Ũhoro wa ma Wĩgiĩ Ũthamaki​—Kũheana Irio cia Kĩĩroho

NO GŨKORŨO wanona mũrutwo waku wa Bibilia acanjamũkĩte nĩ ũndũ wa gũtaũkĩrũo nĩ rĩandĩko rĩrĩa mwathoma nake. Agacoka agakũũria ũũ ahoreire: “Ũrenda kuuga Bibilia yugaga atĩ nĩ tũgaatũũra thĩinĩ wa Paradiso tene na tene gũkũ thĩ?” Mũhunjia ũrĩa mũrĩ nake akamũũria ũũ acanjamũkĩte: “Wee wanyita atĩa kũringana na ũrĩa twathoma Bibilia-inĩ?” Nake mũrutwo akainia mũtwe ategwĩtĩkia, agacoka akoiga, “Ndiretĩkia atĩ ndirĩ ndarutwo ũndũ ta ũyũ!” Ũkaririkana atĩ nĩ oigĩte ũndũ ta ũcio ciumia cigana ũna hĩtũku rĩrĩa aamenyire rĩa mbere atĩ Ngai etagwo Jehova.

Hihi wee waneyonera ũndũ ta ũcio? Ndungata nyingĩ cia Ngai nĩ ciĩyoneire. Ũndũ ũcio nĩ ũtũririkanagia wega kĩheo gĩa bata kĩrĩa tũheetwo gĩa kũmenya ũhoro wa ma. Ta kira hanini wĩyũrie atĩrĩrĩ, wahotire atĩa kũgĩa na kĩheo kĩu? Nĩ tũgũthuthuria kĩũria kĩu thĩinĩ wa gĩcigo gĩkĩ. Ũtheri wa kĩĩroho ũrĩa andũ a Ngai mathiĩte makĩheagwo, nĩ ũira mũiganu wa atĩ Ũthamaki wa Ngai nĩ thirikari ya biũ. Kwa ihinda rĩa mĩaka 100, Mũthamaki waguo Jesu Kristo, akoretwo akĩĩrutanĩria mũno gũtigĩrĩra atĩ andũ a Ngai nĩ mararutwo ũhoro wa ma.