Ithandũkũ rĩa Kĩũria

◼ Tũngĩteithĩrĩria mapainia na njĩra irĩkũ?

Mwaka wa ũtungata wa 2009, hakuhĩ aarĩ na ariũ a Ithe witũ 800,000 thĩinĩ wa thĩ yothe nĩ maatungatire marĩ mapainia a hĩndĩ ciothe na a mwanya. Ndungata icio cia mahinda mothe ciheanaga uumithio wao ũrĩa mwega biũ wa mahinda mao, hinya, na indo ciao nĩgetha mamemerekie ũhoro mwega wa Ũthamaki. (Thim. 3:9) Jehova nĩ akenaga mũno nĩũndũ wa kĩo kĩao! Nĩ na njĩra irĩkũ tũngĩonania mawoni ta ma Jehova na tũteithie mapainia makenere na mathiĩ na mbere ũtungata-inĩ wao?

Hatarĩ nganja ciugo ciitũ njega no imekĩre ngoro mathiĩ na mbere na ũpainia. (Thim. 25:11) Hihi no tũbange mĩbango iitũ ya o kiumia nĩgetha tũhunjie nao? Rĩrĩa tũrahunjia nao no tũmeere tũhũthĩre ngari iitũ handũ ha yao kana tũmarĩhĩre ngari. Na mangĩtũkuua na ngari yao, no tũmahe mbeca cia maguta. (1 Kor. 13:5; Afil. 2:4) Ningĩ nĩ tũmanyitaga mbaru tũrĩ na wendo na njĩra ya kũmoonia ũtugi na rĩmwe na rĩmwe kũmanyita ũgeni mĩciĩ gwitũ tũrĩanĩre hamwe nao.—1 Pet. 4:8, 9.

Maandĩko matwĩraga na ũũma atĩ Jehova nĩ arĩheaga arĩa macaragia Ũthamaki mbere, mabataro mao. (Thab. 37:25; Mat. 6:33) Njĩra ĩmwe ahũthagĩra gwĩka ũguo nĩ kũgerera wendo wa aarĩ na ariũ a Ithe witũ. (1 Joh. 3:16-18) Hatarĩ nganja-rĩ, mapainia matiĩrĩgagĩrĩra andũ arĩa angĩ mamarĩhĩre mahũthĩro mao. Na mahota kwaga kwĩra andũ angĩ atĩ nĩmarabatara kĩndũ. No rĩrĩ, no ‘tũteithie wagi wao’ tũngĩrora nĩ maũndũ marĩkũ marabatara na tũmateithie.—2 Kor. 8:14, 15.

Hĩndĩ ĩrĩa Foibe, mũhunjia warĩ kĩyo thĩinĩ wa Kĩũngano gĩa Kenkirea mahinda-inĩ ma atũmwo, aathire Roma-rĩ, Paulo eerire ariũ a Ithe witũ ũũ: “Mũmũgwate ũgeni thĩinĩ wa Mwathani, mũkĩmũtuge o ta ũrĩa aagĩrĩirũo nĩ gũtugwo nĩ andũ arĩa aamũre, na mũmũteithie ũndũ-inĩ o wothe ũrĩa angĩkorũo abataire nĩ gũteithio nĩ inyuĩ.” (Rom. 16:1, 2) Tũrĩ na mweke wa kũnyita mbaru ũguo na njĩra ya wendo mapainia a hĩndĩ ciothe na a mwanya arĩa marĩ kĩũngano-inĩ giitũ arĩa marahunjia ũhoro mwega mategũtiga.—Atũm. 5:42.