O mwaka, andũ aingĩ ethĩ arĩa marereirũo famĩlĩ-inĩ cia Aira a Jehova nĩ mabatithagio. Hihi nĩ ũreciria kuoya ikinya rĩu? Angĩkorũo nĩguo, nĩ ũrabatara kwamba gũtaũkĩrũo kwĩyamũrĩra Jehova na kũbatithio nĩ kuuga atĩa.

• Kũbatithio nĩ kuuga atĩa?

• Kwĩyamũrĩra Jehova nĩ kuuga atĩa?

• Kũbatithio nĩ kwa bata nĩkĩ?

• Ũrĩa andũ a riika rĩaku marauga

• Ũrĩa andũ amwe maugaga na ũrĩa kũrĩ

Kũbatithio nĩ kuuga atĩa?

Kũbatithio kũrĩa kwarĩrĩirio Bibilia-inĩ kuugĩte kũrikio biũ maĩ-inĩ no ti gũitĩrĩrio maĩ, na gũkoragwo gũkĩrũgamĩrĩra ũndũ wa bata mũno.

• Rĩrĩa warikio maĩ-inĩ ũkĩbatithio, wonagia andũ atĩ rĩu ndũrĩtũũraga no ũndũ tu wa gwĩka wendi waku mwene.

• Kuumĩra maĩ-inĩ kuonanagia atĩ nĩ wambĩrĩria ũtũũro mwerũ wa gũkorũo ũkĩiga wendi wa Ngai mbere ũtũũro-inĩ waku.

Rĩrĩa wabatithio, wonanagia mbere ya andũ atĩ nĩ wĩtĩkĩtie Jehova nĩwe ũrĩ na kĩhooto gĩa kũiga ithimi cia wega na ũũru, na ũkonania nĩ wĩrĩire Jehova atĩ hingo ciothe ũrĩkaga wendi wake.

Ũndũ wa gwĩciria: Nĩ kĩĩ kĩngĩtũma wende kuonania mbere ya andũ atĩ nĩ wĩhaarĩirie gwathĩkĩra Jehova ũtũũro-inĩ waku wothe? Rora 1 Johana 4:19 na Kũguũrĩrio 4:11.

Kwĩyamũrĩra Jehova nĩ kuuga atĩa?

Ũtanabatithio, ũbatiĩ kwamba kwĩyamũrĩra Jehova ũrĩ wiki. Na njĩra ĩrĩkũ?

Waragia na Jehova kũgerera mahoya ũkamwĩrĩra atĩ ũkũmũtungatĩra tene na tene na atĩ ũrĩkaga wendi wake gũtekũmakania ũrĩa maũndũ mahaana na ũrĩa andũ arĩa angĩ mareka.

Mũndũ abatithio onanagia mbere ya andũ atĩ nĩ eyamũrĩire Jehova. Onagia andũ atĩ rĩu ndarĩtũũraga nĩ ũndũ wake mwene no nĩ aheanĩte ũtũũro wake harĩ Jehova.—Mathayo 16:24.

Ũndũ wa gwĩciria: Nĩkĩ ũtũũro waku no wagĩre makĩria ũngĩĩheana harĩ Jehova? Rora Isaia 48:17, 18 na Ahibirania 11:6.

Kũbatithio nĩ kwa bata nĩkĩ?

Jesu aaugire atĩ mũndũ o wothe ũrenda gũtuĩka mũrutwo wake no mũhaka abatithio. (Mathayo 28:19, 20) Kwoguo no nginya Akristiano mabatithio. O na Bibilia yugaga atĩ no mũhaka mũndũ abatithio nĩguo akaahonoka.—1 Petero 3:21.

O na kũrĩ ũguo, wendo waku harĩ Jehova na ngatho iria ũkoragwo nacio kũmwerekera nĩcio ibatiĩ gũtũma wende kũbatithio. Ũbatiĩ gũkorũo na mwerekera ta wa mwandĩki wa Thaburi ũrĩa waugire ũũ: “Hihi ngũrĩha Jehova na kĩĩ tondũ wa maũndũ marĩa mothe mega anjĩkĩire? . . . Nĩ ngũkaĩra rĩĩtwa rĩa Jehova. Nĩ ngũhingĩria Jehova mĩĩhĩtwa yakwa.”—Thaburi 116:12-14.

