Nĩkĩ nĩ Wagĩrĩire Gũthoma Bibilia?

Ibuku rĩrĩa rĩũĩkaine mũno thĩinĩ wa thĩ nĩ Bibilia. Nĩkĩ? Ũndũ ũmwe nĩ atĩ, nĩ ũhũthũ gũtaũkĩrũo nĩ ũhoro ũrĩa ũrĩ thĩinĩ wayo. Ĩkoragwo na ngʼano cia ma ciĩgiĩ andũ maatũũraga tene, ũrĩa maaikaranagia, o hamwe na ũkuruhanu wao na Ngai. Ngʼano icio ikoragwo na motaaro mangĩtũteithia maandĩkĩtwo na ciugo hũthũ, ingĩtaũrũo na thiomi nyingĩ, na mũndũ o wothe ataũkĩrũo gũtekũmakania kũrĩa aikaraga na aratũũra ihinda rĩrĩkũ, na hĩndĩ ciothe motaaro mayo nĩ marĩ ũguni.

Ũndũ ũrĩa wa bata makĩria nĩ atĩ, Bibilia to kwaria yaragia ũhoro wa Ngai, ĩndĩ, yugaga atĩ yo nyene nĩ ibuku riumĩte kũrĩ Ngai. Ĩguũragia rĩĩtwa rĩa Ngai, ngumo ciake, na muoroto wake ũrĩa ũtagarũrũkaga harĩ kũũmba thĩ na andũ. Bibilia ningĩ nĩ ĩtaaragĩria mbaara ĩrĩa ĩkoretwo kuo kũrĩa igũrũ na gũkũ thĩ gatagatĩ-inĩ ka wega na ũũru, na ũrĩa ĩgaakorũo na moimĩrĩro mega. Kwoguo gũthoma Bibilia tũrĩ na mwerekera mwega nĩ kũigaga mũthingi mwega wa wĩtĩkio na kĩĩrĩgĩrĩro.

Ndũmĩrĩri ĩrĩa ĩkoragwo thĩinĩ wa Bibilia, tũtingĩmĩona kũndũ kũngĩ. Kwa ngerekano, Bibilia nĩ ĩtwĩraga ũhoro wa ma wĩgiĩ maũndũ ta:

• Kũrĩa andũ moimire na kĩrĩa gĩtũmaga manyamarĩke

• Mũbango wa Ngai wa kũhonokia andũ

• Ũrĩa Jesu atwĩkĩire

• Ihinda rĩrĩa rĩũkĩte harĩ thĩ na andũ

Na githĩ ti wega ũthome icunjĩ iria irũmĩrĩire nĩguo wone ndũmĩrĩri ĩrĩa ĩkoragwo thĩinĩ wa Bibilia?