Andũ aingĩ nĩ matigĩte gũthiĩ kanitha nĩ ũndũ wa kuona atĩ mathiĩ kuo matiũmagĩrĩrio na maticokagĩrio ciũria ciao cia bata. Gũkĩrĩ ũguo-rĩ, wagĩrĩirũo gũthiĩ mĩcemanio ya Aira a Jehova nĩkĩ? Nĩ maũndũ marĩkũ ũngĩkora mĩcemanio-inĩ ĩyo?

Gĩkeno gĩa gũkorũo gatagatĩ-inĩ ka andũ mendanĩte na marũmbũyanagia. Karine-inĩ ya mbere, Akristiano maabangĩtwo marĩ ciũngano na nĩ maakoragwo na mĩcemanio ya gũthathaiya Ngai, kwĩruta Maandĩko, na gwĩkĩrana ngoro. (Ahibirania 10:⁠24, 25) Marĩ mĩcemanio-inĩ ĩyo yakoragwo na wendo, nĩ maaiguaga atĩ marĩ na arata a ma, ariũ a Ithe wao a kĩĩroho. (2 Athesalonike 1:3; 3 Johana 14) Twĩkaga o ũguo meekaga, tũkagĩa na gĩkeno ta kĩrĩa maakoragwo nakĩo.

Ũguni ũrĩa uumanaga na kwĩruta kũrũmĩrĩra motaaro ma Bibilia. O ta ũrĩa gwatariĩ hĩndĩ ya Bibilia, athuri, atumia, na ciana, othe macemanagia hamwe. Arutani arĩa magĩrĩire mahũthagĩra Bibilia magatũteithia tũmenye ũrĩa tũngĩrũmĩrĩra ũtaaro wayo ũtũũro-inĩ witũ wa o mũthenya. (Gũcokerithia Maathani 31:12; Nehemia 8:⁠8) Andũ othe nĩ manyitaga itemi kũina, na gũcokia ciũria icunjĩ-inĩ cia ndeereti, tũkahota kũmenyithania kĩĩrĩgĩrĩro gitũ gĩa Gĩkristiano.​—⁠Ahibirania 10:⁠23.

Irathimo iria ciumanaga na gwĩkĩra hinya wĩtĩkio waku harĩ Ngai. Mũtũmwo Paulo eerire kĩũngano kĩmwe kĩa hĩndĩ yake ũũ: “Nĩ ndĩrerirĩria kũmuona, nĩguo . . . twĩkĩrane ngoro kũgerera wĩtĩkio wa o mũndũ, wanyu na wakwa.” (Aroma 1:⁠11, 12) Kuonana kaingĩ na Akristiano arĩa angĩ mĩcemanio-inĩ, nĩ gwĩkagĩra hinya wĩtĩkio witũ na itua ritũ rĩa gũtũũra ũrĩa Akristiano magĩrĩirũo.

Kaĩ ũtangĩũka mĩcemanio-inĩ itũ ya kĩũngano ĩrĩa ĩkũrũmĩrĩra nĩguo wĩyonere maũndũ macio wee mwene? Nĩ tũgaakũnyita ũgeni tũcanjamũkĩte. Mĩcemanio itũ ndĩrĩ marĩhi.

• Mĩcemanio itũ ya kĩũngano ĩrũmagĩrĩra kĩonereria kĩrĩkũ?

• Tũngĩgunĩka atĩa nĩ ũndũ wa gũthiĩ mĩcemanio ya Gĩkristiano?

O na tũngĩbatara gũtuĩkania mũtitũ mũtumanu, kũrĩ mbura kana riũa, no tũthiaga mĩcemanio-inĩ itũ ya Gĩkristiano tũtegũtĩrĩria. Aira a Jehova merutanagĩria ũguo nĩkĩ kũnyitanĩra na athathaiya arĩa angĩ, o na marĩ na mĩtangĩko ya ũtũũro na mĩnoga ya wĩra?

Nĩ ũteithio harĩ ithuĩ. Mũtũmwo Paulo akĩaria ũhoro wa arĩa tũnyitanagĩra nao kĩũngano-inĩ, ooigire “twĩciranagie mũndũ na ũrĩa ũngĩ.” (Ahibirania 10:24) Ũguo nĩ kuuga, “gwĩciria ũhoro wa mũndũ na kinyi,” kana kũmenyana ithuĩ ene. Kwoguo, ciugo icio cia mũtũmwo Paulo itwĩkĩraga ngoro twĩciragie arĩa angĩ. Rĩrĩa twamenyana na famĩlĩ ingĩ cia Gĩkristiano, tũkoraga atĩ amwe ao manatooria mathĩna o ta marĩa tũrĩ namo na no matũteithie gũtooria o na ithuĩ.