Ũndũ wa gwĩciria: Nĩ maũndũ marĩkũ mega Jehova agwĩkĩire, na ũngĩmũrĩha atĩa? Rora Gũcokerithia Maathani 10:12, 13 na Aroma 12:1.

Angĩkorũo nĩ ũratũũra kũringana na ithimi cia Bibilia na ũgakũria ũrata wa hakuhĩ hamwe na Ngai, no kũhoteke nĩ ũrerirĩria kũbatithio. Ũngĩmenya atĩa atĩ nĩ wĩhaarĩirie kuoya ikinya rĩu?a

Maũndũ marĩa marĩ gĩcunjĩ-inĩ gĩkĩ

• Ndĩrabatara gũkorũo njũĩ ũhoro ũigana atĩa?

• Ndĩrabatara gũkorũo ngĩka atĩa?

• Ũrĩa andũ a riika rĩaku marauga

Ndĩrabatara gũkorũo njũĩ ũhoro ũigana atĩa?

Ũkĩĩhaarĩria nĩguo ũbatithio, ndũrabatara kũiga meciria-inĩ ma ciothe cia Bibilia ta ũrĩa mũndũ angĩka nĩguo ahĩtũke kĩgeranio. O na kũrĩ ũguo, nĩ ũkũbatara kũhũthĩra “ũhoti [waku] wa gwĩciria” nĩguo ũkorũo na ma biũ atĩ maũndũ marĩa Bibilia ĩrutanaga nĩ ma ma. (Aroma 12:1) Kwa ngerekano-rĩ,

• Hihi wĩ na ma biũ atĩ Ngai arĩ kuo na atĩ nĩ wagĩrĩirũo kũmũthathaiya?

  Bibilia yugaga ũũ: “Mũndũ ũrĩa ũkuhagĩrĩria Ngai no mũhaka etĩkie atĩ arĩ kuo na atĩ nĩ aheaga arĩa mamũcaragia na kĩyo ngerenwa.”—Ahibirania 11:6.

  Wĩyũrie: ‘Nĩ kĩĩ gĩtũmaga njĩtĩkie atĩ Ngai arĩ kuo?’ (Ahibirania 3:4) ‘Njagĩrĩirũo kũmũthathaiya nĩkĩ?’—Kũguũrĩrio 4:11.

  Ũteithio makĩria: Rora gĩcunjĩ kĩa, “Uumbaji au Mageuzi?—Sehemu ya 1: Kwa Nini Nimwamini Mungu?”

• Hihi wĩ na ma biũ atĩ ndũmĩrĩri ĩrĩa ĩrĩ thĩinĩ wa Bibilia yumĩte kũrĩ Ngai?

  Bibilia yugaga ũũ: “Rĩandĩko o rĩothe, rĩtongoretio nĩ roho wa Ngai na rĩrĩ ũguni harĩ kũrutana, gũkaanania, kũrũnga maũndũ, na kũherithia na njĩra ya ũthingu.”—2 Timotheo 3:16.

  Wĩyũrie: ‘Nĩ kĩĩ gĩtũmaga njĩtĩkie atĩ Bibilia ti ibuku rĩkoragwo na ũhoro uumĩte kũrĩ andũ?’—Isaia 46:10; 1 Athesalonike 2:13.

  Ũteithio makĩria: Rora gĩcunjĩ kĩa, “Bibilia Ĩngĩndeithia Atĩa?—Gĩcunjĩ kĩa 1: Kũmenya Bibilia Yaku.”

• Hihi wĩ na ma biũ atĩ Jehova nĩ ahũthagĩra kĩũngano gĩa Gĩkristiano kũhingia wendi wake?

  Bibilia yugaga ũũ: “[Ngai] arogĩa na riri kũgerera kĩũngano na kũgerera Kristo Jesu njiarũa-inĩ ciothe tene na tene.”—Aefeso 3:21.

  Wĩyũrie: ‘Hihi nyonaga maũndũ marĩa ndĩĩrutaga megiĩ Bibilia ndĩ mĩcemanio-inĩ ya Gĩkristiano moimĩte kũrĩ andũ kana kũrĩ Jehova?’ (Mathayo 24:45) ‘Hihi nĩ thiaga mĩcemanio nginya rĩrĩa aciari akwa matarathiĩ (angĩkorũo nĩ magwĩtĩkĩrĩtie gwĩka ũguo)?’—Ahibirania 10:24, 25.

  Ũteithio makĩria: Rora gĩcunjĩ kĩa, “Njagĩrĩirũo Gũthiĩ Mĩcemanio Nyũmba-inĩ ya Ũthamaki Nĩkĩ?”

Ndĩrabatara gũkorũo ngĩka atĩa?

Ndũrabatara gũkorũo ũrĩ mũkinyanĩru nĩguo ũbatithio. O na kũrĩ ũguo, nĩ wagĩrĩirũo kuonania atĩ nĩ ũrerutanĩria gwĩthema “maũndũ marĩa moru” na ũgeka maũndũ “marĩa mega.” (Thaburi 34:14) Kwa ngerekano-rĩ,

• Hihi nĩ ũratũũra kũringana na ithimi cia Jehova?

  Bibilia yugaga ũũ: “Tũũriai thamiri njega.”—1 Petero 3:16.

  Wĩyũrie: ‘Nyonanĩtie atĩa atĩ nĩ “menyeretie ũhoti wakwa wa gũtaũkĩrũo ngahota gũkũũrana wega na ũũru”?’ (Ahibirania 5:14) ‘Hihi nĩ kũrĩ mahinda ndanahota kũregana na hatĩka cia riika? Hihi arata akwa nĩ manjĩkĩraga ngoro gwĩka ũrĩa kwagĩrĩire?’—Thimo 13:20.

  Ũteithio makĩria: Rora gĩcunjĩ kĩa, “Ingĩmenyeria Thamiri Yakwa Atĩa?”

• Hihi nĩ ũtaũkagĩrũo atĩ nĩ ũkoorio nĩ Ngai nĩ ũndũ wa ciĩko ciaku?

  Bibilia yugaga ũũ: “O ũmwe witũ nĩ akaarũgama mbere ya Ngai atuĩrũo kũringana na ciĩko ciake.”—Aroma 14:12.

  Wĩyũrie: ‘Hihi nĩ ndĩyonaga ũrĩa haana kũna itekwĩheenia? Hihi nĩ ngoragwo ndĩ mwĩhokeku harĩ arĩa angĩ?’ (Ahibirania 13:18) ‘Hihi nĩ njĩtĩkagĩra mahĩtia makwa, kana nĩ kũhithĩrĩra ndĩmahithagĩrĩra kana ngacokereria arĩa angĩ mahĩtia?’—Thimo 28:13.

  Ũteithio makĩria: Rora gĩcunjĩ kĩa, “Nifanye Nini Ninapokosea?”

• Hihi nĩ ũrarĩmĩra ũrata waku hamwe na Jehova?

  Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

  Wĩyũrie: ‘Nĩ maũndũ marĩkũ njĩkaga nĩguo nguhĩrĩrie Jehova makĩria?’ Kwa ngerekano-rĩ, ‘Hihi nĩ thomaga Bibilia itegũtĩrĩria?’ (Thaburi 1:1, 2) ‘Hihi nĩ hoyaga kaingĩ?’ (1 Athesalonike 5:17) ‘Hihi ngĩhoya nĩ ngwetagĩra Jehova ĩmwe kwa ĩmwe ũndũ ũrĩa ndĩrenda? Hihi arata akwa nĩ andũ mendete Jehova?’—Thaburi 15:1, 4.

  Ũteithio makĩria: Rora gĩcunjĩ kĩa, “Bibilia Ĩngĩndeithia Atĩa?—Gĩcunjĩ gĩa 2: Ũrĩa Ũngĩkenera Gũthoma Bibilia” na kĩa “Njagĩrĩirũo Kũhoya Nĩkĩ?”

ŨNDŨ ŨNGĨKA: Thoma gĩcunjĩ kĩa 37 kĩa ibuku rĩa Maswali Ambayo Vijana Huuliza—Majibu Yafanyayo Kazi, Buku la 2, kĩrĩa gĩgũgũteithia kwĩhaarĩria nĩguo ũbatithio, na makĩria ũrore fomu ĩrĩa ĩrĩ karatathi-inĩ ka 308 na ka 309.

Hihi nĩ wĩtigagĩra kwĩyamũrĩra Jehova na kũbatithio? Gĩcunjĩ gĩkĩ nĩ gĩgũgũteithia kũniina guoya ũcio.

Maũndũ marĩa marĩ gĩcunjĩ-inĩ gĩkĩ

• Ĩ ingĩka mehia maritũ thutha wa kũbatithio?

• Ĩ ingĩremererũo kũhingia maũndũ marĩa ndĩrerĩgĩrĩrũo hingie thutha wa kũbatithio?

• Ĩ ingĩona ta itaragĩrĩra gũkorũo ngĩtungatĩra Jehova?

• Ũrĩa andũ a riika rĩaku marauga

Ĩ ingĩka mehia maritũ thutha wa kũbatithio?

Gĩtũmi gĩa kwĩyũria ũguo: Kwahoteka harĩ mũndũ ũĩ wekire mehia maritũ na akĩeherio kĩũngano-inĩ. (1 Akorintho 5:11-13) Kwoguo no wone ta o nawe ũngĩĩkora handũ ta hau.

“Kĩambĩrĩria-inĩ nĩ ndetigagĩra kũbatithio ndigekore njĩkĩte mehia maritũ. Nĩ ndonaga ũndũ ũcio nĩ ũngĩatuurithirie aciari akwa mũno.”—Rebekah.

Rĩandĩko rĩa mũthingi: “Mũndũ ũrĩa mwaganu nĩ atigane na mĩthiĩre yake . . . Nĩ acokerere Jehova, na nĩ ekũmũiguĩra tha, nĩ acokerere Ngai witũ, nĩ gũkorũo nĩ ekuohanĩra na njĩra nene.”—Isaia 55:7.

Wĩcirie ũndũ ũyũ: O na gũtuĩka andũ arĩa mehagia na makaga kwĩrira nĩ meheragio kĩũngano-inĩ, Jehova nĩ onagia tha andũ arĩa merira na magetĩkĩra kũrũngwo.—Thaburi 103:13, 14; 2 Akorintho 7:11.

Ũndũ ũngĩ nĩ atĩ, o na gũtuĩka ndũrĩ mũkinyanĩru, no ũhote kũregana na magerio ũgĩteithio nĩ Jehova. (1 Akorintho 10:13) Ningĩ-rĩ, nũũ wagĩrĩirũo gũgũtuĩra ũrĩa ũgũikara? Na githĩ tiwe?

“Nĩ ndetigagĩra kũbatithio nĩguo ndigeke mehia maritũ, no ngĩcoka ngĩona o na ndaga kũbatithio ngũkorũo ngĩhĩtia. Ndonire ndibatiĩ kwaga kuoya ikinya rĩu ngĩtigĩra maũndũ marĩa mangĩhaanĩka.”—Karen.

Ririkana: No ũthuure gwĩthema gwĩka mehia maritũ, o ta ũrĩa ndungata nyingĩ cia Jehova ihotete gwĩka.—Afilipi 2:12.

Ũteithio makĩria: Rora gĩcunjĩ kĩa “Ingĩregana Atĩa na Magerio?”

Ĩ ingĩremererũo kũhingia maũndũ marĩa ndĩrerĩgĩrĩrũo hingie thutha wa kũbatithio?

Gĩtũmi gĩa kwĩyũria ũguo: Kwa ngerekano, no gũkorũo nĩ ũĩ andũ ethĩ mathamĩire kũndũ kũraihu na andũ ao a famĩlĩ na arata nĩguo mandandũre ũtungata wao harĩ Jehova. Kwoguo no wone ta andũ mangĩrĩgĩrĩra o nawe wĩke ũguo.

“Mũkristiano mũbatithie nĩ akoragwo na mweke wa kwĩigĩra mĩoroto ya gũtungata na njĩra itiganĩte, no andũ amwe matikoragwo mehaarĩirie kwĩheana na njĩra ĩyo, nao angĩ maũndũ mao matingĩmetĩkĩria gwĩka ũguo.”—Marie.

Rĩandĩko rĩa mũthingi: “O mũndũ nĩ athuthurie ciĩko ciake mwene, na hĩndĩ ĩyo nĩ ekũgĩa na gĩtũmi gĩa gũkena nĩ ũndũ wake mwene, no ti kwĩringithania na mũndũ ũrĩa ũngĩ.”—Agalatia 6:4.

Wĩcirie ũndũ ũyũ: Handũ ha kwĩringithanagia na andũ arĩa angĩ, wĩciragie ũhoro wa ciugo ici cia Mariko 12:30: “No mũhaka wende Jehova Ngai waku na ngoro yaku yothe.”

Rĩandĩko rĩu rĩronania wagĩrĩirũo gũtungatĩra Jehova na ngoro yaku yothe, no ti ya mũndũ ũngĩ. Angĩkorũo nĩ wendete Jehova kuuma ngoro, nĩ ũrĩĩrutanagĩria biũ kũmũtungatĩra kũringana na ũhoti waku.

“O na gũtuĩka ikinya rĩa kũbatithio nĩ rĩbatiĩ kuoywo na ũritũ, rĩtikoragwo rĩrĩ mũrigo mũritũ. Ũngĩgĩa ũrata na andũ ega, nĩ marĩgũteithagia. Na o kahora wathiĩ ũkinyĩrĩte mĩeke ya ũtungata, nĩ ũkũgĩa na gĩkeno makĩria. No ũngĩaga kũbatithio, ũgũkorũo ũkĩĩima maũndũ mega.”—Julia.

Ririkana: Gũkorũo na ngatho nĩ ũndũ wa wendo ũrĩa Jehova akuonetie, nĩ kũrĩgũtindĩkaga kũmũtungatĩra na ngoro yaku yothe.—1 Johana 4:19.

Ũteithio makĩria: Rora gĩcunjĩ kĩa “Je, Mimi Huchukua Mambo kwa Uzito?”

Ĩ ingĩona ta itaragĩrĩra gũkorũo ngĩtungatĩra Jehova?

Gĩtũmi gĩa kwĩyũria ũguo: Andũ makoragwo marĩ anini mũno maringithanĩtio na Jehova, Mwathani ũrĩa Mũnene igũrũ na thĩ. Kwoguo no ũrigwo kana o na Jehova nĩ akũĩ.

Tondũ ndarereirũo ũhoro-inĩ wa ma, ndaiguaga ta wendo wakwa harĩ Jehova wehocetie harĩ aciari akwa, na atĩ Jehova we mwene ndaangucĩrĩirie harĩ we.”—Natalie.

Rĩandĩko rĩa mũthingi: “Gũtirĩ mũndũ ũngĩũka kũrĩ niĩ atagucĩrĩirio nĩ Awa ũrĩa wandũmire.”—Johana 6:44.

Wĩcirie ũndũ ũyũ: Gũkorũo atĩ nĩ ũreciria kuoya ikinya rĩa kũbatithio no kuonanie atĩ Jehova nĩ akũgucĩrĩirie harĩ we, nĩguo ũgĩe na ũrata wa hakuhĩ hamwe nake. Githĩ ti wega ũkĩoe ikinya rĩu rĩa kũmũkuhĩrĩria?

Ningĩ ririkana atĩ Jehova nĩwe ũigĩte ithimi iria arĩa ekũgucĩrĩria mabatiĩ kũrũmĩrĩra, no ti wee kana mũndũ ũngĩ. Na twĩragwo ũũ Kiugo-inĩ gĩake: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

“Gũkorũo atĩ nĩ ũĩ Jehova na nĩ akũgucĩrĩirie harĩ we, kũronania atĩ nĩ akwendete. Kwoguo ũngĩigua ta ũtaragĩrĩra kũmũtungatĩra, ririkana atĩ macio timo mawoni ma Jehova. Na hingo ciothe mawoni make makoragwo marĩ marũngĩrĩru.”—Selina.

Ririkana: Angĩkorũo nĩ ũhingĩtie maũndũ marĩa Bibilia yugaga megiĩ kũbatithio, nĩ ũragĩrĩra gũthathaiya Jehova. Makĩria ma ũguo, Jehova nĩ agĩrĩire gũthathaiyo nĩ andũ, nginya o nawe.—Kũguũrĩrio 4:11.

Ũteithio makĩria: Rora gĩcunjĩ kĩa “Njagĩrĩirũo Kũhoya Nĩkĩ?”