Wee ũĩ Aira a Jehova aigana? Amwe aitũ no makorũo nĩ andũ arĩa ũikaranagia nao, mũrutithanagia wĩra nao, kana arĩa mũthomaga nao. O na no tũkorũo twanateereta nawe ũhoro wa Bibilia. Ithuĩ nĩ ithuĩ a, na tũhunjagĩria andũ ũhoro ũrĩa twĩtĩkĩtie nĩkĩ?

Tũhaana o ta andũ arĩa angĩ. Tuumĩte mĩrerere-inĩ na mĩikarĩre ĩtiganĩte. Amwe aitũ maarĩ a ndini ingĩ, nao angĩ matietĩkĩtie Ngai. O na kũrĩ ũguo, tũtanatuĩka Aira a Jehova, o ũmwe witũ nĩ aahũthĩrire ihinda gũthuthuria morutani ma Bibilia na kinyi. (Atũmwo 17:11) Tũgĩtĩkania na ũrĩa twerutire, na o mũndũ agĩĩtuĩra itua rĩa gũthathaiya Jehova Ngai.

Kwĩruta Bibilia nĩ gũtũgunaga. O ta mũndũ ũngĩ o wothe, nĩ tũhiũranagia na mathĩna na mawathe maitũ ene. No nĩ ũndũ wa kwĩrutanĩria kũhũthĩra motaaro ma Bibilia ũtũũro-inĩ witũ wa o mũthenya, mũtũũrĩre witũ nĩ wagĩrĩte na njĩra nene. (Thaburi 128:​1, 2) Ũcio nĩ ũndũ ũmwe ũtũmaga tũhunjĩrie andũ arĩa angĩ maũndũ mega marĩa twĩrutĩte kuuma Bibilia-inĩ.

Tũtũũraga kũringana na ithimi cia Ngai. Ithimi icio, iria irutanagwo nĩ Bibilia, itũmaga tũgĩe na gĩkeno na tũtĩe andũ arĩa angĩ, o hamwe na kuonania ngumo ta wĩhokeku na ũtugi. Nĩ itũmaga tũtuĩke andũ mangĩĩhokeka na marĩ kĩyo, na igatũma famĩlĩ igĩe na ũrũmwe na ikorũo na mĩtugo mĩega. Kũmenya atĩ “Ngai ndarĩ mũthutũkanio,” gũtũmaga tũkorũo tũrĩ famĩlĩ ĩmwe ya kĩĩroho thĩ yothe, ĩtarĩ rũmena rwa gĩĩkabira kana gĩũteti. O na gũtuĩka tũhaana o ta andũ arĩa angĩ, tũrĩ andũ a mwanya.​—⁠Atũmwo 4:13; 10:​34, 35.

• Aira a Jehova mahaanaine na andũ arĩa angĩ na njĩra ĩrĩkũ?

• Aira a Jehova mamenyete ithimi irĩkũ nĩ ũndũ wa kwĩruta Bibilia?

Andũ aingĩ meciragia atĩ Aira a Jehova nĩ rĩĩtwa rĩa ndini njerũ. O na kũrĩ ũguo, mĩaka makĩria ma 2,700 mĩhĩtũku, ndungata cia Ngai ũrĩa ũmwe wa ma cietagwo “aira” ake. (Isaia 43:​10-12) Gũkinyĩria mwaka wa 1931, twetagwo Arutwo a Bibilia. Nĩ kĩĩ gĩatũmire twambĩrĩrie kũhũthĩra rĩĩtwa Aira a Jehova?

Nĩ rĩmenyithanagia Ngai witũ. Kũringana na maandĩko ma tene, rĩĩtwa rĩa Ngai, Jehova, rĩonekaga maita ngiri nyingĩ thĩinĩ wa Bibilia. Thĩinĩ wa Bibilia nyingĩ rĩĩtwa rĩu nĩ rĩeheretio hagekĩrũo marĩĩtwa ma ũnene ta Mwathani kana Ngai. Ĩndĩ, Ngai wa ma rĩrĩa eeguũrĩirie Musa na rĩĩtwa rĩake, Jehova, aamwĩrire ũũ: “Rĩu nĩrĩo rĩĩtwa rĩakwa tene na tene.” (Thama 3:15) Na njĩra ĩyo, akĩĩyonania atĩ we nĩ ngũrani na ngai ciothe cia maheeni. Nĩ twĩrahagĩra gwĩtanio na rĩĩtwa itheru rĩa Ngai.