Nĩ gũtũmaga tũgĩe na ũrata wa gũtũũra. Arĩa tũkoragwo nao mĩcemanio-inĩ itũ nĩ arata aitũ a hakuhĩ, to andũ tũmenyanĩte tu. Rĩmwe na rĩmwe-rĩ, nĩ tũhũthagĩra mahinda hamwe maũndũ-inĩ mega ma gwĩkenia. Hihi kũnyitanĩra ũguo gũkoragwo na ũguni ũrĩkũ? Nĩ twĩrutaga gũtĩana mũndũ na ũrĩa ũngĩ, na ũndũ ũcio nĩ wĩkagĩra wendo witũ hinya. Kwoguo, rĩrĩa arata aitũ magĩa na thĩna, nĩ tũkoragwo twĩhaarĩirie kũmateithia tondũ tũkoragwo tũgĩĩte na ũrata mũrũmu. (Thimo 17:17) Rĩrĩa twanyitanĩra na andũ othe kĩũngano-inĩ gitũ, nĩ tuonanagia atĩ nĩ ‘tũrũmbũyanagia.’​—⁠1 Akorintho 12:​25, 26.

Tũgũkũũria ũthuure arĩa mareka wendi wa Ngai matuĩke arata aku. Nĩ ũkuona arata ta acio gatagatĩ-inĩ ka Aira a Jehova. Ndũgetĩkĩrie ũndũ o na ũrĩkũ ũkũgirie kũnyitanĩra na ithuĩ.

• Kũnyitanĩra hamwe mĩcemanio-inĩ gũkoragwo na ũguni harĩ ithuĩ nĩkĩ?

• Nĩ rĩ ũngĩenda gũceera kĩũngano-inĩ gitũ nĩguo ũtũmenye?

Mĩcemanio ya Akristiano a tene yakoragwo na nyĩmbo, mahoya, na gũthoma na kwarĩrĩria Maandĩko. (1 Akorintho 14:26) Ũguo noguo mĩcemanio itũ ĩkoragwo ĩhaana.

Ũrutani ũrĩa ũkoragwo kuo wĩhocetie harĩ Bibilia na nĩ ũtũgunaga. Mũthia-inĩ wa kiumia, o kĩũngano nĩ gĩcemanagia gũthikĩrĩria mĩario ya Bibilia ya ndagĩka 30 ĩrĩa yonanagia ũrĩa Maandĩko makonainie na ũtũũro witũ na mahinda marĩa tũratũũra. Ithuothe nĩ tũũragio tũrũmanĩrĩre na ũrĩa ũraruta mĩario tũrĩ na Bibilia citũ. Thutha wa mĩario ĩyo, gũkoragwo na Wĩruti wa “Mũrangĩri” wa ithaa rĩmwe, na hĩndĩ ĩyo andũ othe kĩũngano-inĩ nĩ maheagwo mweke wa gũcokia ciũria makĩarĩrĩria gĩcunjĩ kĩmwe ngathĩti-inĩ ya wĩruti ya Mũrangĩri. Ndeereti ĩyo nĩ ĩtũteithagia kũhũthĩra ũtaaro wa Bibilia ũtũũro-inĩ witũ. Ũhoro o ũcio nĩ wĩrutagwo ciũngano-inĩ citũ ciothe makĩria ma 120, 000 thĩinĩ wa thĩ.

