Mũbango wa Ngai wa Kũhonokia Andũ

Ngai eerĩire Iburahimu mũndũ warĩ mwĩhokeku atĩ, “mbeũ” ĩrĩa yeranĩirũo ĩngĩokire kũgerera rũciaro rwake. Kũgerera mbeũ ĩyo andũ a “ndũrĩrĩ ciothe” nĩ mangĩkarathimwo. (Kĩambĩrĩria 22:18) Jakubu, wa rũciaro rwa Iburahimu nĩ aathamĩire Misiri, kũrĩa famĩlĩ yake yaathegeire na ĩgĩtuĩka rũrĩrĩ rwa tene rwa Isiraeli.

Thutha ũcio, Aisiraeli marĩ Misiri, Firauni ũrĩa waathanaga na gĩthũri akĩmatua ngombo o nginya hĩndĩ ĩrĩa Ngai aatũmire mũnabii Musa, ũrĩa wamakũũrire na njĩra ya kĩama rĩrĩa Iria Itune rĩatũkanire na hakĩgĩa njĩra. Thutha ũcio, Ngai akĩhe Aisiraeli mawatho, o hamwe na Maathani marĩa ikũmi, ma kũmatongoragia na kũmagitĩra. Mawatho macio nĩ monanagia magongona marĩa mũndũ aagĩrĩirũo nĩ kũruta nĩguo oherũo mehia. Musa atongoretio nĩ roho wa Ngai, eerire Aisiraeli atĩ Ngai nĩ angĩamatũmĩire mũnabii ũngĩ. Mũnabii ũcio nĩ we ũngĩarĩ “mbeũ” ĩrĩa yeranĩirũo.

Makĩria ma mĩaka 400 thutha ũcio, Ngai nĩ eerĩire Mũthamaki Daudi atĩ mũnabii ũcio nĩwe ũngĩatuĩkire “mbeũ” ĩrĩa yeranĩirũo mũgũnda-inĩ wa Edeni, na ũthamaki wake ũtũũre tene na tene. Ũcio nĩwe ũngĩatuĩkire Mesia, Mũkũũri ũrĩa ũthuurĩtwo nĩ Ngai ahonokie andũ na acokie Paradiso.

Kũgerera Daudi na anabii angĩ, Ngai nĩ aathiire na mbere kũguũria maũndũ mangĩ megiĩ Mesia. Anabii acio maarathire atĩ angĩgakorũo arĩ mũhoreri na mũtugi na atĩ rungu rwa waathani wake nĩ angĩkaaniina ngʼaragu, wagi wa kĩhooto na mbaara kaimana. Andũ othe nĩ mangĩgaikarania na thayũ mũndũ na ũrĩa ũngĩ o hamwe na nyamũ. Ndwari, mĩnyamaro na gĩkuũ iria itaarĩ mũbango-inĩ wa Ngai kuuma o kĩambĩrĩria nĩ ingĩkaaniinwo na andũ arĩa makuĩte mariũkio gũkũ thĩ.

Ngai kũgerera mũnabii Mika nĩ aarathire atĩ Mesia angĩgaciarĩrũo Bethilehemu, na kũgerera mũnabii Danieli akĩratha atĩ nĩ angĩkooragwo. No Ngai nĩ angĩkaamũriũkia na amũtue Mũthamaki kũrĩa igũrũ. Ningĩ Danieli nĩ onirio kĩoneki atĩ, Ũthamaki wa Mesia nĩ ũngĩkamemenda mothamaki mothe na ũtũũre tene na tene. Hihi Mesia nĩ okire o ta ũrĩa kwarathĩtwo?

​—Ũhoro ũyũ uumĩte ibuku-inĩ rĩa Kĩambĩrĩria 22-50, Thama, Gũcokerithia Maathani, 2 Samueli, Thaburi, Isaia, Danieli, Mika, Zekaria 9:9.