Nĩ Tuoonire ‘Ruru ya Goro’

Mũrũ wa Ithe witũ Winston, twĩre ũrĩa woonire ũhoro wa ma.

Ndaarereirũo Queensland, Australia nĩ aciari mateekĩrĩire maũndũ ma kĩndini na twaikaraga mĩgũnda-inĩ. Tondũ kũrĩa twaikaraga kwarĩ kũraihu na mĩciĩ ĩrĩa ĩngĩ, gũtirĩ andũ angĩ ndonaga kaingĩ tiga o andũ a mũciĩ. Ndaambĩrĩirie gũcaria Ngai ndĩna mĩaka ta 12. Nĩ ndamũhoyaga ngamwĩra andeithie kũmenya ũhoro wa ma ũmwĩgiĩ. Thutha-inĩ nĩ ndoimire mũciĩ na ngĩona wĩra taũni-inĩ ya Adelaide, South Australia. Ndĩna mĩaka 21, nĩ twacemanirie na Pam taũni-inĩ ya Sydney kũrĩa ndathiĩte kũhurũka, na akĩnjĩra ũhoro wa gĩkundi gĩa kĩndini kĩeĩtaga British-Israel kĩrĩa kĩoigaga atĩ andũ a Ngeretha mooimanĩte na mĩhĩrĩga ya Isiraeli. Kũringana na gĩkundi kĩu, mĩhĩrĩga ĩyo nĩ ĩrĩa ikũmi ya ũthamaki wa mwena wa rũgongo ĩrĩa yatwarirũo ithamĩrio karine-inĩ ya kanana Mbere ya Mahinda Maitũ. Kwoguo ndacoka Adelaide nĩ twarĩrĩirie ũndũ ũcio na mũndũ twarutaga wĩra nake wambĩrĩirie kwĩruta Bibilia na Aira a Jehova. Thutha wa gũteereta nake ihinda rĩa mathaa maigana ũna, makĩria tũkĩarĩrĩria ũhoro wĩgiĩ maũndũ marĩa Aira a Jehova metĩkĩtie, ndonire ta arĩ gũcokerio ndacokagĩrio mahoya marĩa ndahoete ndĩ mũnyinyi. Maũndũ marĩa ndeerutaga megiĩ Mũũmbi na Ũthamaki wake maarĩ ma ma! Na njĩra ĩyo ngĩona ‘ruru ya goro.’—Mat. 13:45, 46.

Mwarĩ wa Ithe witũ Pam, o nawe wambĩrĩirie gũcaria ruru ĩyo ũrĩ mũnyinyi. Hihi wamĩonire atĩa?

Ndaarereirũo famĩlĩ-inĩ ya kĩndini na twaikaraga taũni-inĩ ya Coffs Harbour, New South Wales. Aciari akwa o hamwe na guka na cũcũ nĩ meetĩkĩtie morutani ma gĩkundi kĩa British-Israel. Niĩ, mũrũ wa maitũ ũrĩa ũnyumĩte thutha, mwarĩ wa maitũ ũrĩa mũkũrũ, na aihwa aitũ aingĩ, tũkĩrerũo twarutagwo atĩ Ngai nĩ endete andũ arĩa moimanĩte na andũ a Ngeretha gũkĩra andũ arĩa angĩ. O na kũrĩ ũguo, niĩ ndietĩkĩtie ũndũ ũcio, na ndaiguaga ndaihanĩrĩirie na Ngai. Ndĩ na mĩaka 14, nĩ ndaathiire kanitha-inĩ itiganĩte cia kũu twaikaraga, o hamwe na kanitha wa Anglican, Baptist, na Seventh-day Adventist. No ngʼaragu yakwa ya kĩĩroho ndĩathirire.

Thutha ũcio famĩlĩ itũ nĩ yathamĩire Sydney, kũrĩa ndacemanirie na Winston okĩte kũhurũka kuo. O ta ũrĩa ekũgwetete, maũndũ marĩa twarĩrĩirie ma kĩndini nĩmo maatũmire ambĩrĩrie kwĩruta na Aira a Jehova. Marũa marĩa aandũmagĩra kuuma hĩndĩ ĩyo, maakoragwo maiyũire maandĩko! Reke njuge atĩ kĩambĩrĩria-inĩ nĩ ndeetigagĩra o na ngarakara. No o kahora kahora ngĩona atĩ ũcio nĩguo warĩ ũhoro wa ma.