Nĩ tũteithagio kwagĩria ũhoti witũ wa kũrutana. Ningĩ nĩ tũcemanagia hamwe mũthenya ũmwe gatagatĩ-inĩ ga kiumia nĩ ũndũ wa mũcemanio ũkoragwo na icunjĩ ithatũ wĩtagwo Ũtũũro na Ũtungata Witũ wa Gĩkristiano, ũrĩa ũkoragwo wĩhocetie harĩ Kabuku ka Mũcemanio wa Ũtũũro na Ũtungata karĩa karutagwo o mweri. Gĩcunjĩ kĩa mbere kĩa mũcemanio ũcio gĩtagwo Mũthithũ Kuuma Kiugo-inĩ kĩa Ngai, na nĩ gĩtũteithagia gũtaũkĩrũo wega nĩ gĩcunjĩ kĩa Bibilia kĩrĩa kĩũngano kĩambĩte gũthoma kabere. Thutha ũcio nĩ gĩcunjĩ kĩa Wĩrutanĩrie Biũ Ũtungata-inĩ, kĩrĩa gĩkoragwo na cionereria cia ũrĩa tũngĩarĩrĩria Bibilia na andũ angĩ. Nĩ gũkoragwo na mũtaarani ũratũrora nĩguo atũteithie kwagĩria mũthomere na mũrutanĩre witũ. (1 Timotheo 4:13) Gĩcunjĩ kĩa mũthia nĩ kĩa Ũtũũro wa Gĩkristiano, na kĩonanagia ũrĩa tũngĩhũthĩra ũtaaro wa Bibilia ũtũũro-inĩ witũ wa o mũthenya. Ningĩ nĩ gĩkoragwo na ndeereti ya ciũria na macokio ĩrĩa ĩtũteithagia gũtaũkĩrũo nĩ Bibilia makĩria.

Rĩrĩa ũrĩũka mĩcemanio-inĩ itũ, hatarĩ nganja nĩ ũrĩkenio nĩ gĩthomo kĩega kĩa Bibilia kĩrĩa ũrĩamũkĩra.​—⁠Isaia 54:⁠13.

• Nĩ maũndũ marĩkũ ũngĩĩrĩgĩrĩra kũigua mĩcemanio-inĩ ya Aira a Jehova?

• Nĩ mũcemanio ũrĩkũ witũ wa o kiumia ũngĩenda gũka?

Hihi nĩ ũrorete mbica iria irĩ kabuku-inĩ gaka ũkona ũrĩa Aira a Jehova mehumbaga wega rĩrĩa marathiĩ mĩcemanio-inĩ yao? Nĩ kĩĩ gĩtũmaga tũrore mũno mwĩhumbĩre na ũtheru witũ?

Nĩguo tuonie Ngai witũ gĩtĩo. Nĩ ma Ngai ndaroraga o ũrĩa mũndũ ahaana na nja tu. (1 Samueli 16:⁠7) O na kũrĩ ũguo-rĩ, rĩrĩa twacemania nĩguo tũmũthathaiye, muoroto witũ ũkoragwo ũrĩ kuonania atĩ nĩ tũmũtĩĩte na tũgatĩa arĩa tũthathayagia nao. Tũngĩtuĩka nĩ tũgũthiĩ mbere ya mũciirithania igooti-inĩ, kwahoteka no twĩhumbe wega nĩ ũndũ wa gũtĩa ũnene wake. No taguo mwĩhumbĩre witũ tũgĩthiĩ mĩcemanio wonanagia gĩtĩo kĩrĩa tũheete “Mũtuanĩri Ciira wa thĩ yothe,” Jehova Ngai, hamwe na harĩa tũmũthathayagĩria.​—⁠Kĩambĩrĩria 18:⁠25.

Nĩguo tuonanie ithimi iria tũrũmagĩrĩra ũtũũro-inĩ. Bibilia ĩraga Akristiano mehumbage “mategũkĩria njano, na marĩ na meciria mega.” (1 Timotheo 2:​9, 10) Kwĩhumba “mategũkĩria njano” nĩ kuuga gwĩthema nguo cia kwĩyonania, irĩ na thoni kana ironania mwĩrĩ. Nakuo gũkorũo na “meciria mega” gũtũteithagia gũthuura nguo njega tũkaaga kwĩhumbania o ũguo kana gũkĩria njano. Ũtaaro ũcio nĩ ũtũheaga mweke mũnene wa gwĩthuurĩra ithuĩ ene. O na tũtekwaria, mwĩhumbĩre mwega nĩ ‘ũgoocithagia ũrutani wa Ngai, o we Mũhonokia witũ,’ na ‘ũkamũgoocithia.’ (Tito 2:10; 1 Petero 2:12) Kwoguo kwĩhumba wega rĩrĩa tũrathiĩ mĩcemanio gũtũmaga andũ arĩa angĩ magĩe na mawoni mega megiĩ ũthathaiya wa Jehova.

Ndũkareke nguo igirie ũũke mĩcemanio iitũ Nyũmba-inĩ ya Ũthamaki. Nguo citũ itirabatara gũkorũo irĩ cia goro kana cia mwanya, nĩguo ikorũo irĩ theru na njagĩrĩru.

