Ndũmĩrĩri ĩrĩa ya bata makĩria thĩinĩ wa Bibilia ĩkoragwo ĩhutanĩtie na Ũthamaki wa Ngai. Jehova akaahũthĩra Ũthamaki ũcio kũhingia muoroto ũrĩa aarĩ naguo kĩambĩrĩria-inĩ wa gũtua thĩ ĩno Paradiso. Ũthamaki ũcio nĩ kĩĩ? Tũmenyaga atĩa atĩ nĩ ũrathana ihinda-inĩ rĩrĩ? Nĩ maũndũ marĩkũ ũhingĩtie? Na nĩ maũndũ marĩkũ ũkaahingia ihinda-inĩ rĩũkĩte? Ciũria icio nĩ igũcokio ithomo-inĩ rĩrĩ na mathomo-inĩ merĩ marĩa marũmĩrĩire.

1. Ũthamaki wa Ngai nĩ kĩĩ, na Mũthamaki waguo nũũ?

Ũthamaki ũcio nĩ thirikari ĩhandĩtwo nĩ Jehova Ngai. Mũthamaki waguo nĩ Jesu Kristo, na athanaga arĩ igũrũ. (Mathayo 4:17; Johana 18:36) Bibilia yugaga ũũ ũhoro-inĩ wĩgiĩ Jesu: ‘Agaathana arĩ Mũthamaki tene na tene.’ (Luka 1:32, 33) Jesu arĩ Mũthamaki wa Ũthamaki wa Ngai, agaathaga andũ othe gũkũ thĩ.

2. Nĩa magaathana hamwe na Jesu?

Jesu ndagaathana arĩ wiki. “Andũ kuuma mĩhĩrĩga-inĩ yothe na thiomi na ikundi cia andũ na ndũrĩrĩ” nĩ magaathana “marĩ athamaki igũrũ rĩa thĩ.” (Kũguũrĩrio 5:9, 10) Nĩ andũ aigana magaathana hamwe na Kristo? Kuuma hĩndĩ ĩrĩa Jesu aarĩ gũkũ thĩ, Akristiano milioni nyingĩ nĩ matuĩkĩte arũmĩrĩri ake. O na kũrĩ ũguo, no andũ 144,000 magaathiĩ igũrũ nĩguo magaathane hamwe na Jesu. (Thoma Kũguũrĩrio 14:1-4.) Akristiano acio angĩ othe magaatuĩka raia a Ũthamaki ũcio gũkũ thĩ.—Thaburi 37:29.

3. Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari cia andũ?

O na rĩrĩa atongoria a gũkũ thĩ marerutanĩria gwĩka maũndũ mega, matikoragwo na hinya wa gwĩka maũndũ marĩa mothe mangĩenda. Na atongoria arĩa macokaga ithenya rĩao no makorũo marĩ na mwĩyendo na matekwenda gũteithia andũ. No gũtirĩ mũndũ ũngĩ ũgaacoka ithenya rĩa Jesu, Mũtongoria wa Ũthamaki wa Ngai. Ngai nĩ “[ahandĩte] ũthamaki ũrĩa gũtarĩ hĩndĩ ũkaanangwo.” (Danieli 2:44) Jesu agaathana igũrũ rĩa thĩ yothe, na ndagaakoragwo na mũthutũkanio. We nĩ arĩ wendo, nĩ mũtugi, nĩ arũmagĩrĩra kĩhooto, na nĩ akaaruta andũ kũrũmbũyania na njĩra o ta ĩyo ya wendo, ũtugi, na kĩhooto.—Thoma Isaia 11:9.

4. Thirikari ĩrĩ hinya nĩ ĩgaathana thĩinĩ wa thĩ yothe

Jesu Kristo arĩ na hinya mũnene wa gwathana gũkĩra mũtongoria ũngĩ o wothe ũrĩ wathana. Thomai Mathayo 28:18, mũcoke mwarĩrĩrie kĩũria gĩkĩ:

• Nĩ na njĩra ĩrĩkũ wathani wa Jesu ũrĩ mũnene gũkĩra wa mũtongoria ũngĩ o wothe wa gũkũ thĩ?