Mwaka wa 1962, nĩ ndathamĩire Adelaide nĩgetha nguhĩrĩrie Winston. Nĩ aabangĩte tũikarage na mũrũ na mwarĩ wa Ithe witũ Thomas na Janice Sloman arĩa maatungataga hau kabere marĩ amishonarĩ bũrũri-inĩ wa Papua New Guinea. Nĩ maanyonirie wendo mũnene, ndaarĩ na mĩaka 18 tu na nĩ maandeithirie kĩĩroho na njĩra nene. Kwoguo o na niĩ ngĩambĩrĩria kwĩruta Kiugo kĩa Ngai, na thutha wa kahinda ngĩtĩkia biũ atĩ nĩ ndona ũhoro wa ma. Thutha wa kũhikania na Winston, nĩ twambĩrĩirie o rĩo ũtũũro warĩ na irathimo nyingĩ wa gũtungatĩra Jehova, ũtungata ũrĩa ũtũteithĩtie kwenda o na makĩria ruru ya goro ĩrĩa tuonire o na gũtuĩka no tũcemanagia na moritũ.

Winston, twĩre ũhoro wĩgiĩ mĩaka yaku ya kĩambĩrĩria ũtungata-inĩ wa Jehova.

Kahinda kanini thutha wa kũhikania na Pam, Jehova nĩ aambĩrĩirie gũtũhe mawĩra ma mwanya ũtungata-inĩ wake. (1 Kor. 16:9) Ũtungata wa mbere twambĩrĩirie thutha wa gũteithio nĩ Mũrũ wa Ithe witũ Jack Porter, ũrĩa waceeragĩra kĩũngano gitũ kĩnini arĩ mũrori wa mũthiũrũrũko. (Rĩu tũtungataga hamwe nake Kamĩtĩ-inĩ ya Wabici ya Rũhonge ya Australasia.) Jack na mũtumia wake Roslyn, maatwĩkĩrire ngoro gũtuĩka mapainia a hĩndĩ ciothe, ũtungata ũrĩa twakeneire ihinda rĩa mĩaka ĩtano. Ndĩna mĩaka 29, tũrĩ na Pam nĩ twaheirũo wĩra wa gũceerera ciũngano Icigĩrĩra-inĩ cia South Pacific, iria ciarĩ rungu rwa wabici ya rũhonge ya Fiji. Icigĩrĩra icio nĩ American Samoa, Samoa, Kiribati, Nauru, Niue, Tokelau, Tonga, Tuvalu, na Vanuatu.

Matukũ-inĩ macio, andũ thĩinĩ wa icigĩrĩra imwe irĩ kũraihu, nĩ meetigagĩra Aira a Jehova na kwoguo nĩ twabataraga kũhũthĩra ũũgĩ na ũtaũku. (Mat. 10:16) Ciũngano ciakoragwo irĩ nini, na imwe o na itiahotaga gũtũhe handũ ha gũkoma. Kwoguo twahoyaga andũ kũu icagi-inĩ handũ ha gũkoma, na hingo ciothe maakoragwo marĩ atugi mũno harĩ ithuĩ.

Winston, nĩ wendete mũno wĩra wa ũtaũri. Nĩ kĩĩ gĩatũmire ũkenio nĩguo?

Mahinda-inĩ macio, ariũ a Ithe witũ gĩcigĩrĩra-inĩ gĩa Tonga maakoragwo na trakti na tũbuku tũigana ũna na rũthiomi rwa Tonga, rũmwe rwa thiomi iria ciaragio gĩcigo-inĩ gĩa Polynesia. Makĩruta andũ ũtungata-inĩ, maahũthagĩra ibuku rĩa Gĩthũngũ rĩa The Truth That Leads to Eternal Life. Nĩ ũndũ ũcio, hĩndĩ ya cukuru ya athuri a kĩũngano ya ciumia inya, athuri atatũ a kũu moĩ Gĩthũngũ hanini nĩ meetĩkĩrire gũtaũra ibuku rĩa Truth na rũthiomi rwa Tonga. Pam nĩwe waandĩkire ũhoro ũcio wataũrirũo, na tũkĩũtũma wabici-inĩ ya rũhonge ya Amerika (US) nĩguo ũcabwo. Wĩra ũcio wothe warutirũo na kĩndũ ciumia inyanya. O na gũtuĩka ũtaũri wa ibuku rĩu ndwarĩ wa kũganwo, ibuku rĩu nĩ rĩateithirie andũ aingĩ arĩa maragia rũthiomi rwa Tonga kwĩruta ũhoro wa ma. Tũrĩ na Pam tũtirĩ ataũri, no ũndũ ũcio nĩ watũmire tũkenio nĩ wĩra ũcio.

