Ũmotho: Famĩlĩ ya Betheli ya Brooklyn yakũngũĩire Krismasi ya mũico mwaka wa 1926; Ũrĩo: Andũ nĩ monaga atĩ Aira a Jehova makoragwo marĩ ngũrani
GĨCIGO GĨA 3
Ithimi cia Ũthamaki—Gũcaria Ũthingu wa Ngai
TA WĨCIRIE ũndũ ũyũ: Mũthenya ũmwe ũkiuma mũciĩ, ũkageithia mũndũ ũrĩa mũriganĩtie nake. Nĩ wonete atĩ nĩ akoretwo agĩkũbaara mũno hamwe na famĩlĩ yanyu. Akageithĩka agacoka agagwĩta. Agakwĩra ũũ: “Ngũũrie kĩũria? Nĩ kĩĩ gĩtũmaga mũkorũo mũrĩ ngũrani na andũ arĩa angĩ?” Nawe ũkamũũria atĩrĩ: “Ũrenda kuuga atĩa?” Agagũcokeria ũũ: “Na githĩ inyuĩ mũtirĩ Aira a Jehova? Mũtihaana ta andũ arĩa angĩ. Maũndũ manyu matihaana ta ma ndini iria ingĩ tondũ mũtikũngũyagĩra thigũkũ, mũtiĩingĩragia ũteti-inĩ kana mbaara-inĩ. Ningĩ mũtinyuaga thigara. Na famĩlĩ yanyu yonekaga ĩrĩ na mĩtugo mĩega mũno. Nĩ kĩĩ gĩtũmaga mũkorũo mũrĩ ngũrani na njĩra nyingĩ ũguo?”
Nĩ ũũĩ wega macokio ma kĩũria kĩu: Ithuĩ tũkoragwo tũrĩ rungu rwa wathani wa Ũthamaki wa Ngai. Jesu arĩ we Mũthamaki, aikaraga agĩtũtheragia. Nĩ atũteithagia kũrũmĩrĩra makinya make, nĩ ũndũ ũcio tũgakorũo tũrĩ ngũrani na andũ a thĩ ĩno njũru. Thĩinĩ wa gĩcigo gĩkĩ, nĩ tũkuona ũrĩa Mũthamaki wa Kĩĩmesia akoretwo agĩtheria andũ a Ngai kĩĩroho, kĩĩmĩtugo, na mĩĩkĩre-inĩ yao ya maũndũ nĩguo Jehova agoocithio.