Thirikari cia andũ ti cia gũtũũra, na o ĩmwe yacio yathanaga thĩinĩ wa gacunjĩ kanini ga thĩ. Ĩ naguo Ũthamaki wa Ngai? Thomai Danieli 7:14, mũcoke mwarĩrĩrie ciũria ici:

• Nĩkĩ nĩ ũndũ mwega atĩ Ũthamaki wa Ngai “ndũkaaniinwo”?

• Nĩkĩ nĩ ũndũ mwega atĩ ũgaathana thĩinĩ wa thĩ yothe?

5. Thirikari cia andũ ciagĩrĩire kweherio

Ũthamaki wa Ngai ũkeeheria thirikari cia andũ na wathane ithenya rĩacio nĩkĩ? Mwĩrorerei VIDEO ĩno, mũcoke mwarĩrĩrie kĩũria kĩrĩa kĩrũmĩrĩire.

VIDEO: Ũthamaki wa Ngai nĩ Kĩĩ?—Gacunjĩ ka Video (1:41)

• Nĩ mathĩna marĩkũ marehetwo nĩ wathani wa andũ?

Thomai Kohelethu 8:9, mũcoke mwarĩrĩrie ciũria ici:

• Hihi nĩ ũkuona ta Ũthamaki wa Ngai wagĩrĩire kweheria thirikari cia andũ na wathane ithenya rĩacio? Ũngiuga ũguo nĩkĩ?

6. Ũthamaki wa Ngai ũrĩ na aathani mataũkagĩrũo nĩ ithuĩ

Tondũ Mũthamaki witũ, Jesu, anatũũra gũkũ thĩ arĩ mũndũ, no ahote “gũtũiguĩra tha maũndũ-inĩ marĩa twagĩte hinya.” (Ahibirania 4:15) Arũme na atumia ehokeku 144,000 arĩa magaathana hamwe na Jesu mathuurĩtwo nĩ Jehova “kuuma mĩhĩrĩga-inĩ yothe na thiomi na ikundi cia andũ na ndũrĩrĩ.”—Kũguũrĩrio 5:9.

• Hihi nĩ ũrona arĩ ũndũ mwega gũkorũo atĩ Jesu na arĩa othe magaathana nake nĩ moĩ ũrĩa ũtũũro wa andũ gũkũ thĩ ũkoragwo ũhaana? Ũngiuga ũguo nĩkĩ?

7. Ũthamaki wa Ngai ũkoragwo na mawatho mega makĩria

Thirikari ithondekaga mawatho irĩ na muoroto wa gũteithia na kũgitĩra raia a cio. O na Ũthamaki wa Ngai nĩ ũkoragwo na mawatho marĩa raia aguo magĩrĩirũo kũrũmĩrĩra. Thomai 1 Akorintho 6:9-11, mũcoke mwarĩrĩrie ciũria ici:

• Ũgwĩciria thĩ ĩgaakorũo ĩhaana atĩa rĩrĩa andũ othe magaakorũo magĩathĩkĩra mawatho ma Ngai megiĩ mĩtugo?a

• Nĩ ũkuona ta Jehova arĩ na kĩhooto gĩa kwĩrĩgĩrĩra raia a Ũthamaki ũcio marũmĩrĩre mawatho macio? Ũngiuga ũguo nĩkĩ?

• Nĩ kĩĩ kĩronania atĩ andũ arĩa matathĩkagĩra mawatho macio no magarũrũke?—Rora mũhari wa 11.

ŨRĨA TWERUTA

Ũthamaki wa Ngai nĩ thirikari ya biũ ĩkoragwo igũrũ na ĩgaathana thĩinĩ wa thĩ yothe.

Ciũria cia gũcokera

• Nĩa magaathana thĩinĩ wa Ũthamaki wa Ngai?

• Nĩ na njĩra ĩrĩkũ Ũthamaki wa Ngai ũrĩ mwega gũkĩra thirikari o yothe ya andũ?

• Jehova erĩgagĩrĩra raia a Ũthamaki wake meke atĩa?

RIKĨRA

Thoma wone ũrĩa Jesu aarutanire igũrũ rĩgiĩ kũrĩa Ũthamaki ũcio ũkoragwo.