Pam, ũtũũro kũu icigĩrĩra-inĩ warĩ ngũrani atĩa na ũtũũro bũrũri-inĩ wa Australia?

Warĩ ngũrani mũno! Kũrĩ kũndũ kũmwe gwakoragwo na rwagĩ rũingĩ, ũrugarĩ mũingĩ na rĩera rĩrĩ na ũigũ, mbĩa, mĩrimũ, na rĩmwe gũkorũo tũtarĩ na irio cia kũigana. O na kũrĩ ũguo, o mũthenya twainũka, twaiguaga tũhooreire tũkĩĩrorera iria kuuma nyũmba ĩrĩa twaikaraga yetagwo fale rĩĩtwa rĩa Gĩsamoa, rĩa nyũmba iria ciakagwo gĩcigo-inĩ kĩu igitĩtwo na nyeki itarĩ na thingo. Rĩmwe mweri wakoragwo na ũtheri mũingĩ nginya tũkahota kuona wega mĩtĩ ya coconut, na nĩ tũngĩonire ũtheri wa mweri ũmũrĩkĩte iria-inĩ. Maũndũ ta macio mega nĩ maatũmaga twĩcũranie na tũhoe, ũndũ ũrĩa watũteithagia kwaga gwĩciria ũhoro wa moritũ maitũ tũgeciria maũndũ marĩa mega.

Nĩ tweendete mũno ciana tondũ nĩ ciatũkenagia mũno na nĩ ciagegaga ciona andũ ta ithuĩ ageni marĩ na ngothi njerũ. Hingo ĩmwe tũceerete Niue, kahĩĩ kamwe kaahutirie njuĩrĩ cia guoko kwa Winston gakĩmwĩra, “Nĩ ndakenio nĩ maguoya maku.” Koigire ũguo tondũ gatioimĩte konete moko ta macio marĩ na njuĩrĩ kwoguo gatiamenyaga gegũtaarĩria atĩa!

Nĩ twaiguaga ũũru tuona ũrĩa andũ maarĩ athĩni na ũrĩa ũtũũro wao warĩ mũritũ. O na gũtuĩka maaikaraga kũndũ gũthaka, matiarĩ na ũrigitani mwega na maĩ ma kũigana ma kũnyua. No aarĩ na ariũ a Ithe witũ matioonekaga ta maramaka. Nĩ maamenyerete ũtũũro ũcio. Ũndũ ũrĩa wamakenagia nĩ gũkorũo na famĩlĩ ciao, gũkorũo na handũ ha gũthathaĩria, na kũhota kũgooca Jehova. Kĩonereria kĩao nĩ gĩatũteithirie kũiga meciria maitũ maũndũ-inĩ marĩa ma bata makĩria na gũikara ũtũũro mũhũthũ.

Pam, rĩmwe na rĩmwe wabataraga gwetha maĩ na kũruga ũkĩhũthĩra njĩra ũtaamenyerete. Wahotaga maũndũ macio atĩa?

Nĩ ngenaga tondũ baba nĩ aandutĩte maũndũ matiganĩte. Nĩ aanyonetie maũndũ maingĩ ma bata ta gwakia mwaki nja na kũruga naguo, na kũiganĩra na kĩrĩa kĩnini ndĩ na kĩo. Hingo ĩmwe twaceerete Kiribati, twaikarire kanyũmba-inĩ kanini kaagitĩtwo na nyeki, na thĩ gaathondeketwo na indo ciũnganagio iria-inĩ, na kaarĩ na thingo cia mĩrangi. Nĩguo nduge ndeenjire karima thĩ nĩguo njakie mwaki na ngĩhũthĩra makoro ma coconut marĩ ta ngũ. Maĩ namo ndaathiire gũtaha gĩthima-inĩ tũrĩ na atumia arĩa angĩ. Nĩguo matahe maĩ, maathondekete mũtĩ wa fiti ta ithathatũ ũhaana ta wa gũtega thamaki makawoherera karũrigi gaceke harĩa mbere. No rĩu handũ ha kuoherera ndwano hau mbere, moohagĩrĩra ndoo. Atumia acio maaraga raini na mũtumia akinyĩrĩrũo akoya mũtĩ ũcio akahiũria guoko gwake ũrĩa kwagĩrĩire nĩguo atahe maĩ. Eka ũguo, ndoo yaingĩraga maĩ-inĩ na mwena na ĩkaiyũra maĩ. Rĩrĩa ndakinyĩrĩirũo nĩguo ndetĩkirie gatiarĩ kaũndũ kahũthũ ta ũrĩa ndeciragia. Ndageririe gũtaha maita maigana ũna, no ndaikia ndoo yathiaga ĩkaringa maĩ ĩkarera igũrũ! Andũ nĩ maathekire mũno, no mũtumia ũmwe nĩ eerutĩire kũndeithia. Andũ a kũu hingo ciothe maakoragwo meharĩirie gũtũteithia na gũtũtuga.

