“Nĩ ndamenetwo nĩ andũ aingĩ”

ŨTŨŨRO WAKWA WA HAU KABERE:

Ndarereirũo Santiago, mũciĩ mũnene wa Chile, kũndũ kwendagio ndawa cia kũrebia na kwarĩ itoi na wĩki-naĩ mũingĩ. Ndĩ wa mĩaka ĩtano, baba nĩ oragirũo. Thutha ũcio, mami akĩambĩrĩria gũikarania na mũndũrũme warĩ mũũru mũno. Aatũhũraga mbaara ya gĩkombe twĩna mami hĩndĩ ciothe, ũũ atĩ o na ũmũthĩ ũyũ no ndũirie irema cia ngoro.

Maũndũ macio twekagwo nĩ maatũmire ngũre ndĩ mũndũ mũũru mũno. Ndathikagĩrĩria nyĩmbo njũru cia ũhinya, nganyua mũno, na ngahũthĩra ndawa cia kũrebia rĩmwe rĩmwe. Kaingĩ nĩ ndarũaga na endia a ndawa cia kũrebia, arĩa maita maigana ũna maageririe kũnjũraga. Hĩndĩ ĩmwe gĩkundi kĩa eki-naĩ nĩ kĩarĩhire mũndũ ũmwe woĩkaine mũno anjũrage, no nĩ ndahotire gwĩthara ndĩna nguraro ya kahiũ. Hĩndĩ ĩngĩ, gĩkundi kĩa endi a ndawa cia kũrebia nĩ kĩanjorotithĩirie mũcinga mũtwe na gĩkĩgeria kũnjita.

Kũrĩ mwaka wa 1996, nĩ twendanire na mũtumia ũmwe wĩtagwo Carolina, na mwaka wa 1998, tũkĩhikania. Twagĩa kahĩĩ gaitũ ka irigithathi, nĩ ndetigagĩra ndigatũkie baba nyambĩrĩrie kũherithia famĩlĩ yakwa tondũ ndarĩ mũndũ wa marakara. Kwoguo ngĩetha ũteithio kuuma kũrĩ andũ arĩa mateithagia andũ kũgarũrĩra mĩtugo yao. Ngĩthondekwo na ngĩheo ndawa, no ũndũ ũcio ndwandeithirie. Ndathiire o na mbere kũrakaragio nĩ kaũndũ o gothe kanini, na ndiahotaga kwĩgirĩrĩria. Ngĩona ũndũ ũrĩa ũngĩndeithia nĩguo ndikanae kũgera famĩlĩ yakwa ngero, nĩ kwĩyũraga. Ũndũ ũrĩa mwega nĩ atĩ, ndiahotire kwĩyũraga.

Kwa ihinda iraya ndetĩkĩtie gũtirĩ Ngai, no nĩ ndendaga kũgĩa na wĩtĩkio harĩ Ngai, kwoguo ngĩambĩrĩria gũthiaga kanitha ũmwe wa kĩevanjeli. Ihinda-inĩ o rĩu, mũtumia wakwa nĩ eerutaga Bibilia na Aira a Jehova. Nĩ ndaamenete Aira a Jehova mũno, na maita maingĩ nĩ ndaametaga ciugo njũru mũno. No hĩndĩ ciothe maakoragwo na thayũ, ũndũ ũrĩa iteerĩgagĩrĩra.

Mũthenya ũmwe, Carolina nĩ aanjĩrire thome Thaburi 83:18 thĩinĩ wa Bibilia. Mũhari ũcio uugaga atĩ rĩĩtwa rĩa Ngai nĩ Jehova. Nĩ ndaagegire ndamenya atĩ, kanitha-inĩ witũ twarutagwo ũhoro wa ngai, no ti ũhoro wĩgiĩ Jehova Ngai ũrĩa wa ma. Mwaka wa 2000, o na niĩ ngĩambĩrĩria kwĩruta Bibilia na Aira a Jehova.

ŨRĨA BIBILIA YAGARŨRIRE MŨTŨŨRĨRE WAKWA:

O ũrĩa nderutaga, noguo ndekĩragwo ngoro kũmenya atĩ Jehova nĩ Ngai ũrĩ tha na mwohanĩri. Kwa ngerekano, Thama 34:​6, 7 yugaga atĩ Jehova nĩwe, “Ngai ũrĩa ũiguanagĩra tha mũno, na agakinyĩria andũ wega wake, na ndahiũhaga kũrakara, na nĩaiyũirũo nĩ tha, na ũhoro-wa-ma, na aiguagĩra andũ ngiri na ngiri tha; na nĩwe Ngai ũrĩa muohanĩri waganu, o na mahĩtia, o na mehia.”

O na kũrĩ ũguo, ndwarĩ ũndũ mũhũthũ kũhũthĩra maũndũ marĩa nderutaga. Ndetĩkĩtie atĩ gũtirĩ hĩndĩ ingĩahotire kũgirĩrĩria marakara makwa, no Carolina nĩ aanjĩkagĩra ngoro hĩndĩ ciothe arĩ na wendo mũingĩ. Akandirikania atĩ Jehova nĩ arona kĩyo gĩakwa. Ũteithio wake nĩ waheaga hinya wa gũthiĩ na mbere kũgeria gũkenia Jehova, o na gũtuĩka nĩ ndonaga ta itangĩhota.

Mũthenya ũmwe, Alejandro, ũrĩa wandutaga Bibilia, akĩnjĩra thome Agalatia 5:​22, 23. Mĩhari ĩyo yugaga atĩ, maciaro ma roho wa Ngai nĩ “wendani, na gĩkeno, na thayũ, na gũkirĩrĩria, na gũtugana, na gwĩkana wega, na kwĩhokeka, na kũhorera, na kwĩgirĩrĩria.” Alejandro aanjĩrire atĩ ingĩahotire gũkũria ngumo icio kũgerera roho mũtheru wa Ngai, no ti na hinya wakwa mwene. Ũũma ũcio nĩ wagarũrire biũ muonere wakwa wa maũndũ!

Thutha ũcio, nĩ ndaathire gĩthomo-inĩ kĩmwe kĩnene kĩa Aira a Jehova. Ũndũ ũrĩa waatũmire menye atĩ ĩno nĩyo ndini ya ma, nĩ mĩbango, ũtheru na wendo ũrĩa ndonire gatagatĩ-inĩ kao. (Johana 13:​34, 35) Na ngĩbatithio Februarĩ, 2001.

ŨRĨA NGʼUNĨKĨTE:

Jehova nĩ andeithĩtie ngatuĩka mũndũ wendete thayũ. Nĩ nyonaga atĩ nĩ aandutire mũtondo-inĩ wa mehia. Nĩ ndamenetwo nĩ andũ aingĩ no ndimatuagĩra. O na kũrĩ ũguo, nĩ ngenagĩra gũtungatĩra Jehova ndĩ na thayũ tũrĩ hamwe na mũtumia wakwa na tũhĩĩ twitũ twĩrĩ.

Andũ a famĩlĩ na arata akwa a tene matiĩtĩkagia mona mogarũrũku marĩa njĩkĩte. Nĩ ũndũ ũcio, amwe ao nĩ monanĩtie kwenda kwĩruta ma cia Bibilia. Ningĩ nĩ ngĩĩte na mweke wa kũruta andũ angĩ ũhoro wĩgiĩ Jehova, na gĩkoretwo kĩrĩ gĩkeno kĩnene kuona ma ya Bibilia ĩkĩgarũra ũtũũro wao o nao!