“Hihi Ũthamaki wa Ngai Ũrĩ Ngoro-inĩ ya Mũndũ?” (Gĩcunjĩ thĩinĩ wa jw.org/ki)

Nĩ kĩĩ gĩtũmaga Aira a Jehova mone atĩ gũkorũo marĩ ehokeku harĩ Ũthamaki wa Ngai nĩ kwa bata makĩria gũkĩra gũkorũo marĩ ehokeku harĩ thirikari cia andũ?

Kũnyita Mbaru Ũthamaki wa Ngai (1:43)

Thuthuria wone ũrĩa Bibilia ĩrutanaga igũrũ rĩgiĩ arĩa 144,000 Jehova athuurĩte nĩguo magaathana hamwe na Jesu.

“Nĩ a Mathiaga Igũrũ?” (Gĩcunjĩ thĩinĩ wa jw.org/ki)

Nĩ kĩĩ gĩateithirie mũtumia ũmwe warĩ njera gũkorũo na ma atĩ no Ngai tu ũngĩrehe kĩhooto thĩinĩ wa thĩ?

“Ũrĩa Ndamenyire Kĩhonia kĩa Wagi wa Kĩhooto” (g 11/11)

Ũthamaki wa Ngai waambĩrĩirie gwathana igũrũ mwaka-inĩ wa 1914. Hĩndĩ ĩyo no rĩo matukũ ma kũrigĩrĩria ma wathani wa andũ maambĩrĩirie. Nĩ kĩĩ gĩtũteithagia kũmenya ũguo? Reke tũthuthurie ũrathi wa Bibilia, maũndũ marĩa marekĩka thĩinĩ wa thĩ, na mĩtugo ĩrĩa andũ makoretwo nayo kuuma mwaka wa 1914.

1. Bibilia yarathĩte atĩa?

Ibuku rĩa Danieli rĩarathĩte atĩ Ũthamaki wa Ngai ũngĩkambĩrĩria gwathana mũthia-inĩ wa ihinda rĩĩtĩtwo “mahinda mũgwanja.” (Danieli 4:16, 17) Mĩaka mĩingĩ thutha ũcio, Jesu eetire ihinda rĩu “mahinda marĩa matuĩtwo ma ndũrĩrĩ,” na akĩonania atĩ matiathirĩte hĩndĩ ĩyo. (Luka 21:24) O ta ũrĩa tũkwĩruta, mahinda macio mũgwanja maathirire mwaka-inĩ wa 1914.

2. Thĩ ĩkoretwo ĩhaana atĩa kuuma mwaka wa 1914?

Arutwo a Jesu maamũũririe ũũ: “Nĩ kĩĩ gĩgaakorũo kĩrĩ kĩmenyithia kĩa ihinda rĩaku rĩa gũkorũo kuo na kĩa ithirĩro rĩa mũtabarĩre wa maũndũ?” (Mathayo 24:3) Jesu akĩmacokeria nĩ aarathire maũndũ maingĩ marĩa mangĩgeekĩka thutha wake kwambĩrĩria gwathana kũrĩa igũrũ arĩ Mũthamaki wa Ũthamaki wa Ngai. Maũndũ mamwe aagwetire nĩ ta mbaara, ngʼaragu, na ithingithia. (Thoma Mathayo 24:7.) Ningĩ Bibilia nĩ yagwetete atĩ mĩtugo ya andũ “matukũ-inĩ ma kũrigĩrĩria” nĩ ĩngĩgatũma ũtũũro ũkorũo ũrĩ ‘mũritũ kũhiũrania naguo.’ (2 Timotheo 3:1-5) Maũndũ macio mothe nĩ makoretwo makĩoneka wega kuuma mwaka wa 1914.