Inyuerĩ nĩ mwakeneire ũtungata wanyu icigĩrĩra-inĩ icio. Hihi no mũtaarĩrie maũndũ mamwe ma mwanya mweyoneire?

Winston: Nĩ tuoire ihinda tũngĩkamenyerana na ũndũire ũmwe. Kwa ngerekano, rĩrĩa ariũ a Ithe witũ matũnyita ũgeni, maatwĩkagĩrĩra irio iria ciothe ikũrugĩtwo. Kĩambĩrĩria-inĩ tũtiamenyaga atĩ twabatiĩ kũrĩa imwe tũmatigĩrie icio ingĩ. Kwoguo twarĩaga irio iria ciothe twekĩrĩrũo! No rĩrĩa twamenyire ũrĩa gũthiaga, nĩ twamatigagĩria irio. Ariũ a Ithe witũ nĩ maataũkagĩrũo nĩ ithuĩ o na twahĩtia. Nĩ maakenaga mũno gũtuona thutha wa mĩeri ta ĩtandatũ twamaceerera twĩ wĩra-inĩ wa mũthiũrũrũko. Tiga niĩ na Pam, ariũ a Ithe witũ acio matioonanaga na ariũ a Ithe witũ a kuuma ciũngano ingĩ.

Iceera ritũ ciũngano-inĩ nĩ rĩateithagia kũruta ũira matũũra-inĩ. Andũ aingĩ kũu matũũra-inĩ meeciragia atĩ ndini ya Aira a Jehova no kaũndũ o ũguo kaambĩrĩirio nĩ ariũ a Ithe witũ a kũu. Kwoguo rĩrĩa twaceerera ariũ a Ithe witũ tũrĩ na Pam, andũ a itũũra nĩ maataũkagĩrũo ũhoro wĩgiĩ ithondeka rĩa Jehova na magakena.

Pam: Ũndũ ũmwe ndirikanaga mũno wekĩkire Kiribati, kũrĩa kwarĩ na kĩũngano kĩa aarĩ na ariũ a Ithe witũ aigana ũna. Kĩarĩ na mũthuri ũmwe tu wa kĩũngano wetagwo Itinikai Matera, na nĩ eekaga ũrĩa wothe angĩhota gũtũrũmbũiya. Mũthenya ũmwe ookire akuuĩte gĩkabu kĩarĩ na itumbĩ rĩmwe tu agĩtwĩra, “nĩ rĩanyu.” Itumbĩ rĩa ngũkũ hĩndĩ ĩyo rĩarĩ kĩndũ kĩa goro mũno harĩ ithuĩ. Gĩĩko kĩu kĩnini kĩa ũtaana nĩ gĩatũhutirie ngoro mũno.

Pam, mĩaka ĩigana ũna thutha ũcio nĩ worirũo nĩ mwana thutha wa nda kuuma. Nĩ kĩĩ gĩagũteithirie kũhiũrania na ũndũ ũcio?