• Mwĩhumbĩre witũ nĩ wa bata na gĩkĩro kĩrĩkũ tũgĩthathaiya Ngai?

• Nĩ motaaro marĩkũ matũtongoragia mwĩhumbĩre-inĩ witũ?

Angĩkorũo nĩ ũreruta Bibilia na Mũira wa Jehova, nĩ ũhũthũ ũkorũo nĩ ũgeragia kũhaarĩria ũhoro ũrĩa mũgũthoma mbere ya hĩndĩ ya kwĩruta. Nĩguo ũgunĩke makĩria, nĩ wega gwĩka o taguo mbere ya gũthiĩ mĩcemanio ya kĩũngano. Nĩ tũgĩaga na moimĩrĩro mega makĩria twemenyeria gwĩkaga ũguo.

Banga rĩrĩa ũrĩthomaga na harĩa ũrĩthomagĩra. Nĩ ihinda rĩrĩkũ ũhotaga kũnyita ũhoro wega makĩria? Hihi nĩ rũcinĩ tene, mbere ya kwambĩrĩria wĩra waku wa o mũthenya, kana nĩ hwaĩ-inĩ, thutha wa ciana gũkoma? O na angĩkorũo ndũngĩhota gũthoma ihinda iraihu, banga nĩ ihinda rĩigana atĩa ũngĩenda kũhũthĩra, na ndũkareke ũndũ o na ũrĩkũ ũkũhĩnge. Caria handũ hahooreru na weherie indo iria ciothe ingĩkũhĩngĩca, ũhorie redio, TV, na thimũ. Kũhoya mbere ya kwĩruta nĩ gũgũgũteithia kweheria mĩtangĩko ya mũthenya ũcio meciria-inĩ nĩguo ũhote kũiga meciria harĩ Kiugo kĩa Ngai.​—⁠Afilipi 4:​6, 7.

Haarĩria ũhoro ũrĩa ũgaathomwo, na wĩhaarĩrie gũcokia. Amba ũmenye kĩrĩa kĩraarĩrĩrio nĩ ũhoro ũcio ũrĩ wothe. Wĩcirie ũhoro wa kĩongo kĩnene gĩa gĩcunjĩ kĩu, ũrore ũrĩa o kĩongo kĩnini gĩkonainie na kĩongo kĩnene, na ũrore mbica iria irĩ ho na ciũria cia gũcokera iria itĩtĩrithĩtie maũndũ marĩa manene. Ũcoke ũthome o kĩbungo, ũgĩethaga macokio ma kĩũria kĩrĩa gĩcabĩtwo. Humbũria na ũthome maandĩko marĩa monanĩtio, na wĩcirie ũrĩa maratwarana na ũhoro ũcio. (Atũmwo 17:11) Wona macokio ma kĩũria kĩu, kururĩra kana wĩkĩre rũũri ciugo cigana ũna kĩbungo-inĩ kĩu, iria igũgũteithia kũririkana macokio macio. Thutha-inĩ, hĩndĩ ya mũcemanio, ũngĩenda no woe guoko na ũcokie na njĩra nguhĩ ũkĩhũthĩra ciugo ciaku mwene.

Ũngĩthuthuria maũndũ matiganĩte marĩa maragĩrĩrio thĩinĩ wa mĩcemanio o kiumia, nĩ ũkuongerera maũndũ merũ “mũthithũ-inĩ” waku wa ũmenyo wa Bibilia.​—⁠Mathayo 13:​51, 52.

• Ũngĩbanga mũbango ũrĩkũ wa kũhaaragĩria mĩcemanio?

• Ũngĩĩhaarĩria atĩa gũcokia mĩcemanio-inĩ?

Kuuma o mahinda ma tene, Jehova akoretwo akĩenda famĩlĩ ihũthagĩre mahinda hamwe, nĩguo igĩe na ũrata wa hakuhĩ hamwe nake na ikorũo na ũrũmwe. (Gũcokerithia Maathani 6:​6, 7) Nĩkĩo Aira a Jehova macaragia ihinda hwaĩ-inĩ ũmwe o kiumia nĩgetha mathathaiye marĩ famĩlĩ, makaarĩrĩria maũndũ ma kĩĩroho marĩa maringaine na mabataro mao na njĩra ĩhooreire. O na angĩkorũo ũikaraga wĩ wiki, no ũhũthĩre ihinda ta rĩu hamwe na Ngai ũkĩĩruta ũndũ wĩthuurĩire kuuma Bibilia-inĩ.