3. Thĩ ĩthũkĩte ũguo nĩkĩ kuuma rĩrĩa Ũthamaki wa Ngai waambĩrĩirie gwathana?

Ihinda inini thutha wa Jesu gũtuĩka Mũthamaki wa Ũthamaki wa Ngai, nĩ aarũire na Shaitani na ndaimono ciake kũrĩa igũrũ, na Shaitani akĩhootwo. Bibilia yugaga atĩ Shaitani “[aaharũrũkirio] thĩ, o na araika ake makĩharũrũkio hamwe nake.” (Kũguũrĩrio 12:9, 10, 12) Shaitani nĩ mũrakaru mũno tondũ nĩ oĩ atĩ nĩ akaaniinwo. Nĩ ũndũ ũcio, nĩ arehaga ruo na mathĩna thĩinĩ wa thĩ yothe, na nĩkĩo thĩ ĩthũkĩte ũguo. No Ũthamaki wa Ngai nĩ ũkaaniina mathĩna macio mothe.

THUTHURIA MAKĨRIA

4. Morathi ma Bibilia nĩ matũteithagia gũkinyĩrĩra mwaka wa 1914

VIDEO: Ũthamaki wa Ngai Waambĩrĩirie Gwathana Mwaka wa 1914 (5:02)

Ngai nĩ aatũmire Mũthamaki Nebukadineza wa Babuloni ya tene arote kĩroto kĩarĩ na ũrathi. Kuumana na kĩroto kĩu na ũrĩa Danieli aagĩtaarĩirie, nĩ tuonaga atĩ kĩahutĩtie wathani wa Nebukadineza na Ũthamaki wa Ngai.—Thoma Danieli 4:17.a

Thomai Danieli 4:20-26, mũcoke mũhũthĩre mũcoro ũrĩa wonanĩtio gũcokia ciũria ici irũmĩrĩire:

• (A) Nebukadineza oonire kĩĩ kĩroto-inĩ gĩake?​—Rora mũhari wa 20 na 21.

• (B) Kũngĩathiire atĩa harĩ mũtĩ ũcio?​—Rora mũhari wa 23.

• (C) Kũngĩathiire atĩa mũthia-inĩ wa “mahinda mũgwanja”?​—Rora mũhari wa 26.

Ũrĩa Kĩroto kĩu Kĩgiĩ Mũtĩ Kĩhutanĩtie na Ũthamaki wa Ngai

ŨRATHI (Danieli 4:20-36)

Wathani

(A) Mũtĩ mũnene

Wathani kwamba kũrũgamio

(B) “Temai mũtĩ ũcio” na mũreke “mahinda mũgwanja mahĩtũke”

Wathani gũcokio

(C) “Nĩ ũgaacokerio ũthamaki waku”

Harĩ kũhinga kwa mbere kwa ũrathi ũcio-rĩ . . .

• (D) Mũtĩ ũcio warũgamĩrĩire ũ?​—Rora mũhari wa 22.

• (E) Wathani wake waambire kũrũgamio atĩa?​—Thomai Danieli 4:29-33.

• (F) Gwathiire atĩa harĩ Nebukadineza mũthia-inĩ wa ‘mahinda marĩa mũgwanja’?​—Thomai Danieli 4:34-36.

KŨHINGA KWA MBERE

Wathani

(D) Nebukadineza, Mũthamaki wa Babuloni

Wathani kwamba kũrũgamio

(E) Nebukadineza kũũrũo nĩ meciria make thutha wa mwaka wa 606 M.M.M., na kũremwo nĩ gwathana kwa ihinda rĩa mĩaka mũgwanja

Wathani gũcokio

(F) Nebukadineza gũcokererũo nĩ meciria make na kwambĩrĩria gwathana rĩngĩ

Harĩ kũhinga gwa kerĩ kwa ũrathi ũcio-rĩ . . .

• (G) Mũtĩ ũcio warũgamĩrĩire a?​—Thomai 1 Maũndũ ma Matukũ ma Tene 29:23.

• (H) Wathani wao waambire kũrũgamio atĩa? Tũmenyaga atĩa atĩ wathani ũcio no warũgamĩtio rĩrĩa Jesu aarĩ gũkũ thĩ?​—Thomai Luka 21:24.

• (I) Wathani ũcio wacokirio rĩ na wacokeirio kũ?