Nĩ rĩonanagia wĩra ũrĩa tũrutaga. Andũ aingĩ a tene, nĩ maarutaga ũira wĩgiĩ wĩtĩkio wao harĩ Jehova, na wa mbere gwĩka ũguo arĩ Habili, mũndũ warĩ mũthingu. Mĩaka-inĩ ĩrĩa yarũmĩrĩire, Nuhu, Iburahimu, Sara, Musa, Daudi, hamwe na angĩ, nĩ moongererekire harĩ ‘itu rĩu inene rĩa aira.’ (Ahibirania 11:4–12:⁠1) O ta ũrĩa mũndũ angĩruta ũira igooti-inĩ nĩ ũndũ wa mũndũ ũtehĩtie-rĩ, nĩ twĩhotorete kũmenyithania ũhoro wa ma wĩgiĩ Ngai witũ.

Twĩgerekanagia na Jesu. Bibilia ĩmwĩtaga “mũira ũrĩa mwĩhokeku na wa ma.” (Kũguũrĩrio 3:14) Jesu we mwene ooigire atĩ nĩ ‘aamenyithirie andũ rĩĩtwa rĩa Ngai’ o akĩrutaga “ũira wĩgiĩ ũhoro ũrĩa wa ma” ũkoniĩ Ngai. (Johana 17:26; 18:37) Kwoguo, arũmĩrĩri a ma a Jesu no mũhaka metanio na rĩĩtwa rĩa Jehova na marĩmenyithanie. Ũguo ­nĩguo Aira a Jehova merutanagĩria gwĩka.

• Arutwo a Bibilia maambĩrĩirie kũhũthĩra rĩĩtwa Aira a Jehova nĩkĩ?

• Jehova akoretwo na aira thĩinĩ wa thĩ ihinda rĩigana atĩa?

• Nũũ Mũira ũrĩa mũnene wa Jehova?

Bibilia yarathĩte atĩ thutha wa gĩkuũ gĩa Kristo, arutani a maheeni nĩ mangĩeyumĩririe gatagatĩ-inĩ ka Akristiano a tene na mathũkie ma ya Bibilia. (Atũmwo 20:​29, 30) Thutha wa kahinda, ũguo noguo gwathiire. Maatukanirie ũrutani wa Jesu na morutani ma ndini cia maheeni, gũkĩgĩa Ũkristiano wa maheeni. (2 Timotheo 4:​3, 4) Tũngĩgĩa na ũũma atĩa atĩ ũmũthĩ tũrĩ na ũtaũku ũrĩa wagĩrĩire wĩgiĩ ũrĩa Bibilia ĩrutanaga kũna?

Ihinda rĩa Jehova kũguũria ma nĩ rĩakinyire. Jehova aarathĩte atĩ ‘ihinda rĩa mũthia ũmenyo ũrĩa wa ma nĩ ũngĩkaingĩha.’ (Danieli 12:⁠4) Mwaka-inĩ wa 1870, gakundi ka andũ maacaragia ũhoro wa ma nĩ gaataũkĩirũo atĩ morutani maingĩ ma kanitha matioimĩte Maandĩko-inĩ. Nĩ ũndũ ũcio, makĩambĩrĩria gwetha ũtaũku wa ũrutani ũrĩa wa ma wa Bibilia, na Jehova akĩmarathima na ũtaũku wa kĩĩroho..

Andũ maarĩ na ngoro njega nĩ maathuthuririe Bibilia na kinyi. Arutwo acio a Bibilia a mbere itũ arĩa maarĩ kĩyo, maahũthĩrire njĩra tũhũthagĩra o na ũmũthĩ ya kwĩruta Bibilia. Maaragĩrĩria ũrutani ũmwe wa Bibilia thutha wa ũrĩa ũngĩ. Mangĩacemanirie na mĩhari ya Bibilia mĩritũ gũtaũkĩrũo, maacaragia mĩhari ĩngĩ ĩtaarĩirie ũhoro ũcio. Mangĩerutire ũndũ ũratwarana na Maandĩko marĩa mangĩ, maacokaga makawandĩka. Na njĩra ĩyo ya kũreka Bibilia ĩĩtaũre yo nyene, nĩ maakinyĩrĩire kũmenya ma iria ciĩgiĩ rĩĩtwa rĩa Ngai, Ũthamaki wake, muoroto wake harĩ andũ na thĩ, ũrĩa akuũ matariĩ, na kĩĩrĩgĩrĩro kĩa ũriũkio. Ũthuthuria wao ũkĩmakũũra ũkombo-inĩ wa wĩtĩkio na mĩtugo ya kĩĩndini ya maheeni.​—⁠Johana 8:​31, 32.

