Ũteithio Nĩguo Twĩrũgamie na Magũrũ Maitũ

Rĩmwe no tũigue tũritũhĩirũo mũno nĩ hatĩka na magerio marĩa tũcemanagia namo ũtũũro-inĩ witũ nginya tũkaigua tũthirĩtwo nĩ hinya na tũkaremwo nĩ gũthiĩ na mbere. Ĩndĩ mahinda-inĩ ta macio, no twĩkĩrũo hinya tũngĩciria ũrĩa kĩoneki kĩa Ezekieli kĩgiĩ gũcokio gĩtaarĩirio. Nĩkĩ? No twĩrute kuumana na ũrathi ũcio atĩ Ngai ũrĩa ũrĩ na hinya wa gũtũma mahĩndĩ makuũ macoke muoyo, hatarĩ nganja no ahote gũtũhe hinya ũrĩa tũrabatara nĩguo tũtoorie moritũ—nginya marĩa mangĩoneka ta matangĩtoorio maitho-inĩ ma andũ.—Thoma Thaburi 18:29; Afil. 4:13.

Ũndũ ũcio no ũtũririkanie atĩ mĩaka magana maingĩ mbere ya matukũ ma Ezekieli, mũnabii Musa nĩ ooigire atĩ to hinya tu Jehova akoragwo naguo, no nĩ nginya wendi wa kũhũthĩra hinya ũcio wake nĩ ũndũ wa andũ ake. Musa aandĩkire ũũ: “Ngai nĩ rĩũrĩro kuuma o mahinda ma tene, moko make ma tene na tene marĩ rungu rwaku.” (Gũcok. 33:27) No tũkorũo na ma atĩ tũngĩĩhoka Ngai witũ rĩrĩa tũrĩ na moritũ, Jehova nĩ arĩigaga moko make rungu rwitũ, agatuoya na igũrũ, na agatũteithia kwĩrũgamia rĩngĩ na magũrũ maitũ.—Ezek. 37:10.