“Drama ya Eureka” nĩ Yateithirie Andũ Aingĩ Mamenye Ũhoro wa Ma

“EUREKA!” Kiugo kiugĩte “Nĩ ndamĩona!” Hĩndĩ ya karine ya 19 andũ nĩ magundũrire thahabu thĩinĩ wa California, U.S.A. Thutha wa mũndũ gũcimba na kuona thahabu nĩ angĩaiguĩkire akĩanĩrĩra akoiga “Eureka!” O na kũrĩ ũguo, Charles Taze Russell na Arutwo angĩ a Bibilia, nĩ maagundũrĩte kĩndũ kĩngĩ kĩa goro makĩria—ma cia Bibilia. Na nĩ meendaga mũno kũmenyithia andũ arĩa angĩ ũhoro ũcio.

Gũkinyĩria mwaka-inĩ wa 1914, andũ milioni nyingĩ mataũni-inĩ marĩa manene nĩ meeroreire “Photo-Drama of Creation,” thenema ya mathaa manana ĩrĩa yahaarĩirio nĩ International Bible Students Association (I.B.S.A.). Thenema ĩyo yarĩ na mbica thaka, na ciathiaga irũmanĩrĩire wega na igatwarana na tũrwĩmbo tũtarĩ na ciugo. Ningĩ nĩ yarĩ na mũgambo wataaragĩria maũndũ marĩa maarĩ thĩinĩ wayo. Thenema ĩyo ya Bibilia yoonanagia ũhoro wa kuuma o hĩndĩ ĩrĩa indo ciombagwo, gũthiĩ ũguo nginya mũthia-inĩ wa Wathani wa Mĩaka Ngiri Ĩmwe wa Jesu Kristo.—Kũg. 20:4.a

Ĩ nao andũ arĩa maaikaraga tũtaũni-inĩ tũnini na icagi-inĩ? Nĩguo mũndũ o wothe ũnyoteire ũhoro wa ma akinyĩrũo nĩguo, kũrĩ Agosti 1914, I.B.S.A. nĩ yarutire “Drama ya Eureka.” Yarĩ thenema ya “Photo-Drama” ĩkahũthio. Kwarĩ na mĩthemba ĩtatũ ya “Drama ya Eureka” ĩrĩa mũndũ angĩeroreire, na ciothe ciarutĩtwo na thiomi nyingĩ. Ĩmwe yetagwo “Eureka X” yarĩ na ũhoro mũtaarĩrie tu na tũrwĩmbo. “Eureka Y” yarĩ na ũhoro wothe ũrĩa warĩ mũtaarĩrie, tũrwĩmbo, na mbica thaka. Nayo “Eureka Family Drama,” ĩrĩa yarongoreirio kũhũthĩrũo thĩinĩ wa mĩciĩ, yarĩ na nyĩmbo na ũhoro ũmwe mũtaarĩrie. Ningĩ macini itarĩ cia goro cia gũthaka drama icio nĩ cionekaga.

Tondũ Arutwo a Bibilia matiabataraga gũkuua macini nene cia projector, nĩ maahotaga gũtwara drama icio nginya icagi-inĩ, makaingĩra thĩinĩ wa icigo njerũ marĩ na ndũmĩrĩri ya Ũthamaki. Tondũ “Eureka X” yarĩ o ya mũgambo tu nĩ ĩngĩathakirũo mũthenya kana ũtukũ. Projector ĩrĩa yahũthagĩrũo kuonania drama ya “Eureka Y” nĩ ĩngĩonanirio gũtarĩ thitima gũkĩhũthĩrwo mwaki wa ngaasi. Riboti ĩmwe ya ngathĩti ya Mũrangĩri ya rũthiomi rwa Finnish yoigire ũũ: “No tũhote kuonania mbica ici hakuhĩ kũndũ guothe.” Ũcio warĩ ũhoro wa ma biũ!