Gũkinyĩria mwaka wa 1879, Arutwo a Bibilia nĩ maamenyire atĩ ihinda rĩa kũmenyithania ma kũndũ guothe rĩarĩ ikinyu. Kwoguo mwaka-inĩ ũcio, makĩambĩrĩria kũruta ngathĩti ya Mũrangĩri Yanagĩrĩra Ũthamaki wa Jehova, ĩrĩa tũcabaga nginya ũmũthĩ. Rĩu tũhunjagia ma cia Bibilia thĩinĩ wa mabũrũri 240 na thiomi makĩria ma 900. Gũtirĩ hĩndĩ ĩngĩ ũhoro wa ma ũrĩ watherema ũguo!

• Gwathiire atĩa ũhoro-inĩ wĩgiĩ ma ya Bibilia thutha wa gĩkuũ gĩa Kristo?

• Nĩ kĩĩ gĩtũhotithĩtie gũkinyĩrĩra kũmenya ma ĩrĩa ĩrĩ Kiugo-inĩ kĩa Ngai rĩngĩ?

Kwa ihinda rĩa mĩaka mĩingĩ, Aira a Jehova nĩ maahũthĩrĩte, magacaba, na magakinyĩria andũ Bibilia itiganĩte. No tũgĩcoka tũkĩona bata wa gũtaũra Bibilia njerũ ĩngĩteithia andũ makĩria kwĩruta “ũmenyo wa ma wĩgiĩ ũhoro wa ma,” tondũ ũcio nĩguo wendi wa Ngai harĩ andũ othe. (1 Timotheo 2:⁠3, 4) Kwoguo, mwaka-inĩ wa 1950 nĩ twambĩrĩirie kũruta icunjĩ cia Bibilia itũ ya New World Translation na rũthiomi rũrĩa rũrahũthĩka rĩu. Bibilia ĩyo ĩtaũrĩtwo na njĩra ya wĩhokeku na ĩtarĩ mahĩtia, na thiomi makĩria ma 160.

Nĩ kwabataranagia Bibilia hũthũ gũtaũkĩrũo. Thiomi nĩ igarũrũkaga thutha wa ihinda, na Bibilia nyingĩ ihũthĩrĩte ciugo itoĩkaine, kana nditũ gũtaũkĩrũo iria itigĩte kũhũthĩrũo. Ningĩ-rĩ, nĩ kuonekete maandĩko ma tene marĩa matarĩ na mahĩtia na makuhanĩrĩirie makĩria na maandĩko marĩa maandĩkirũo kĩambĩrĩria-inĩ, ũndũ ũrĩa ũtũmĩte thiomi cia Bibilia ta Kĩhibirania, Kĩaramu, na Kĩngiriki imenyeke wega.

Nĩ kwabataranagia Bibilia ĩtaũrĩtwo na wĩhokeku. Ataũri a Bibilia magĩrĩirũo kũrũmĩrĩra na wĩhokeku maandĩko marĩa maandĩkirũo kĩambĩrĩria-inĩ, handũ ha gũtaũra maandĩko ma Ngai marĩa matongoretio nĩ roho o ũrĩa mekwenda. O na kũrĩ ũguo, Bibilia-inĩ nyingĩ, rĩĩtwa rĩa Ngai, Jehova, rĩtihũthĩrĩtwo thĩinĩ wa Maandĩko Matheru.

Nĩ kwabataranagia Bibilia ĩragoocithia ũrĩa wamĩtungire. (2 Samueli 23:⁠2) Thĩinĩ wa New World Translation, rĩĩtwa rĩa Jehova nĩ rĩcoketio maita ta 7,000 kũrĩa rĩoonekaga thĩinĩ wa maandĩko ma tene biũ ma Bibilia o ta ũrĩa ngerekano ĩno ĩrĩ haha mũhuro yonanĩtie. (Thaburi 83:18) Nĩ ũndũ wa ũthuthuria ũrĩa wĩkĩtwo mĩaka mĩingĩ, andũ nĩ makenagĩra gũthoma Bibilia ĩno nĩ gũkorũo nĩ ĩtaaragĩria meciria ma Ngai na njĩra hũthũ. O na angĩkorũo ndũrĩ Bibilia ya New World Translation ya rũthiomi rwanyu, tũragwĩkĩra ngoro ũthomage Kiugo kĩa Jehova o mũthenya.​—⁠Joshua 1:8; Thaburi 1:​2, 3..

• Nĩ kĩĩ gĩatũmire tuone bata wa gũtaũra Bibilia njerũ?

• Nĩ ũndũ ũrĩkũ mwega mũndũ o wothe ũrenda kwĩruta wendi wa Ngai angĩĩmenyeria gwĩkaga o mũthenya?