya, akĩruta andũ rĩĩtwa rĩake, mĩoroto yake, na mawatho make. (Ringithania Tham 4:12, 15; 24:12; 34:5-7.) Maũndũ macio aaguũririe makoragwo thĩinĩ wa Bibilia, na nĩmo mahũthagĩrũo kũrutana ũhoro wa ma wĩgiĩ wendi wake. (Ro 15:4; 2Ti 3:14-17) O na roho mũtheru nĩ ũtũrutaga.—Joh 14:26.
Kũmaatha Maũndũ ma Bata Maandĩko-inĩ
it “Acceptable Time” kĩb. 1-3
Ihinda Rĩrĩa Rĩtĩkĩrĩku
Thĩinĩ wa 2 Akorintho 6:2, mũtũmwo Paulo aagwetire ciugo cia ũrathi iria irĩ thĩinĩ wa Isaia 49:8, iria ciugaga ũũ: “Ũũ nĩguo Jehova oigĩte: ‘Hĩndĩ ya gwĩtĩkĩrĩka nĩ ndagũcokeirie ũhoro, na mũthenya wa ũhonokio nĩ ndagũteithirie; ndaikarire ngĩkũgitagĩra nĩguo ngũneane ũtariĩ ta kĩrĩkanĩro nĩ ũndũ wa andũ, nĩguo ũthondeke bũrũri rĩngĩ, na ũtũme megwatĩre igai rĩao rĩrĩa rĩanangĩku.’” Rĩrĩa ciugo icio ciagwetirũo, kũroneka atĩ cieerekeirio harĩ Isaia arũgamĩrĩire rũrĩrĩ rwa Isiraeli. (Isa 49:3) Warĩ ũrathi wĩgiĩ Aisiraeli gũcokio bũrũri-inĩ wao, na kwoguo wahingire rĩa mbere hĩndĩ ĩrĩa maarekereirio kuuma Babuloni, rĩrĩa Aisiraeli arĩa moohetwo meerirũo ũũ: “Umai mũthiĩ!” Merũo ũguo nĩ maacokire bũrũri-inĩ wao, na magĩthondeka bũrũri ũcio warĩ mwanangĩku.—Isa 49:9.
O na kũrĩ ũguo, ciugo “nĩguo ngũneane ũtariĩ ta kĩrĩkanĩro nĩ ũndũ wa andũ” iria irĩ thĩinĩ wa Isaia 49:8, na ciugo iria irĩ thĩinĩ wa Isaia 49:6 atĩ “ndungata” ya Jehova nĩ ĩngĩkaaneanwo ĩrĩ “ũtheri wa ndũrĩrĩ nĩguo ũhonokio [wa Ngai] ũkinye nginya ituri-inĩ cia thĩ,” ironania atĩ ũrathi ũcio nĩ wakoniĩ Mesia, na kwoguo nĩ wahingirio nĩ Jesu Kristo arĩ we “ndungata” ya Ngai. (Ringithania Isa 42:1-4, 6, 7 na Mat 12:18-21.) Tondũ “ihinda rĩrĩa rĩarĩ rĩtĩkĩrĩku” nĩ rĩrĩa Jehova angĩgacokeria ndungata yake na amĩteithie, no mũhaka akorũo nĩ hĩndĩ ĩrĩa Jesu aarĩ gũkũ thĩ, rĩrĩa “aathaithanire na akĩhoya arĩ na kĩrĩro kĩnene na maithori, kũrĩ Ũrĩa ũngĩahotire kũmũhonokia kuuma gĩkuũ-inĩ, na nĩ eetĩkĩrĩkire akĩiguwo tondũ nĩ eetigĩrĩte Ngai.” (Ahi 5:7-9; ringithania Joh 12:27, 28; 17:1-5; Lu 22:41-44; 23:46) Kwoguo warĩ “mũthenya wa ũhonokio” harĩ mũrũ wa Ngai, na ihinda-inĩ rĩu nĩ oonanirie wĩhokeku wa gĩkĩro kĩa igũrũ, na nĩ ũndũ ũcio “akĩĩhokerũo kũrehera arĩa othe mamwathĩkagĩra ũhonokio wa tene na tene.”—Ahi 5:9.