Nĩguo mahonokie mbeca, handũ ha gũkombora nyũmba nene cia thenema, Arutwo a Bibilia maacaragia kũndũ matekũrĩha ta macukuru-inĩ, nyũmba-inĩ cia thirikari, ceceni-inĩ cia mũgithi, na kwa andũ mĩciĩ kũrĩa kũngĩakorirũo na nyũmba nene. Maita maingĩ drama icio cionanagĩrio kũndũ nja. Maacuragia gĩtambaya kĩnene rũthingo-inĩ rwa nyũmba rũkamũrĩkwo na projector. Anthony Hambuch aandĩkire ũũ: “Arĩmi maabangaga mĩgogo tũmĩgũnda-inĩ twao twa matunda nĩguo andũ mone gwa gũikara na makenere programu ĩyo.” Arĩa moonanagia drama icio cia “Eureka” maahũthagĩra “ngaari ya kũguucio nĩ mbarathi” gũkuua macini, indo cia kũrugĩra, na cia kũhũthĩra kũrĩa marĩrara.

Arĩa meeroragĩra drama icio cia “Eureka,” rĩmwe makoragwo marĩ aingĩ na rĩngĩ magakorũo marĩ anini. Kũrĩ hĩndĩ andũ 400 maathire kwĩrorera drama ĩyo cukuru-inĩ ĩmwe taũni-inĩ ĩmwe ya Amerika (U.S.). Taũni ĩyo yarĩ na aikari 150. Kũndũ kũngĩ nakuo, andũ amwe maathiaga rũgendo rwa kiromita 8 gũthiĩ, na 8 gũcoka nĩguo makerorere drama ĩyo. Andũ a itũũra rĩa mũtumia ũmwe wetagwo Charlotte Ahlberg bũrũri-inĩ wa Sweden, arĩa maacemanĩtie kanyũmba-inĩ gake kanini nĩ “maahutirio ngoro mũno” maathikĩrĩria drama ĩyo. Andũ 1, 500 thĩinĩ wa taũni ĩmwe yenjagwo mahiga ma goro bũrũri-inĩ wa Australia nĩ maacemanirie nĩguo merorere drama ĩyo. Ngathĩti ya Watch Tower yoigire atĩ thĩinĩ wa cukuru cia sekondarĩ na korenji “arutani na arutwo nĩ maakenagio mũno nĩ mbica na mĩgambo ya drama icio.” “Drama ya Eureka” yagĩte na ngumo nene nginya kũndũ kũrĩa gwakoragwo na nyũmba cia thenema.

KŨHANDA MBEŨ CIA ŨHORO WA MA

“Drama ya Eureka” nĩ yahũthagĩrũo kũrĩa Arutwo a Bibilia maatũmaga aaria arĩa maarĩ na ũmenyeru makagerie kwambĩrĩria ciũngano. Ti ũndũ mũhũthũ kũmenya nĩ andũ aigana meeroreire “Drama ya Eureka.” Mĩthemba yothe ĩtatũ ya “Drama” ĩyo nĩ yonanirio mũno. O na kũrĩ ũguo, mwaka wa 1915 no ikundi 14 tu harĩ ikundi 86 ciarutaga wega riboti ya ũrĩa cionanagia “Drama” ĩyo. O na gũtuĩka gũtiamenyekire biũ nĩ andũ aigana meeroreire “Drama” ĩyo, riboti ya mũico wa mwaka ũcio yoigire atĩ andũ makĩria ma milioni ĩmwe nĩ meeroreire. Andũ 30,000 harĩ arĩa maamĩroreire nĩ maahoire matũmĩrũo mabuku maitũ.

O na gũtuĩka “Drama ya Eureka” ndĩrĩ ngumo mũno ũmũthĩ, no kũhoteke andũ milioni nyingĩ kuuma Australia nginya Argentina, Afrika ya Mũhuro nginya Ngeretha, na India nginya icigĩrĩra-inĩ cia Caribbean nĩ maamĩroreire. Aingĩ ao nĩ maamenyire ũhoro wa ma ũrĩa wa goro mũno gũkĩra thahabu na nĩ ũndũ ũcio nĩ mangĩoigire “Eureka!”