Nĩ ihinda rĩa gũkuhĩrĩria Jehova makĩria. “Kuhĩrĩriai Ngai, nake nĩ ekũmũkuhĩrĩria.” (Jakubu 4:⁠8) Nĩ tũmenyaga Jehova wega rĩrĩa tweruta ũhoro wĩgiĩ ũrĩa atariĩ na ciĩko ciake kũgerera Bibilia. Njĩra ĩmwe hũthũ ya kwambĩrĩria ũthathaiya wa famĩlĩ nĩ kũhũthĩra ihinda gũthoma Bibilia na mũgambo mũrĩ hamwe, hihi mũkĩrũmĩrĩra mũtaratara wa o kiumia wa Mũcemanio wa Ũtũũro na Ũtungata. O mũndũ thĩinĩ wa famĩlĩ no agaĩrũo gacunjĩ ga gũthoma kuuma gĩcunjĩ-inĩ kĩu, andũ othe macoke marĩrĩrie ũndũ ũrĩa meruta kuuma maandĩko-inĩ macio.

Nĩ ihinda rĩa andũ thĩinĩ wa famĩlĩ kũgĩa na ũrata wa hakuhĩ. Athuri na atumia, o ũndũ ũmwe na aciari na ciana, nĩ mekĩraga hinya ũrata wao rĩrĩa meruta Bibilia marĩ famĩlĩ. Ihinda rĩu rĩagĩrĩirũo gũkorũo rĩrĩ rĩa gĩkeno, thayũ, na rĩa kwĩrirĩrio nĩo othe o kiumia. Aciari no mathuure ũndũ mwega wa kwarĩrĩria, kũringana na mĩaka ya ciana ciao, rĩngĩ makĩhũthĩra ũndũ ũrĩ thĩinĩ wa Mũrangĩri na mabuku-inĩ mangĩ kana kuuma website itũ ya jw.org/ki. No mwarĩrĩrie thĩna ũmwe ciana cianyu iracemania naguo cukuru na ũrĩa cingĩhiũrania naguo. O na no mwĩrorere programu ĩrĩ thĩinĩ wa JW Broadcasting (tv.jw.org/ki) na mũmĩarĩrĩrie. No mũkenere kwĩmenyeria nyĩmbo iria ikainwo mĩcemanio-inĩ na mũkorũo na kĩndũ mũngĩrĩanĩra thutha wa ũthathaiya wa famĩlĩ.

Ihinda rĩu rĩa mwanya andũ mahũthagĩra hamwe gũthathaiya Jehova o kiumia nĩ rĩgũteithia famĩlĩ yothe ĩkenere kwĩruta Kiugo kĩa Ngai, nake nĩ ekũrathima kĩyo kĩanyu mũno.​—⁠Thaburi 1:​1-3.

• Nĩ kĩĩ gĩtũmaga tũcarie mahinda ma gwĩka ũthathaiya wa famĩlĩ?

• Aciari mangĩka atĩa nĩguo andũ othe thĩinĩ wa famĩlĩ makenere mũbango ũcio?

Andũ aya maroneka makenete ũguo nĩkĩ? Marĩ kĩgomano-inĩ kĩmwe gitũ. O ta ũrĩa ndungata cia Ngai cia tene ciaathĩtwo igomanage maita matatũ o mwaka, nĩ tũkenagĩra mũno gũcemania igomano-inĩ nene. (Gũcokerithia Maathani 16:16) O mwaka, tũkoragwo na igomano ithatũ: igomano igĩrĩ cia mũthiũrũrũko cia mũthenya ũmwe na kĩgomano gĩa thikũ ithatũ. Tũgunĩkaga atĩa kuumana na igomano icio?

Nĩ ciĩkĩraga hinya ngwatanĩro itũ ya Gĩkristiano. O ta ũrĩa Aisiraeli maakenagĩra kũgooca Jehova “thĩinĩ wa igomano,” no taguo tũkenagĩra kũmũthathaiya tũrĩ hamwe mahinda-inĩ macio ma mwanya. (Thaburi 26:​12, kohoro ka magũrũ-inĩ; 111:1) Igomano icio itũheaga mweke wa gũcemania na kũnyitanĩra na Aira a Jehova a ciũngano ingĩ o na kana a mabũrũri mangĩ. Ihinda rĩa mĩaraho, tũrĩanagĩra hamwe kũu kĩgomano-inĩ na ũndũ ũcio ũkongerera gĩkeno kĩrĩa gĩkoragwo kuo ihinda-inĩ rĩu rĩa maũndũ ma kĩĩroho. (Atũmwo 2:42) Tũrĩ kũu nĩ twĩyonagĩra wendo ũrĩa ũnyitithanĩtie “thiritũ yothe ya ariũ a Ithe witũ” thĩinĩ wa thĩ.​—⁠1 Petero 2:⁠17.