KŨHINGA GWA KERĨ

Wathani

(G) Athamaki a Isiraeli arĩa maarũgamĩrĩire wathani wa Ngai

Wathani kwamba kũrũgamio

(H) Jerusalemu kwanangwo, na wathani wa athamaki a Isiraeli kũrũgamio kwa ihinda rĩa mĩaka 2,520

Wathani gũcokio

(I) Jesu kwambĩrĩria gwathana kũrĩa igũrũ arĩ Mũthamaki wa Ũthamaki wa Ngai

5. Thĩ nĩ ĩcenjetie kuuma mwaka wa 1914

Mwĩrorerei VIDEO ĩno.

VIDEO: Thĩ nĩ Ĩcenjetie Kuuma Mwaka wa 1914 (1:10)

Jesu nĩ aarathĩte maũndũ marĩa mangĩgekĩka thĩinĩ wa thĩ thutha wake gũtuĩka Mũthamaki. Thomai Luka 21:9-11, mũcoke mwarĩrĩrie kĩũria gĩkĩ:

• Nĩ maũndũ marĩkũ harĩ macio wonete magĩkĩka kana ũkaigua ũhoro wamo?

Mũtũmwo Paulo nĩ aataarĩirie ũrĩa andũ mangĩgakorũo mahaana matukũ-inĩ ma kũrigĩrĩria ma wathani wa andũ. Thomai 2 Timotheo 3:1-5, mũcoke mwarĩrĩrie kĩũria gĩkĩ:

• Nĩ mĩtugo ĩrĩkũ harĩ ĩyo wonete andũ marĩ nayo ũmũthĩ?

6. Gũkorũo atĩ Ũthamaki wa Ngai nĩ ũrathana nĩ kwagĩrĩirũo gũtũtindĩka kuoya ikinya

Thomai Mathayo 24:3, 14, mũcoke mwarĩrĩrie ciũria ici:

• Nĩ wĩra ũrĩkũ wa bata ũrarutwo thĩinĩ wa thĩ ũronania atĩ Ũthamaki wa Ngai nĩ ũrathana?

• Ũngĩka atĩa nĩguo ũhote kũnyitanĩra wĩra-inĩ ũcio?

Ũthamaki wa Ngai rĩu nĩ ũrathana, na mũthenya waguo wa gwathana thĩinĩ wa thĩ yothe ũrĩ hakuhĩ. Thomai Ahibirania 10:24, 25, mũcoke mwarĩrĩrie kĩũria gĩkĩ:

• Twagĩrĩirũo gwĩka atĩa “o ũrĩa [tũrona] mũthenya ũcio ũgĩkuhĩrĩria”?

ŨRĨA TWERUTA

Kũrora morathi ma Bibilia na ũrĩa thĩ ĩthũkĩte nĩ gũtuonagia atĩ Ũthamaki wa Ngai rĩu nĩ ũrathana. Tuonanagia atĩ nĩ twĩtĩkĩtie ũguo kũgerera kũhunjia ũhoro wa Ũthamaki wa Ngai na gũthiĩ mĩcemanio ya kĩũngano.

Ciũria cia gũcokera

• Gwathiire atĩa mũthia-inĩ wa mahinda mũgwanja marĩa maarathĩtwo ibuku-inĩ rĩa Danieli?

• Nĩ kĩĩ kĩragũteithia gũkorũo na ma atĩ Ũthamaki wa Ngai waambĩrĩirie gwathana mwaka-inĩ wa 1914?

• Ũngĩonania atĩa atĩ nĩ wĩtĩkĩtie Ũthamaki ũcio nĩ ũrathana?

RIKĨRA

Thoma wone ũrĩa andĩki a historĩ o hamwe na andũ angĩ moigĩte ũhoro wĩgiĩ ũrĩa thĩ ĩcenjetie kuuma mwaka-inĩ wa 1914.

“Ihinda Rĩrĩa Mĩtugo Yathũkire O Rĩmwe” (g07 04)

Thoma wone ũrĩa ũrathi ũrĩa ũrĩ thĩinĩ wa Mathayo 24:14 wahutirie ũtũũro wa mũthuri ũmwe.

“Ndendete Gũthaka Baseball Gũkĩra Ũndũ Ũngĩ o Wothe!” (Mũrangĩri Na. 3 2017)

Nĩ kĩĩ gĩtũteithagia kũmenya atĩ ũrathi ũrĩa ũrĩ thĩinĩ wa ibuku rĩa Danieli mũrango wa 4 nĩ ũhutanĩtie na Ũthamaki wa Ngai?

