Andũ Moimire Kũ?

Na njĩra nguhĩ, ibuku rĩa Kĩambĩrĩria nĩ rĩtaarĩirie kũrĩa igũrũ na thĩ cioimire, riugaga ũũ: “O kĩambĩrĩria-rĩ, Ngai aatũmire kũgĩe matu-inĩ na gũkũ thĩ.” (Kĩambĩrĩria 1:⁠1) Thutha wa Ngai kũũmba mĩmera na nyamũ, nĩ ombire mũthuri na mũtumia, Adamu na Hawa. Maarĩ ngũrani mũno na nyamũ tondũ nĩ maarĩ na ngumo ta cia Ngai o hamwe na wĩyathi wa gwĩthurĩra. Kwoguo nĩo mangĩethurĩire ũrĩa megwĩka. Maangĩathĩkĩire Ngai, nĩ mangĩagĩire na itemi harĩ muoroto Wake wa gũkorũo marĩ aciari a andũ othe arĩa mangĩatũũrire tene na tene, marĩ akinyanĩru na marĩ na thayũ thĩinĩ wa thĩ.

O na kũrĩ ũguo, harĩ kĩũmbe kĩa roho kana mũraika ũmwe, waahũthĩrire ũũru ũhoti wao wa gwĩthurĩra nĩgetha egune we mwene. Kwoguo agĩtuĩka Shaitani, kiugo kĩrĩa kiugĩte “Mũregani.” Shaitani aahũthĩrire nyoka kũheenia Hawa, akĩmwĩra atĩ ndaabataraga gũtongorio nĩ Ngai. Adamu na Hawa nĩ maarũmĩrĩire Shaitani na kwoguo magĩthũkia ũrata na Mũũmbi wao. Nĩ ũndũ wa itua rĩao rĩũru, aciari acio aitũ a mbere magĩte muoyo wa tene na tene, na magĩtũrehera mehia na kwaga gũkinyanĩra o hamwe na gĩkuũ tũtangĩhota gwĩthema.

O hĩndĩ ĩyo, Ngai akĩmenyithania muoroto wake wa kũrũnga ũndũ ũcio, na kũhingũrĩra njiarũa cia Adamu njĩra ya gũkaaheo muoyo wa tene na tene. Ngai akĩratha atĩ “mbeũ,” kana mũndũ wa mwanya nĩ angĩkaaniina Shaitani na eherie biũ mĩnyamaro ĩrĩa Shaitani, Adamu na Hawa maareheire andũ. (Kĩambĩrĩria 3:15) Hihi “mbeũ” ĩyo ĩngĩakorirũo ĩrĩ ũ? Nĩ ĩngĩamenyekire thutha wa ihinda.

Hĩndĩ ĩyo, nake Shaitani nĩ aageragia gũthararia mũbango wa Ngai. Andũ aganu magĩthiĩ maingĩhĩte. Ngai agĩtua itua rĩa kũniina andũ acio aganu na mũiyũro wa maĩ. Agĩatha Nuhu mũndũ warĩ mũthingu aake thabina​​—⁠gĩthandũkũ kĩnene kĩngĩarerire maĩ igũrũ, nĩguo we na famĩlĩ yake mahonoke o hamwe na nyamũ iria eerĩtwo aingĩrie thĩinĩ wa thabina.

Mwaka ũmwe thutha wa Mũiyũro kwambĩrĩria, Nuhu na famĩlĩ yake makiuma thĩinĩ wa thabina magĩkora thĩ ĩtheretio ĩgathira waganu. No “mbeũ” no yatanyagwo.

​—Ũhoro ũyũ uumĩte ibuku-inĩ rĩa Kĩambĩrĩria 1-11; Judasi 6, 14, 15; Kũguũrĩrio 12:9.