Ningĩ, ciugo cia ũrathi iria Paulo aagwetire kuuma harĩ Isaia 49:8 nĩ ciahingire harĩ Akristiano arĩa eerire ũũ: “Mũtikaamũkĩre ũtugi mũnene wa Ngai na mwage kũmenya muoroto waguo.” Thutha wa kũgweta ũrathi ũcio wa Isaia aamerire ũũ: “Atĩrĩrĩ, rĩrĩ nĩrĩo ihinda rĩrĩa rĩtĩkĩrĩku makĩria. Atĩrĩrĩ, ũmũthĩ nĩguo mũthenya wa ũhonokio.” (2Ko 6:1, 2) Akristiano acio nĩ maatuĩkĩte “Isiraeli a Ngai” a kĩĩroho kuuma hĩndĩ ya Pentekoste ya mwaka wa 33 Mahinda Maitũ gũthiĩ na mbere (Ga 6:16), no nĩ maabataraga kuonania atĩ nĩ maagĩrĩire kwamũkĩra ũtugi mũnene wa Ngai, nĩguo “ihinda rĩrĩa rĩarĩ rĩtĩkĩrĩku” rĩkorũo rĩrĩ “mũthenya wa ũhonokio” harĩ o.
ĨPURO 6-12
MŨTHITHŨ KUUMA KIUGO-INĨ KĨA NGAI ISAIA 50-51
Thikagĩrĩria Ũrĩa Warutirũo nĩ Ngai
cf 133 kĩb. 13
“Nĩ Nyendete Awa”
Jesu arĩ igũrũ atanoka gũkũ thĩ, nĩ eerutĩte maũndũ maingĩ kuuma kũrĩ Ithe. Ũrathi ũrĩa ũrĩ thĩinĩ wa Isaia 50:4-6, wonanagia atĩ Jehova nĩ aarutire Mũriũ wake na njĩra ya mwanya, nĩguo ahote kũhingia itemi rĩake arĩ Mesia. O na gũtuĩka maũndũ mamwe marĩa Jesu aarutirũo maakoniĩ moritũ marĩa aangĩacemanirie namo arĩ Mũitĩrĩrie Maguta wa Jehova, aarĩ o na wendi mũnene wa kwĩruta. Thutha-inĩ rĩrĩa ookire gũkũ thĩ na agĩtuĩka mũndũ mũgima, aarĩ o na wendi wa gũthiĩ nyũmba-inĩ ya Ithe gũthathaiya, na kwĩruta maũndũ marĩa Jehova eendaga marutanwo kuo. Bibilia nĩ yonanagia atĩ ndaatĩraga hekarũ-inĩ na thunagogi-inĩ. (Luka 4:16; 19:47) Nĩguo tũtũũrie wendo witũ harĩ Jehova ũrĩ mũnene, tũbatiĩ gũthiaga mĩcemanio tũtegũtĩrĩria, tondũ nĩkuo tũthathayagĩria Jehova na tũkagĩa na ũmenyo mũingĩ ũmwĩgiĩ.
ĨPURO 13-19
MŨTHITHŨ KUUMA KIUGO-INĨ KĨA NGAI ISAIA 52-53
Jesu nĩ Oonanirie Wendo Mũnene
w10 11/15 7 kĩb. 2
Andũ Ethĩ, Reganagai na Hatĩka cia Andũ a Riika Rĩanyu
Hihi nĩ wĩkoraga ũkĩenda gwĩka maũndũ ta andũ a riika rĩaku? Angĩkorũo nĩ wĩkoraga-rĩ, nĩkĩ hihi? No kũhoteke nĩ wendaga gwĩtĩkĩrĩka nĩo? Ũcio ti ũndũ mũũru, tondũ o na andũ agima nĩ mendaga gwĩtĩkĩrĩka nĩ andũ a riika rĩao. Gũtirĩ mũndũ wendete kũmenwo, arĩ mwĩthĩ kana mũkũrũ. No ũrĩa kũrĩ nĩ atĩ, ti hĩndĩ ciothe tũrĩkenagia andũ nĩ ũndũ wa gwĩka maũndũ ũrĩa kwagĩrĩire. O na Jesu we mwene nĩ eeyoneire ũguo. No hĩndĩ ciothe eekaga ũndũ ũrĩa wagĩrĩire. O na gũtuĩka kũrĩ andũ amwe maamũrũmĩrĩire na magĩtuĩka arutwo ake, kũrĩ angĩ maamũnyararire na maamuonaga “ta atarĩ kĩene.”—Isa. 53:3.
