Kũhunjia Ũhoro wa Ũthamaki​—Gũtheremia Ũhoro Mwega Thĩinĩ wa Thĩ Yothe

TA WĨCIRIE ũũkĩrĩte rũcinĩ rũmwe mũthenya ũrĩa ũrĩ rũtha na ũkambĩrĩria kwĩharĩria nĩguo ũthiĩ ũtungata. Ũkaigua ũkĩgonderera nĩ ũndũ wa mĩnoga. Ũkerirĩria kũhurũka rũcinĩ rũu! No ũkahoya Jehova igũrũ rĩgiĩ ũndũ ũcio na ũgatua itua rĩa gũthiĩ ũtungata. Mũkahunjia na mwarĩ wa Ithe witũ mũkũrũ ũkoretwo arĩ mwĩhokeku, na ũgekĩrũo ngoro mũno nĩ ciĩko ciake njega na ũkirĩrĩria wake. Mũkĩhunjia nyũmba kwa nyũmba, ũkaririkana atĩ aarĩ na ariũ a Ithe witũ thĩinĩ wa thĩ yothe, makoragwo makĩmemerekia ndũmĩrĩri o ĩyo, makahũthĩra mabuku o macio ũrahũthĩra, na tũkoragwo tũmenyeretio na njĩra o ĩmwe. Ũgĩkinya mũciĩ, ũgakorũo wĩkĩrĩtwo hinya. Ũgakena mũno nĩ gũtua itua rĩa kwaga gũtinda mũciĩ.

Mahinda-inĩ maya, wĩra ũrĩa wa bata makĩria harĩ Ũthamaki wa Ngai nĩ wa kũhunjia. Jesu nĩ aarathĩte atĩ wĩra wa kũhunjia nĩ ũngĩagĩire na moimĩrĩro ma kũgegania matukũ-inĩ ma kũrigĩrĩria. (Mat. 24:14) Ũrathi ũcio wake ũhingĩte na njĩra ĩrĩkũ? Gĩcigo-inĩ gĩkĩ, tũgũthuthuria ũhoro wĩgiĩ andũ, njĩra, na indo iria ikoretwo irĩ cia bata ũtungata-inĩ, na ikahotithia andũ milioni nyingĩ thĩinĩ wa thĩ gũtaũkĩrũo nĩ Ũthamaki wa Ngai.