“Ũthamaki wa Ngai Waambĩrĩirie Gwathana-rĩ? (Gĩcunjĩ kĩa 1)” (Mũrangĩri, Oktomba 1, 2014)

Nĩ kĩĩ kĩronania atĩ “mahinda mũgwanja” marĩa magwetetwo ibuku-inĩ rĩa Danieli mũrango wa 4 maathirire mwaka-inĩ wa 1914?

“Ũthamaki wa Ngai Waambĩrĩirie Gwathana Rĩ? (Gĩcunjĩ gĩa 2)” (Mũrangĩri, Novemba 1, 2014)

Ũthamaki wa Ngai rĩu nĩ ũrathana, na ica ikuhĩ nĩ ũkũrehe mogarũrũku manene gũkũ thĩ. Reke twarĩrĩrie maũndũ mamwe mega ũngĩrĩgĩrĩra gũkona hĩndĩ ya wathani wa Ũthamaki wa Ngai.

1. Ũthamaki wa Ngai ũkaarehe thayũ na kĩhooto atĩa thĩinĩ wa thĩ?

Jesu, Mũthamaki wa Ũthamaki wa Ngai, nĩ akaaniina andũ aganu na thirikari cia gũkũ thĩ kũgerera mbaara ya Hari–Magedoni. (Kũguũrĩrio 16:14, 16) Hĩndĩ ĩyo kĩĩranĩro gĩkĩ kĩa Bibilia nĩ gĩkaahingio biũ: “No kahinda kanini gatigaru, na andũ arĩa aganu matigaakorũo kuo rĩngĩ.” (Thaburi 37:10) Jesu akaahũthĩra Ũthamaki ũcio gũtigĩrĩra atĩ thĩ yothe ĩrĩ na thayũ na kĩhooto.—Thoma Isaia 11:4.

2. Ũtũũro ũkaahana atĩa rĩrĩa wendi wa Ngai ũgeekwo thĩinĩ wa thĩ yothe?

Rungu rwa Ũthamaki wa Ngai, “andũ arĩa athingu nĩ makaagaya thĩ, na magaatũũra thĩinĩ wayo tene na tene.” (Thaburi 37:29) Ta hũũra mbica ũgĩtũũra thĩinĩ wa thĩ ĩrĩ na andũ athingu na othe nĩ mendete Jehova na nĩ mendanĩte! Gũtirĩ mũndũ ũkaarwaraga, na andũ othe magaatũũra tene na tene.

3. Nĩ maũndũ marĩkũ Ũthamaki wa Ngai ũkaahingia thutha wa andũ arĩa aganu kũniinwo?

Thutha wa andũ arĩa aganu kũniinwo, Jesu nĩ agaathana arĩ Mũthamaki ihinda rĩa mĩaka 1,000. Ihinda-inĩ rĩu, Jesu hamwe na arĩa 144,000 magaathana hamwe nake, nĩ magaateithia andũ arĩa magaakorũo gũkũ thĩ gũtuĩka akinyanĩru. Gũkinyĩria mũthia wa ihinda rĩu, thĩ ĩgaakorũo ĩtuĩkĩte paradiso thaka ĩrĩ na andũ marĩ na gĩkeno nĩ ũndũ wa gwathĩkĩra mawatho ma Jehova. Thutha ũcio Jesu nĩ agaacokeria Ithe, Jehova, wathani. Hĩndĩ ĩyo ‘rĩĩtwa rĩa Jehova nĩ rĩgaatherio’ gũkĩra hĩndĩ ĩngĩ o yothe. (Mathayo 6:9, 10) Nĩ gũgaakorũo kuonekete wega atĩ Jehova nĩ Mwathani mwega na nĩ arũmbũyagia andũ ake. Thutha ũcio Jehova nĩ akaaniina Shaitani, ndaimono, na mũndũ o wothe ũgaathuura kũremera wathani wa Jehova. (Kũguũrĩrio 20:7-10) Irathimo iria ikaarehwo nĩ Ũthamaki wa Ngai igaatũũra tene na tene.