ip-2 205 kĩb. 25
Jehova nĩ Aatũgĩririe Mesia
Hihi Mesia nĩ eeharĩirie kũnyamarĩka na gũkua? Isaia aaugire ũũ: “Nĩ aahinyĩrĩirio, na we mwene agĩtĩkĩra kũhinyĩrĩrio, no ndaigana gũtumũra kanua gake. Aatwarirũo o ta ngʼondu ĩgĩthiĩ gũthĩnjwo, o ta mwatĩ ũkirĩte ũrĩ mbere ya arĩa marawenja, na ndaigana gũtumũra kanua gake.” (Isaia 53:7) Ũtukũ wa mũico Jesu atanoragwo, nĩ angĩetirie “mbũtũ makĩria ma 12 cia araika” ciũke imũteithie. No aaugire ũũ: “Ingĩka ũguo-rĩ, Maandĩko mangĩkĩhingio atĩa marĩa monanĩtie atĩ ũndũ ũyũ no mũhaka ũgeekĩka na njĩra ĩno?” (Mathayo 26:53, 54) Handũ ha gwĩtia mbũtũ, arĩ “Gatũrũme ka Ngai,” ndaageririe kũgirĩrĩria ndakoragwo. (Johana 1:29) Rĩrĩa anene a athĩnjĩri-Ngai na athuri maamũthitangire mbere ya Pilato, Jesu “gũtirĩ ũndũ ooigire.” (Mathayo 27:11-14) Ndeendaga kuuga ũndũ o wothe ũngĩatũmire age kũhingia ũndũ ũrĩa Ngai eendaga eke. Jesu nĩ eehaarĩirie gũkua arĩ kagondu ka igongona, na nĩ aamenyaga atĩ gĩkuũ gĩake nĩ kĩngĩakũũrire andũ arĩa athĩki kuumana na mehia, mĩrimũ, na gĩkuũ.
Kũmaatha Maũndũ ma Bata Maandĩko-inĩ
it “Utensils” kĩb. 2
Indo
Kaingĩ kiugo keliʹ kĩonanagia indo itiganĩte iria ciahũthagĩrũo handũ harĩa hatheru. Indo icio ciakoragwo irĩ ta thani, njagi, icakũri, mbakũri, hũma, ngĩo cia mwaki, magathĩ ma kũhoria ndambĩ, magathĩ ma kũnyita ndambĩ, ndoo, na ikombe. (Tham 25:29, 30, 39; 27:3, 19; 37:16, 23; 38:3; 1Ath 7:40-50; 2Ma 4:11-22) Tondũ indo icio ciahũthagĩrũo wĩra-inĩ mũtheru, ciakoragwo irĩ “nyamũre.” (1Ath 8:4) Nĩ ũndũ ũcio, tondũ Ayahudi arĩa maaumire Babuloni mwaka wa 537 M.M.M. nĩ maaheirũo mweke wa gũkuua indo nyamũre iria Mũthamaki Nebukadineza ooete Jerusalemu, matiabatiĩ kwĩingĩria ũthathaiya-inĩ wa maheeni, na maagĩrĩirũo gũkorũo na mĩthiĩre mĩtheru. Nĩ maagĩrĩirũo gwathĩkĩra rĩathani rĩrĩ: “Garũrũkai, garũrũkai, umai [Babuloni], mũtikahutie kĩndũ gĩtarĩ gĩtheru! Umai thĩinĩ wake, ikarai mũrĩ atheru, inyuĩ mũkuuaga indo cia Jehova.” (Isa 52:11) Matiabatiĩ gũkorũo marĩ atheru o na igũrũ tu, no nĩ nginya ngoro-inĩ ciao. Mũtũmwo Paulo akĩandĩkĩra Akorintho, nĩ aahũthĩrire ciugo cia Isaia 52:11 kuonania atĩ o na Akristiano nĩ magĩrĩirũo gwĩthema ũndũ o wothe ũngĩthahia mwĩrĩ na roho.—2Ko 6:14-18; 7:1.