Nĩ itũteithagia gũkũra kĩĩroho. Aisiraeli ningĩ nĩ maagunĩkaga tondũ nĩ ‘maataũkagĩrũo nĩ ciugo’ cia Maandĩko marĩa maataaragĩrio. (Nehemia 8:​8, 12) O na ithuĩ nĩ tuonaga ũrutani wa Bibilia ũrĩa twamũkagĩra igomano-inĩ citũ ũrĩ wa bata. Igomano icio ciothe ikoragwo ciĩhocetie Maandĩko-inĩ. Nĩ twĩrutaga ũrĩa tũngĩka wendi wa Ngai ũtũũro-inĩ witũ, kũgerera mĩario ya gũcanjamũra, mĩario ĩrũmanĩrĩire, na cionereria cia maũndũ maanekĩka. Nĩ twĩkagĩrũo ngoro rĩrĩa twaigua ũhoro wa cionereria cia andũ matooretie mathĩna marĩa mokaga nĩ ũndũ wa mũndũ gũkorũo arĩ Mũkristiano matukũ-inĩ maya maritũ. Igomano-inĩ cia thikũ ithatũ, video nĩ itũteithagia gũtaũkĩrũo ũrĩa maũndũ maatariĩ matukũ-inĩ ma Bibilia na igatũruta maũndũ marĩ na ũguni. O kĩgomano, nĩ kũbatithagio arĩa marenda kuonania wĩyamũrĩri wao harĩ Ngai.

• Igomano ikoragwo irĩ mahinda ma gĩkeno nĩkĩ?

• Ũngĩgunĩka atĩa ũngĩthiĩ kĩgomano?

Jesu ooigire ũũ kahinda kanini mbere ya gĩkuũ gĩake: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.” (Mathayo 24:14) No wĩra ũcio wa kũhunjia thĩ yothe ũngĩarutirũo atĩa? Nĩ na njĩra ya kũrũmĩrĩra kĩonereria kĩrĩa Jesu aaigire rĩrĩa aarĩ gũkũ thĩ.​—⁠Luka 8:⁠1.

Twĩrutanagĩria gũceerera andũ mĩciĩ-inĩ yao. Jesu nĩ aamenyeririe arutwo ake kũhunjia ũhoro ũrĩa mwega nyũmba kwa nyũmba. (Mathayo 10:​11-13; Atũmwo 5:42; 20:20) Ahunjia acio a injiri a karine ya mbere nĩ maagaĩirũo icigo cia kũhunjia. (Mathayo 10:​5, 6; 2 Akorintho 10:13) Ũmũthĩ o naguo, wĩra witũ wa kũhunjia nĩ ũbangĩtwo wega, na o kĩũngano gĩkagaĩrũo gĩcigo gĩakĩo gĩa kũhunjia. Ũndũ ũcio ũtũhotithagia kũhingia watho ũrĩa Jesu aatũheire wa atĩ “tũhunjĩrie andũ na tũrute ũira kĩhinyio.”​​—⁠Atũmwo 10:⁠42.

Twĩrutanagĩria gũkinyĩria andũ ndũmĩrĩri kũrĩa guothe mangĩoneka. Jesu ningĩ nĩ aaigire kĩonereria na njĩra ya kũhunjĩria andũ marĩ kũndũ kwa mũingĩ, ta hũgũrũrũ-inĩ cia iria kana hakuhĩ na gĩthima kĩa maĩ gĩa itũũra. (Mariko 4:1; Johana 4:​5-15) O na ithuĩ twaragia na andũ ũhoro wa Bibilia kũrĩa guothe tũngĩhota​—⁠barabara-inĩ, kũndũ kwa biacara, gwa kũhurũka, kana tũkahũthĩra thimũ. Ningĩ nĩ tũhunjagĩria arĩa marĩ itũũra ritũ, andũ arĩa tũrutaga wĩra nao, arĩa tũthomaga nao, na andũ aitũ a famĩlĩ rĩrĩa twagĩa na mweke mwega. Njĩra icio ciothe nĩ ihotithĩtie andũ milioni nyingĩ thĩinĩ wa thĩ maigue “ũhoro mwega wa ũhonokio.”​—⁠Thaburi 96:⁠2.