Ndagĩire nda mwaka wa 1973 rĩrĩa niĩ na Winston twarĩ South Pacific. Kwoguo tũgĩtua itua rĩa gũcoka Australia, kũrĩa tuorirũo nĩ mwana ũcio mĩeri ĩna kuuma twacoka. O na Winston nĩ aahutirio mũno nĩ ũndũ ũcio tondũ aarĩ thakame yake. Thutha wa ihinda, ruo rwa ngoro rũrĩa ndaarĩ naruo nĩ rwathirathirire, no rũtiathirĩte biũ nginya rĩrĩa twamũkĩrire ngathĩti ya Mũrangĩri ya Ĩpuro 15, 2009. Gĩcunjĩ gĩa Ciũria Kuuma Kũrĩ Athomi kĩarĩ na kĩongo, “Je, kuna tumaini lolote kwamba mtoto anayefia ndani ya tumbo la uzazi atafufuliwa?” Gĩcunjĩ kĩu nĩ gĩatũteithirie gũkorũo na ma atĩ ũndũ ũcio ũrĩ moko-inĩ ma Jehova, na hingo ciothe ekaga maũndũ marĩa magĩrĩire. Nĩ akahonia ironda cia ngoro iria tũgĩte nacio tũgĩtũũra thĩinĩ wa mũtabarĩre ũyũ mũũru rĩrĩa akerekeria Mũrũwe na njĩra ya wendo ‘oinange mawĩra ma Shaitani.’ (1 Joh. 3:8) Gĩcunjĩ kĩu ningĩ nĩ gĩatũteithirie kuona “ruru” ya goro ĩrĩa tũrĩ nayo ithuĩ andũ a Jehova ĩrĩ ya bata o na makĩria. Kĩĩrĩgĩrĩro kĩrĩa tũrĩ nakĩo kĩa Ũthamaki nĩ gĩtũmagĩrĩria mũno.

Thutha wa mwana witũ gũkua, nĩ twacokereire ũtungata wa mahinda mothe. Twatungatire Betheli ya Australia mĩeri ĩigana ũna, tũgĩcoka tũkĩambĩrĩria rĩngĩ wĩra wa gũceerera ciũngano. Mwaka wa 1981 thutha wa gũtungata mĩaka ĩna thĩinĩ New South Wales na Sydney, nĩ twetirũo wabici-inĩ ya rũhonge ya Australia, ĩrĩa yetagwo ũguo hĩndĩ ĩyo, na nokuo tũtungataga o na rĩu.

Atĩrĩrĩ Winston, hihi ũmenyeru ũrĩa wagĩire naguo ũgĩtungata Icigĩrĩra-inĩ cia South Pacific nĩ ũgũteithĩtie wĩra-inĩ waku thĩinĩ wa Kamĩtĩ ya Wabici ya Rũhonge ya Australasia?

Ĩĩ nĩ ũndeithĩtie na njĩra nyingĩ. Wa mbere, wabici ya rũhonge ya Australia nĩ yaheirũo wĩra wa kũrũgamĩrĩra American Samoa na Samoa. Nayo wabici ya rũhonge ya New Zealand ĩgĩturanĩrũo na wabici ya rũhonge ya Australia. Rĩu wabici ya rũhonge ya Australasia ĩrũgamagĩrĩra wĩra thĩinĩ wa Australia, American Samoa na Samoa, Icigĩrĩra cia Cook, New Zealand, Niue, Timor-Leste, Tokelau, na Tonga, na nĩ ngĩte mweke wa gũceera kũndũ kũingĩ harĩ kũu ndũmĩtwo nĩ wabici ya rũhonge. Gũkorũo ndungatĩte na aarĩ na ariũ a Ithe witũ acio ehokeku icigĩrĩra-inĩ icio nĩ kũndeithĩtie mũno ihinda-inĩ rĩrĩ ndĩmatungatagĩra thĩinĩ wa wabici ya rũhonge.

Ngĩrĩkĩrĩria no nyende kuuga atĩ o ta ũrĩa niĩ na Pam twĩyoneire, to andũ agima tu monaga bata wa gũcaria Ngai. O na andũ ethĩ nĩ mendaga ‘ruru ya goro,’ o na akorũo andũ acio angĩ a famĩlĩ matirakenio nĩ ũhoro wa ma. (2 Ath. 5:2, 3; 2 Maũ. 34:1-3) Ũrĩa kũrĩ nĩ atĩ, Jehova nĩ Ngai ũrĩ wendo na endaga andũ othe, arĩa akũrũ na arĩa ethĩ makoona muoyo!

Rĩrĩa twambĩrĩirie gũcaria Ngai tũrĩ na Pam mĩaka 50 mĩhĩtũku, tũtiamenyaga gũcaria kũu kũngĩatumĩrĩirie kũ. Ũhoro mwega wa Ũthamaki hatarĩ nganja nĩ ruru ya thogora mũnene mũno! Tũtuĩte itua rĩa gũthiĩ na mbere kũrũmia na hinya witũ wothe ruru ĩyo ya goro!