ĨPURO 20-26
MŨTHITHŨ KUUMA KIUGO-INĨ KĨA NGAI ISAIA 54-55
Nĩ Maũndũ Marĩkũ Wĩhaarĩirie Kwĩima Nĩguo Ũrutwo nĩ Jehova?
w09 9/15 21 kĩb. 3
Gĩthomo Kĩrĩa Jehova Aheanaga nĩ gĩa Thogora Mũnene
Jehova nĩ onanagia wega wake na njĩra ya gũkorũo ehaarĩirie kũruta andũ matarĩ akinyanĩru. Isaia 54:13 ĩkĩaria ũhoro wa Akristiano aitĩrĩrie maguta, yarathĩte ũũ: “Ariũ aku othe nĩ makaarutwo nĩ Jehova, naguo thayũ wa ariũ aku nĩ ũgaakorũo ũrĩ mũingĩ.” Ciugo icio nĩ irahinga nginya harĩ Akristiano a “ngʼondu ingĩ.” (Joh. 10:16) Thĩinĩ wa ũrathi ũngĩ, Isaia oonire andũ a kuuma ndũrĩrĩ ciothe makĩnyitanĩra na ũthathaiya wa ma. Aaugire atĩ meeranaga ũũ: “Ũkai, nĩ twambatei kĩrĩma-inĩ kĩa Jehova, tũthiĩ nyũmba-inĩ ya Ngai wa Jakubu. Nake nĩ arĩtũrutaga ũhoro wĩgiĩ njĩra ciake, na ithuĩ tũgeragĩre tũcĩra-inĩ twake.” (Isa. 2:1-3) Ũrathi ũcio nĩ ũrahinga mahinda maya maitũ. Nĩ gĩtĩo kĩnene kũrutwo nĩ Jehova.
ĨPURO 27-MĨĨ 3
MŨTHITHŨ KUUMA KIUGO-INĨ KĨA NGAI ISAIA 56-57
Nĩ Tũkenaga nĩ Ũndũ wa Jehova Gũkorũo Arĩ Ngai Witũ
ip-2 269 kĩb. 14-16
Jehova nĩ Aarahũrire Roho wa Arĩa Matarĩ Hinya
O na kũrĩ ũguo, ihinda rĩa Ngai rĩa kũmakirĩrĩria nĩ rĩngĩathirire. Jehova akĩaria ũhoro wa ihinda rĩu aaugire ũũ: “Nĩ ngũmenyithania ‘ũthingu’ waku na wĩra waku, na maũndũ macio matigaakũguna. Rĩrĩa ũkaarĩra ũgĩcaria ũteithio, mĩhianano ĩyo yaku mĩingĩ ndĩgakũhonokia. Rũhuho nĩ rũkaamĩkuua rũmĩeherie yothe, ĩkaahurutwo nĩ mĩhũmũ.” (Isaia 57:12, 13a) Jehova nĩ angĩkaguũria ũthingu wa maheeni wa Juda. Maũndũ ma ũhinga marĩa andũ a Juda meekaga matingĩamagunire, na ‘mĩhianano yao mĩingĩʼ ndĩngĩamahonokirie. Rĩrĩa ũũru ũngĩkamakora, ngai iria meehokete ingĩkahurutwo nĩ mĩhũmũ.
Ciugo cia Jehova ciahingire mwaka wa 607 M.M.M. Hĩndĩ ĩyo nĩrĩo Mũthamaki Nebukadineza wa Babuloni aanangire Jerusalemu, agĩcina hekarũ, na akĩnyita andũ aingĩ mĩgwate. “Andũ a Juda magĩgĩtwarũo ithamĩrio makĩehera bũrũri-inĩ wao.”—2 Athamaki 25:1-21.
O na mahinda-inĩ maya, ngai cia maheeni cia arĩa meĩtaga Akristiano itikaamahonokia mũthenya wa marakara ma Jehova. (Isaia 2:19-22; 2 Athesalonike 1:6-10) Marĩ hamwe na ndini icio ingĩ cia maheeni cia “Babuloni Ũrĩa Mũnene” nĩ makaaninwo. Nyamũ ya gĩthaka ya mũhaano ya rangi mũtune na hĩa ciayo ikũmi nĩ ‘ikaananga Babuloni Ũrĩa Mũnene na imũtige arĩ njaga, na nĩ ikaarĩa nyama ciake na imũcine biũ na mwaki.’ (Kũguũrĩrio 17:3, 16, 17) Nĩ tũkenaga tondũ nĩ twathĩkĩire rĩathani rĩrĩ: “Umai thĩinĩ wake, inyuĩ andũ akwa, angĩkorũo mũtikwenda kũnyitanĩra nake mehia-inĩ make, na angĩkorũo mũtikwenda kwamũkĩra mahũũra mamwe make.” (Kũguũrĩrio 18:4, 5) Rekei tũtue itua rĩa kwaga gũcoka kũrĩ we kana gũkorũo na mĩthiĩre ta yake.
