GĨCUNJĨ KĨA WĨRUTI GĨA 9
RWĨMBO NA. 51 Nĩ Twĩyamũrĩire Ngai!
Ndũkamaĩrĩrie Kũbatithio
“Nĩ kĩĩ wetereire? Ũkĩra, ũbatithio.”—ATŨM. 22:16.
ŨNDŨ ŨRĨA WARĨRĨIRIO
Ũrĩa cionereria cia Asamaria, Saulu wa Tariso, Korinelio, na Akorintho, ingĩgũteithia gũkorũo na hinya ũrĩa ũrabatara nĩguo ũkinyĩrĩre kũbatithio.
1. Nĩ itũmi irĩkũ imwe itũmaga tũbatithio?
HIHI nĩ wendete Jehova, Ngai ũrĩa ũkũheete kĩheo o gĩothe kĩega, nginya kĩheo kĩa muoyo? Hihi no wende kũmuonia atĩ nĩ ũmwendete? Njĩra ĩrĩa njega biũ ũngĩonania nayo atĩ nĩ ũmwendete nĩ kũmwĩyamũrĩra na kuonania wĩyamũrĩri ũcio kũgerera kũbatithio. Rĩrĩa weka ũguo, ũtuĩkaga wa famĩlĩ ya Jehova. Nĩ ũndũ ũcio, Jehova Ithe witũ na Mũrata witũ nĩ arĩgũtongoragia na agakũrũmbũyia tondũ ũrĩ wa famĩlĩ yake. (Thab. 73:24; Isa. 43:1, 2) Ningĩ rĩrĩa weyamũrĩra Jehova na wabatithio nĩ ũgĩaga na kĩĩrĩgĩrĩro gĩa gũgatũũra tene na tene.—1 Pet. 3:21.
2. Tũkwarĩrĩria maũndũ marĩkũ gĩcunjĩ-inĩ gĩkĩ?
2 Hihi nĩ harĩ ũndũ ũrakũgirĩrĩria kũbatithio? Angĩkorũo nĩ harĩ, ndũrĩ wiki. Andũ aingĩ nĩ mabatarĩte kũgarũrĩra mĩthiĩre yao na mwĩcirĩrie wao nĩguo magĩrĩre kũbatithio. Na rĩu maratungatĩra Jehova marĩ na kĩyo na gĩkeno. Nĩ maũndũ marĩkũ ũngĩĩruta kuumana na andũ amwe maabatithirio karine-inĩ ya mbere? Reke tuone mĩhĩnga ĩrĩa maacemanirie nayo na ũrĩa tũngĩĩruta kuumana na kĩonereria kĩao.
ASAMARIA NĨ MAABATITHIRIO
3. Nĩ mĩhĩnga ta ĩrĩkũ ĩngĩagirĩrĩirie Asamaria amwe kũbatithio?
3 Matukũ-ini ma Jesu nĩ kwarĩ na ndini ya Asamaria na aingĩ ao maaikaraga mwena wa rũgongo wa Judea. Nĩguo Asamaria acio mabatithio, nĩ maabataraga kũgĩa na ũmenyo wa maandĩko mothe ma Kiugo kĩa Ngai. Meetĩkĩtie atĩ mabuku marĩa ma mbere matano ma Bibilia, kuuma Kĩambĩrĩria nginya Gũcokerithia Maathani, nomo tu maatongoretio nĩ roho wa Ngai, na hihi ibuku rĩa Joshua. O na kũrĩ ũguo, nĩ meerĩgagĩrĩra gũka kwa Mesia ta ũrĩa Ngai eeranĩire thĩinĩ wa Gũcokerithia Maathani 18:18, 19. (Joh. 4:25) Nĩguo mabatithio, nĩ maabataraga gwĩtĩkia atĩ Jesu nĩwe warĩ Mesia ũrĩa weranĩirũo. Na ũguo nĩguo “Asamaria aingĩ” meekire. (Joh. 4:39) No kũhoteke amwe ao nĩ maabatarire kweheria mũthutũkanio ũrĩa maarĩ naguo kwerekera Ayahudi.—Luk. 9:52-54.
4. Kũringana na Atũmwo 8:5, 6, 14, Asamaria amwe maiyũkirie atĩa ndũmĩrĩri ya Filipu?
4 Nĩ kĩĩ gĩateithirie Asamaria gũkinyĩrĩra kũbatithio? Rĩrĩa Filipu aamahunjĩirie “ũhoro wa Kristo,” Asamaria amwe nĩ ‘meetĩkĩrire kiugo kĩa Ngai.’ (Thoma Atũmwo 8:5, 6, 14.) Matiaregire gũthikĩrĩria Filipu atĩ tondũ aarĩ Mũyahudi. No kũhoteke nĩ maaririkanaga ũrĩa Maandĩko maaugĩte atĩ Ngai ndarĩ mũthutũkanio. (Gũcok. 10:17-19) Nĩ ‘maategagĩra Filipu matũ akĩaria’ ũhoro wĩgiĩ Kristo. Ningĩ Filipu nĩ aaringaga ciama nyingĩ ta kũhonia arwaru na kũingata ndaimono. (Atũm. 8:7) Kwoguo maarĩ na ũira mũiganu atĩ Filipu aatũmĩtwo nĩ Ngai.
5. Nĩ maũndũ marĩkũ ũngĩĩruta kuumana na Asamaria?
5 Asamaria acio nĩ mangĩarekire mũthutũkanio kana kwaga ũmenyo kũmagirĩrĩrie gũthiĩ na mbere kwĩruta. No matiarekire ũndũ ũcio ũmagirĩrĩrie. Matiamaĩrĩirie kũbatithio thutha wa gũkorũo na ma atĩ Filipu aamarutaga ũhoro wa ma. Bibilia yugaga ũũ: “Rĩrĩa meetĩkirie Filipu, o we ũcio wahunjagia ũhoro mwega wa Ũthamaki wa Ngai na wĩgiĩ rĩĩtwa rĩa Jesu Kristo-rĩ, arũme o hamwe na atumia nĩ maabatithirio.” (Atũm. 8:12) Hihi nĩ wĩtĩkĩtie atĩ Kiugo kĩa Ngai nĩ kĩa ma? Hihi nĩ wĩtĩkĩtie atĩ Aira a Jehova matikoragwo na mũthutũkanio na atĩ nĩ merutanagĩria kuonania wendo, ngumo ĩrĩa ĩmenyithanagia Akristiano a ma? (Joh. 13:35) Angĩkorũo nĩ wĩtĩkĩtie ũguo, ndũkamaĩrĩrie kũbatithio. Korũo na ma atĩ Jehova nĩ egũkũrathima.
6. Ũreruta atĩa kuumana na kĩonereria kĩa Ruben?
6 Mũrũ wa Ithe witũ Ruben ũrĩa ũikaraga Njĩrĩmani, aarereirũo famĩlĩ-inĩ ya Aira a Jehova. No arĩ mũnini nĩ eekagĩrĩra nganja kana nĩ kũrĩ Ngai. Nĩ kĩĩ kĩamũteithirie kũniina nganja icio? Nĩ aamenyire atĩ ndaarĩ na ũmenyo mũiganu wĩgiĩ ũndũ ũcio na kwoguo agĩtua itua rĩa kwĩruta makĩria. Aaugire ũũ: “Wĩruti-inĩ wakwa kĩũmbe nĩ ndeekire ũthuthuria nĩguo menye ũhoro ũrĩa wa ma. Nĩ ndabatarire gũthuthuria maita maingĩ ũrutani wĩgiĩ indo kwĩyumĩria.” Ruben nĩ aathomire ibuku rĩa Je, Kuna Muumba Anayekujali? na rĩkĩmũteithia na njĩra nene. Nĩ oonire atĩ hatarĩ nganja Jehova arĩ kuo. Na hĩndĩ ĩmwe aceerete wabici nene ya Aira a Jehova, nĩ aakenirio mũno nĩ ũrũmwe wa aarĩ na ariũ a Ithe witũ wa thĩ yothe. Thutha wake gũcoka Njĩrĩmani, Ruben nĩ aabatithirio arĩ na mĩaka 17. Angĩkorũo nĩ wĩkagĩrĩra nganja maũndũ marĩa wĩrutĩte, ĩka ũthuthuria mabuku-inĩ maitũ. Kũgĩa na “ũmenyo wa ma” no gũgũteithie kũniina nganja. (Ef. 4:13, 14) Na rĩrĩa weiguĩra ũhoro wĩgiĩ wendo na ũrũmwe ũrĩa ũkoragwo gatagatĩ-inĩ ka andũ a Jehova thĩinĩ wa mabũrũri mangĩ na weyonera ũndũ ũcio kĩũngano-inĩ kĩanyu, wendo waku harĩ aarĩ na ariũ a Ithe witũ nĩ ũrĩongererekaga.
SAULU WA TARISO NĨ AABATITHIRIO
7. Nