6 Kũrũnga

ŨGUO NĨ KUUGA ATĨA?

Kiugo kũrũnga no kiuge gũtongoria kana kũrutana. Rĩmwe na rĩmwe ũndũ ũcio no ũhutie kũrũnga mwana wĩkĩte ũndũ mũũru. O na kũrĩ ũguo, kaingĩ gĩkoragwo kĩhutĩtie kũruta mwana mĩtugo mĩega nĩguo ahote gũtuaga matua mega.

ŨNDŨ ŨCIO NĨ WA BATA NĨKĨ?

Mĩaka-inĩ ya ica ikuhĩ, aciari amwe matirũngaga ciana ciao tondũ wa gwĩtigĩra atĩ nĩ irĩyonaga itarĩ kĩene. O na kũrĩ ũguo, aciari arĩa mahũthagĩra ũũgĩ nĩ maigagĩra ciana ciao mawatho marĩa maciagĩrĩire na magacimenyeria kũmarũmĩrĩra.

“Ciana nĩ ibataraga kũigĩrũo mĩhaka nĩguo igaatuĩka andũ marĩ na mĩtugo mĩega. Ciana ingĩaga kũrũngwo, ingĩkorũo ihaana ta meri ĩtarĩ na kĩndũ gĩa kũmĩtongoria, na ũndũ ũcio no ũtũme yũre njĩra o na kana ĩrikĩre.”​—Pamela.

ŨRĨA ŨNGĨKA

Rũmagĩrĩra maũndũ marĩa ũtuĩte. Mwana waku angĩaga gwathĩkĩra mawatho marĩa ũigĩte, tigĩrĩra atĩ nĩ ona moimĩrĩro ma kwaga gwathĩka. No rĩrĩa amathĩkĩra, mũcokerie ngatho.

“Nĩ njokagĩria ciana ciakwa ngatho kaingĩ nĩ ũndũ wa gũkorũo irĩ njathĩki o na tũgĩikaraga thĩinĩ wa thĩ ĩtendaga gwathĩka. Gũcicokeria ngatho nĩ gũtũmaga ciĩtĩkĩre kũrũngwo rĩrĩa kwabatarania.”​—Christine.

ŨTAARO WA BIBILIA: “Kĩrĩa gĩothe mũndũ arahanda, kĩu nokĩo akaagetha.”​—Agalatia 6:7.

Koragwo na ũigananĩru. Rĩrĩa ũrarũnga mwana, wĩcirie ũhoro wa mĩaka yake, ũhoti wake, na ũritũ wa ũndũ ũrĩa ekĩte. Njĩra ĩrĩa ũkũhũthĩra kũrũnga mwana waku no ĩkorũo na moimĩrĩro mega makĩria ĩngĩkorũo ĩhutanĩtie na mahĩtia marĩa ekĩte. Kwa ngerekano, angĩkorũo nĩ thimũ ahũthĩrĩte ũũru, no ũmũgirie kũhũthĩra thimũ kwa ihinda. O na kũrĩ ũguo, wĩtheme kũrakaragio nĩ tũmaũndũ tũnini tũtarĩ twa bata.

“Nĩ ngeragia gwĩciria kana mwana wakwa agire gwathĩka nĩ ũndũ wa rũtũrĩko kana hihi no itua atuire rĩtarĩ rĩega. Nĩ kũrĩ ngũrani gatagatĩ-inĩ ga kũmenyera gwĩkaga ũndũ mũũru, na gwĩka ihĩtia rĩmwe rĩrĩa mũndũ angĩbatara o kwĩrũo ũhoro warĩo tu.”​—Wendell.

ŨTAARO WA BIBILIA: “Mũtikarakaragie ciana cianyu, nĩguo itigakue ngoro.”​—Akolosai 3:21.

Koragwo na wendo. No akorũo arĩ ũndũ mũhũthũ harĩ ciana gwĩtĩkĩra kũrũngwo ingĩmenya atĩ aciari maracirũnga tondũ nĩ maciendete.

“Mũriũ witũ angĩahĩtirie, nĩ twamwĩraga atĩ nĩ tũkenaga nĩwe nĩ ũndũ wa maũndũ mega marĩa akoretwo agĩka ihinda ihĩtũku. Nĩ twamũtaaragĩria atĩ mahĩtia marĩa ekĩte matingĩthũkia rĩĩtwa rĩake angĩkorũo nĩ ehaarĩirie kũmarũnga na tũkamwĩra atĩ nĩ twĩhaarĩirie kũmũteithia amarũnge.”​—Daniel.

ŨTAARO WA BIBILIA: “Wendo nĩ ũrĩ wetereri na ũtugi.”​—1 Akorintho 13:4.