Hihi nĩ ũkuona ta harĩ andũ ũngĩhunjĩria ũhoro mwega wa Ũthamaki wa Ngai, na ũmonie ũrĩa ũhoro ũcio ũhutanĩtie na ihinda rĩao rĩrĩa rĩũkĩte? Ndũkage kũmamenyithia ũhoro ũcio wa kũmahe kĩĩrĩgĩrĩro. Aria nao igũrũ rĩaguo na ihenya o ũrĩa kũngĩhoteka!

• “Ũhoro mwega” ũrĩa arĩ o mũhaka ũhunjio nĩ ũrĩkũ?

• Aira a Jehova marũmagĩrĩra atĩa njĩra ya Jesu ya kũhunjia?

Kaingĩ kiugo “painia” kĩhũthagĩrũo kuonania andũ arĩa matuĩragia kũndũ kũgeni na magatemera angĩ njĩra. Jesu aarĩ o ta painia, tondũ aatũmirũo gũkũ thĩ ahingie ũtungata wa kũrehera andũ muoyo na kũmahingũrĩra njĩra ya kũhonoka. (Mathayo 20:28) Ũmũthĩ arũmĩrĩri ake megerekanagia nake na njĩra ya kũhũthĩra mahinda maingĩ o ũrĩa mangĩhota ‘gũtua andũ arutwo.’ (Mathayo 28:⁠19, 20) Amwe ao nĩ mahotete kũingĩra ũtungata-inĩ ũrĩa twĩtaga wa ũpainia.

Painia nĩ mũndũ ũhunjagia mahinda mothe. Aira a Jehova othe nĩ ahunjia a ũhoro ũrĩa mwega. O na kũrĩ ũguo, amwe nĩ mabangĩte maũndũ mao nĩguo matungate marĩ mapainia a hĩndĩ ciothe, makahũthagĩra mathaa 70 o mweri wĩra-inĩ wa kũhunjia. Nĩguo mahote gwĩka ũguo, aingĩ mahũthagĩra mahinda manini kũruta mawĩra mao. Angĩ nao nĩ mathuuragwo matungate marĩ mapainia a mwanya icigo-inĩ iria irĩ na bata mũnene wa ahunjia a Ũthamaki, makahũthĩra mathaa 130 kana makĩria o mweri ũtungata-inĩ. Mapainia nĩ maiganagĩra na gũikara mũtũũrĩre mũhũthũ, mehokete atĩ Jehova nĩ arĩmahingagĩria mabataro mao. (Mathayo 6:​31-33; 1 Timotheo 6:⁠6-8) Arĩa matangĩhota gũtuĩka mapainia a hĩndĩ ciothe no matungate marĩ mapainia a gũteithĩrĩria mangĩhota, makahũthĩra mathaa 30 kana 50 o mweri makĩhunjia.

Wendo wa Painia harĩ Ngai na harĩ andũ nĩguo ũtũmaga atungate. O ta Jesu nĩ tuonaga atĩ ũmũthĩ andũ aingĩ nĩ marabatara mũno kũmenya Ngai na muoroto wake. (Mariko 6:34) Ĩndĩ tũrĩ na ũmenyo ũngĩmateithia ihinda-inĩ rĩrĩ, magĩe na kĩĩrĩgĩrĩro kĩrũmu kĩa ihinda rĩũkĩte. Kwenda andũ arĩa angĩ nĩkuo gũtũmaga painia erutĩre kũhũthĩra mahinda na hinya wake eyendeire nĩguo ateithie andũ arĩa angĩ mamenye ũhoro ũrĩa mwega. (Mathayo 22:39; 1 Athesalonike 2:⁠8) Ũndũ ũcio ũgatũma wĩtĩkio wake ũgĩe na hinya, agakuhĩrĩria Ngai makĩria, na akagĩa na gĩkeno kĩingĩ.​—⁠Atũmwo 20:⁠35.

• Painia nũũ?

• Nĩ kĩĩ gĩtũmaga amwe matuĩke mapainia a hĩndĩ ciothe?

