“Tũrĩ Kuona Mesia”!

Mĩaka ta magana mana thutha wa ibuku rĩa mũthia rĩa maandĩko ma Kĩhibirania thĩinĩ wa Bibilia rĩa Malaki kwandĩkwo, nĩrĩo ũrathi wa Mika wĩgiĩ Mesia wahingirio, Jesu aciarũo itũũra-inĩ rĩa Bethilehemu. Mĩaka ta 30 thutha ũcio, gĩcunjĩ kĩa mbere kĩa ũrathi wa Danieli wĩgiĩ gũka kwa Mesia nĩ kĩahingirio mwaka wa 29 Mahinda Maitũ, rĩrĩa Jesu aabatithirio na Ngai akĩmũitĩrĩria maguta kũgerera roho mũtheru. O ta ũrĩa kwarathĩtwo, Mesia ũrĩa watũire etereirũo, o we Mbeũ ĩrĩa ya kĩambĩrĩria nĩ aarĩkĩtie gũkinya!

Jesu aambĩrĩirie ũtungata wake o hĩndĩ ĩyo, “akahunjagia Ũhoro-ũrĩa-Mwega wa ũthamaki wa Ngai.” (Luka 8:⁠1) O ta ũrĩa kwarathĩtwo, Jesu aarĩ mũtaana, mũhoreri, na nĩ aarũmbũyagia andũ arĩa angĩ atarĩ na ũhinga. Morutani make maarĩ mega na ma kũguna andũ, ningĩ nĩ aahonagia andũ “mĩrimũ yothe na ndũari ciothe,” ũndũ ũria wonanirie atĩ Ngai aarĩ hamwe nake. (Mathayo 4:23) Andũ othe kanini na kanene nĩ mokaga kũrĩ we makoiga: “Tũrĩ kuona Mesia”!​​—⁠Johana 1:⁠41.

Jesu aarathire atĩ mbere ya Ũthamaki wake woete waathani wothe, thĩ nĩ ĩngĩkaagũmĩrũo nĩ mbaara, ithingithia na mathĩna mangĩ maingĩ. Nĩ ũndũ ũcio, akĩĩra andũ othe ‘maikarage meiguĩte.’​​—⁠Mariko 13:⁠37.

Jesu aarĩ mũndũ mũkinyanĩru watũũraga arĩ mwathĩki harĩ Ngai, no thutha-inĩ akĩũragwo nĩ thũ ciake. Kwoguo, gĩkuũ gĩake gĩkĩrĩha irĩhi rĩrĩa rĩabataranagia nĩguo tũgĩe na kĩĩrĩgĩrĩro kĩa muoyo wa tene na tene thĩinĩ wa Paradiso, ũrĩa Adamu na Hawa maateire.

Gĩkuũ kĩa Jesu nĩ kĩahingirie ũrathi, o ta ũrĩa kũriũkio gwake nĩ Ngai thutha wa thikũ ithatũ arĩ kĩũmbe kĩa roho kĩrĩ hinya kwahingirie ũrathi. Thutha ũcio Jesu nĩ oimĩrĩire arutwo makĩria ma 500. Jesu atanambata igũrũ, nĩ aaheire arutwo ake wĩra wa kũhunjia ũhoro mwega ũmwĩgiĩ na wa Ũthamaki wake kũrĩ “andũ a ndũrĩrĩ ciothe.” (Mathayo 28:19) Hihi maarutire wĩra ũcio na gĩkĩro kĩrĩkũ?

​—⁠Ũhoro ũyũ uumĩte ibuku-inĩ rĩa Mathayo, Mariko, Luka, Johana, 1 Akorintho.