Ũhootani wa Ũthamaki​—Kũrũĩrĩra Ũhoro Ũrĩa Mwega Kĩĩwatho

TA TUA nĩ kũhunjia mũrahunjia nyũmba kwa nyũmba, mũgacoka mũkaigua kĩngʼora kĩa ngaari ya borithi gĩkĩgamba kĩrĩ haraihu. Mũgambo ũcio ũgathiĩ ũgĩkuhagĩrĩria. Wambĩrĩria kwaria na mwene nyũmba ĩyo ĩngĩ, ũrĩa mũrahunjia nake akehũgũra ona ngaari ya borithi. Mũthigari akoima arorete na kũrĩa mũrĩ, akamũũria ũũ: “Inyuerĩ nĩ inyuĩ mũrathiĩ nyũmba kwa nyũmba mũkĩaragia na andũ ũhoro wa Bibilia? Andũ nĩ makoretwo makĩnegena nĩ ũndũ wanyu!” Mũkamũcokeria mũrĩ na gĩtĩo, na mũkamwĩra atĩ mũrĩ Aira a Jehova. Nĩ ũndũ ũrĩkũ ũgũcoka ũrũmĩrĩre?

Ũndũ ũrĩa ũkũrũmĩrĩra wĩhocetie harĩ maũndũ marĩa mahĩtũku. Hihi thirikari ya kwanyu ĩkoretwo ĩkĩhiũrania atĩa na Aira a Jehova mĩaka-inĩ ĩrĩa mĩhĩtũku? Hihi nĩ kũrĩ na wĩyathi wa ũthathaiya? Angĩkorũo nĩ kũrĩ wĩyathi ũcio, kwahoteka nĩ tondũ wa ũrĩa aarĩ na ariũ a Ithe witũ makoretwo makĩĩrutanĩria “kũrũĩrĩra Ũhoro-Ũrĩa-Mwega, o na . . . kũwĩkĩra hinya” kĩĩwatho. (Afil. 1:7) Gũtekũmakania kũrĩa ũikaraga, gwĩcũrania ũhoro wĩgiĩ ũhootani wa Aira a Jehova macira-inĩ nĩ gwĩkĩraga hinya wĩtĩkio witũ. Gĩcigo-inĩ gĩkĩ, nĩ tũgũthuthuria ũhoro wa mamwe ma macira macio. Ũhootani witũ macira-inĩ wonanagia wega atĩ Ũthamaki wĩ kuo, nĩ ũndũ tũtingĩhotete kũhingia maũndũ macio mothe na hinya witũ!