Thutha wa Jesu kũhunjia ihinda ta rĩa mwaka ũmwe na nuthu, nĩ aabataraga gũtua itua rĩa bata mũno. Nĩ andũ arĩkũ angĩathuurire nĩguo marutithanie wĩra nake? Ningĩ nĩa angĩamenyeririe matongorie kĩũngano gĩa Gĩkristiano? Nĩguo atue matua macio, Jesu nĩ aabataraga ũtongoria wa Jehova. Nĩ ũndũ ũcio, aathiire kĩrĩma-inĩ arĩ wiki na akĩhoya ũtukũ mũgima. Mũthenya ũyũ ũngĩ rũcinĩ, Jesu eetire arutwo amwe ake na agĩthuura atũmwo 12 gatagatĩ-inĩ kao. Hihi no ũririkane marĩĩtwa mao? Meetagwo Petero, Andrea, Jakubu, Johana, Filipu, Batholomayo, Toma, Mathayo, Jakubu mũrũ wa Alufayo, Thadayo, Simoni, na Judasi Mũisikariota.

Atũmwo acio ikũmi na erĩ mangĩathiaga hamwe na Jesu. Thutha wa kũmamenyeria, nĩ aamatũmire mathiĩ makahunjie marĩ oiki. Jehova nĩ aamaheire hinya wa kũingata ndaimono na kũhonia andũ arĩa arwaru.

Jesu aametaga arata ake, na nĩ aamehokete. Afarisai meeciragia atĩ atũmwo maarĩ andũ matarĩ igweta na matarĩ athomu. No Jesu aamonaga na njĩra ngũrani. Nĩ aamamenyeririe nĩ ũndũ wa wĩra ũrĩa warĩ mbere yao. Nĩ mangĩakorirũo na Jesu mahinda-inĩ marĩa ma bata mũno ũtũũro-inĩ wake, ta mbere ya gĩkuũ gĩake na thutha wa kũriũkio. Aingĩ a atũmwo acio ikũmi na erĩ maaumĩte Galili, o ta Jesu. Amwe ao nĩ maahikanĩtie.

Atũmwo maarĩ andũ matarĩ akinyanĩru na kwoguo nĩ maahĩtagia. Rĩmwe nĩ maaragia matambĩte gwĩciria na magatua matua matagĩrĩire. Ningĩ rĩmwe nĩ maagaga wetereri na nĩ maakararanagia igũrũ rĩgiĩ nũũ warĩ wa bata gũkĩra arĩa angĩ. No maarĩ andũ ega meendete Jehova. Thutha-inĩ, nĩo mangĩatuĩkire andũ a mbere kĩũngano-inĩ gĩa Gĩkristiano na mahingie itemi rĩa bata mũno.

Thutha wa Jesu gũthuura atũmwo arĩa 12, nĩ aaikũrũkire kuuma kĩrĩma-inĩ agĩthiĩ harĩa kĩrĩndĩ kĩnene gĩacemanĩtie. Andũ acio maaumĩte Galili, Judea, Turo, Sidoni, Siria, na mũrĩmo wa Jorodani. Maatwarĩte andũ maathumbũragwo nĩ mĩrimũ na angĩ maathĩnagio nĩ ndaimono. Jesu aamahonirie othe. Agĩcoka agĩikara thĩ na akĩambĩrĩria kũmaarĩria. Nĩ aamataarĩirie ũrĩa twagĩrĩirũo nĩ gwĩka angĩkorũo nĩ tũrenda gũtuĩka arata a Ngai. Twagĩrĩirũo kũmenya atĩ nĩ tũrabatara Jehova, na twĩrute kũmwenda. Ĩndĩ tũtingĩhota kwenda Ngai angĩkorũo tũtiendete andũ arĩa angĩ. Ningĩ nĩ twagĩrĩirũo kuonanagia tha na kĩhooto harĩ andũ othe, nginya thũ citũ.

Jesu aaugire ũũ: ‘Kwenda arata aku tu ti kũiganu. Nĩ ũrabatara kwenda nginya thũ ciaku na ũkohera andũ kuuma ngoro. Mũndũ angĩrakara nĩ ũndũ waku, thiĩ kũrĩ we o rĩo na ũmwĩre akuohere. Ĩkaga andũ arĩa angĩ ũrĩa ũngĩenda magwĩkage.’

Ningĩ Jesu nĩ aaheire andũ acio ũtaaro mwega mũno wĩgiĩ indo cia gũkũ thĩ. Aameerire ũũ: ‘Kũgĩa ũrata na Jehova nĩ kwa bata mũno gũkĩra gũkorũo na mbeca nyingĩ. Mũici no aiye mbeca ciaku, no gũtirĩ mũndũ ũngĩiya ũrata waku na Jehova. Tigaga gũtangĩka nĩ kĩrĩa ũkũrĩa, kĩrĩa ũkũnyua, kana kĩrĩa ũkwĩhumba. Ta rora nyoni cia rĩera-inĩ. Hingo ciothe Ngai nĩ atigagĩrĩra atĩ nĩ ciona irio cia kũigana. Gũtangĩka gũtingĩongerera mũthenya o na ũmwe ũtũũro-inĩ waku. Ririkana atĩ Jehova nĩ oĩ kĩrĩa ũrabatara.’

Mbere ĩyo, kĩrĩndĩ kĩu gĩtiaiguĩte mũndũ ũngĩ akĩrutana ta Jesu. Atongoria ao a ndini matiamarutĩte maũndũ macio. Nĩ kĩĩ gĩatũmĩte Jesu akorũo arĩ mũrutani mwega ũguo? Nĩ tondũ maũndũ marĩa mothe aarutanaga maaumaga kũrĩ Jehova.