it “Peace” kĩb. 3
Thayũ
Kũgĩa na Thayũ. Jehova nĩ Ngai wa thayũ (1Ko 14:33; 2Ko 13:11; 1The 5:23; Ahi 13:20) na nĩwe ũheanaga thayũ (Nda 6:26; 1Ma 22:9; Thb 4:8; 29:11; 147:14; Isa 45:7; Ro 15:33; 16:20), tondũ nĩ ngumo ĩmwe ya maciaro ma roho wake. (Ga 5:22) Kwoguo andũ arĩa marĩ na thayũ hamwe na Ngai no o tu mangĩkorũo na thayũ wa ma. Mũndũ angĩka mehia maritũ, nĩ athũkagia ũrata wake hamwe na Ngai na ũndũ ũcio ũgatũma age thayũ. Mwandĩki wa thaburi aaugire ũũ: “Mahĩndĩ makwa matirĩ na thayũ nĩ ũndũ wa mehia makwa.” (Thb 38:3) Kwoguo andũ arĩa mangĩenda gũcaria thayũ na kũũthingata no mũhaka ‘metheme maũndũ marĩa moru na mekage marĩa mega.’ (Thb 34:14) Gũtingĩkorũo na thayũ hatarĩ na ũthingu. (Thb 72:3; 85:10; Isa 32:17) Nĩkĩo andũ arĩa aganu matangĩkorũo na thayũ. (Isa 48:22; 57:21; ringithania Isa 59:2-8) No andũ arĩa makoragwo marĩ ehokeku harĩ Jehova, mendete watho wake (Thb 119:165), na mathĩkagĩra maathani make nĩ makoragwo na thayũ.—Isa 48:18.
Kũmaatha Maũndũ ma Bata Maandĩko-inĩ
w07 1/15 10 kĩb. 3
Matemo Kuuma Ibuku-inĩ rĩa Isaia—II
56:6—“Andũ a kũngĩ” nĩ a, na nĩ na njĩra irĩkũ “marũmagia kĩrĩkanĩro” kĩa Jehova? “Andũ a kũngĩ” nĩ “ngʼondu ingĩ” cia Jesu. (Joh. 10:16) Marũmagia kĩrĩkanĩro kĩerũ na njĩra ya gwathĩkĩra mawatho ma kĩrĩkanĩro kĩu, na kũnyitanĩra biũ na mĩbango ĩrĩa ĩkagwo kũgerera kĩrĩkanĩro kĩu. Ningĩ nĩ marĩaga irio cia kĩĩroho o ta iria Akristiano aitĩrĩrie maguta marĩaga, na makamanyita mbaru wĩra wa kũhunjia ndũmĩrĩri ya Ũthamaki na gũtua andũ arutwo.
w06 11/1 27 kĩb. 1
Kuonania Gĩtĩo Rĩrĩa Tũcemanĩtie nĩ Ũndũ wa Ũthathaiya
JEHOVA nĩ acokanĩrĩirie Akristiano aitĩrĩrie maguta na a ngʼondu ingĩ, nĩguo mamũthathaiye ‘kĩrĩma-inĩ gĩake kĩamũre.’ Nĩ atũmaga makorũo na gĩkeno marĩ thĩinĩ wa ‘nyũmba yake ya mahoya,’ kana hekarũ yake ya kĩĩroho, ĩrĩa ĩkoragwo ĩrĩ “nyũmba ya mahoya harĩ ikundi ciothe cia andũ.” (Isaia 56:7; Mariko 11:17) Maũndũ macio monanagia atĩ ũthathaiya wa Jehova nĩ mũtheru na nĩ mũtũũgĩru. Rĩrĩa tuonania gĩtĩo harĩ mĩcemanio itũ kũrĩa tũthiaga kũrutwo na gũthathaiya, tuonanagia atĩ twĩ na mawoni ta ma Jehova megiĩ maũndũ marĩa matheru.