Aira a Jehova nĩ makoretwo magĩĩkĩrĩra mũno gĩthomo gĩa gĩtheokrasi. Arĩa merutagĩra kũhũthĩra mahinda mao mothe wĩra-inĩ wa kũhunjia ũhoro wa Ũthamaki, nĩ maheagwo gĩthomo kĩa mwanya nĩguo ‘mahingie ũtungata wao biũ.’​—⁠2 Timotheo 4:⁠5.

Cukuru ya Ũtungata wa Ũpainia. Mũndũ angĩtungata arĩ painia kwa ihinda rĩa mwaka ũmwe, nĩ acokaga agetwo cukuru ya thikũ ithathatũ, hihi Nyũmba-inĩ ya Ũthamaki ĩrĩa ĩrĩ hakuhĩ. Muoroto wa cukuru ĩno nĩ gũteithia painia akuhĩrĩrie Jehova makĩria, amenye wega kũhũthĩra njĩra itiganĩte cia kũhunjia, na athiĩ na mbere gũtungata arĩ mwĩhokeku.

Cukuru ya Ahunjia a Ũthamaki. Cukuru ĩno ya mĩeri ĩĩrĩ ĩthondeketwo nĩguo ĩteithie mapainia arĩa marĩ na ũmenyeru, arĩa mehaarĩirie gũthaama kwao magatungate kũrĩa guothe mangĩbatarania. Nĩ ta makoragwo makiuga, “Niĩ ũyũ haha! Ndũma!” makĩĩgerekania na Jesu Kristo, Mũhunjia ũrĩa mũnene wanatungata gũkũ thĩ. (Isaia 6:​8; Johana 7:​29) Gũthaamĩra kũnene na mũciĩ no gũtũme mũndũ abatare kũhũthahũthia mũtũũrĩre wake. Maũndũ ta ũndũire, rĩera, na irio no makorũo marĩ ngũrani mũno na marĩa amenyerete. O na no abatare kwĩruta rũthiomi rwerũ. Cukuru ĩno ĩteithagia aarĩ na ariũ a Ithe witũ a gatagatĩ ka mĩaka 23 nginya 65, arĩa matarĩ kĩhiko-inĩ o hamwe na arĩa marĩ kĩhiko-inĩ, makũrie ngumo iria irabatarania wĩra-inĩ ũrĩa mekwĩhokerũo na magĩe na ũmenyeru ũrĩa ũngĩmateithia kũhũthĩrũo makĩria nĩ Jehova na ithondeka rĩake.

Cukuru ya Bibilia ya Gileadi. Kiugo gĩa Kĩhibirania kĩrĩa gĩtaũrĩtwo “Gileadi” nĩ kĩhutanĩtie na kiugo “Ũira.” Kuuma rĩrĩa cukuru ĩno yaambĩrĩirie mwaka-inĩ wa 1943, aarĩ na ariũ a Ithe witũ makĩria ma 8,000 arĩa mathiĩte cukuru ĩno nĩ matũmĩtwo marĩ amishonarĩ nĩguo marute ũira nginya “ituri-inĩ cia thĩ,” na nĩ magĩĩte na moimĩrĩro mega. (Atũmwo 13:47) Hĩndĩ ĩrĩa amishonarĩ kuuma cukuru-inĩ ĩyo maakinyire rĩa mbere bũrũri-inĩ wa Peru, gũtiarĩ na kĩũngano o na kĩmwe. Rĩu kũrĩ na ciũngano makĩria ma 1,000. Rĩrĩa amishonarĩ maambĩrĩirie kũhunjia Japan, kwarĩ na Aira a Jehova matakinyĩte ikũmi. No rĩu nĩ makĩria ma 200,000. Gĩthomo-inĩ kĩu kĩa Gileadi kĩa mĩeri ĩtano, arutwo nĩ merutaga Kiugo kĩa Ngai na njĩra ndikĩru. Arĩa matungataga marĩ mapainia a mwanya, arĩa marĩ wabici-inĩ cia honge, wĩra-inĩ wa mũthiũrũrũko, kana amishonarĩ arĩa marĩ ũtungata-inĩ wa kũhunjia, nĩ metagwo cukuru ĩno nĩguo mamenyerio mahote gũtiirĩrĩra na gwĩkĩra hinya wĩra wa kũhunjia thĩ yothe.

• Muoroto wa Cukuru ya Ũtungata wa Ũpainia nĩ ũrĩkũ?

• Nĩa mahaarĩrĩirio Cukuru ya Ahunjia a Ũthamaki?