THUTHURIA MAKĨRIA

4. Ũthamaki wa Ngai nĩ ũkaaniina thirikari cia andũ

“Mũndũ akoretwo agĩatha mũndũ agatũmaga one o maũndũ moru.” (Kohelethu 8:9) Jehova nĩ akaahũthĩra Ũthamaki wake kũniina wagi ũcio wa kĩhooto.

Thomai Danieli 2:44 na 2 Athesalonike 1:6-8, mũcoke mwarĩrĩrie ciũria ici:

• Jehova na Mũrũ wake, Jesu, makoera thirikari cia andũ na arĩa macinyitaga mbaru ikinya rĩrĩkũ?

• Maũndũ marĩa wĩrutĩte igũrũ rĩgiĩ Jehova na Jesu maragũteithia atĩa gũkorũo na ma atĩ mageekaga maũndũ ma kĩhooto?

5. Jesu nĩwe Mũthamaki ũrĩa mwega biũ

Jesu arĩ Mũthamaki wa Ũthamaki wa Ngai, nĩ agaateithia andũ arĩa magaakorũo gũkũ thĩ na njĩra nyingĩ. Mwĩrorerei VIDEO ĩno nĩguo muone ũrĩa Jesu onanĩtie atĩ arĩ na wendi wa gũteithia andũ, na atĩ Ngai nĩ amũhete hinya wa kũmateithia.

VIDEO: Jesu nĩ Oonanirie Ũrĩa Ũthamaki wa Ngai Ũgeeka (1:13)

Maũndũ marĩa Jesu eekire arĩ gũkũ thĩ nĩ matũteithagia kũmenya maũndũ marĩa Ũthamaki wa Ngai ũkaahingia. Nĩ irathimo irĩkũ cionanĩtio haha wĩriragĩria makĩria gũkona ikĩhinga? Thomai maandĩko marĩa monanĩtio hakuhĩ na irathimo icio marĩa maratũteithia gũtaũkĩrũo nĩcio.

6. Ũthamaki wa Ngai nĩ ũgaatũrehera maũndũ mega ihinda rĩũkĩte

VIDEO: Maũndũ Mega Marĩa Marĩ Mbere (4:38)

Thomai Thaburi 145:16, mũcoke mwarĩrĩrie kĩũria gĩkĩ:

• Kũmenya atĩ Jehova nĩ “[akaahingia] merirĩria ma kĩndũ gĩothe kĩrĩ muoyo” kũratũma ũigue atĩa?

ŨRĨA TWERUTA

Ũthamaki wa Ngai nĩ ũkaahingia muoroto wa Ngai. Ũkaagarũra thĩ yothe ĩtuĩke paradiso ĩrĩ na andũ ega arĩa magaathathayagia Jehova tene na tene.

Ciũria cia gũcokera

• Ũthamaki wa Ngai ũgaatheria rĩĩtwa rĩa Jehova na njĩra ĩrĩkũ?

• Nĩ kĩĩ kĩngĩtũma tũkorũo na ma atĩ Ũthamaki wa Ngai nĩ ũkaahingia ciĩranĩro iria irĩ Bibilia-inĩ?

• Nĩ ũndũ ũrĩkũ wĩriragĩria mũno gũkona ũkĩhingio nĩ Ũthamaki wa Ngai?

RIKĨRA

Thoma wone Hari–Magedoni nĩ kĩĩ.

“Mbaara ya Hari–Magedoni nĩ Kĩĩ?” (Gĩcunjĩ thĩinĩ wa jw.org/ki)

Thoma wone maũndũ marĩa mageekĩka hĩndĩ ya ihinda rĩrĩa Jesu eetire “thĩna mũnene.”—Mathayo 24:21

“Gũgaathiĩ Atĩa Hĩndĩ ya Thĩna Ũrĩa Mũnene?” (Gĩcunjĩ thĩinĩ wa jw.org/ki)

Wĩrorere wone ũrĩa andũ thĩinĩ wa famĩlĩ mangĩĩcũrania hamwe igũrũ rĩgiĩ irathimo cia Ũthamaki wa Ngai cia ihinda rĩũkĩte.

Hũũra Mbica Ũrĩ Paradiso (1:50)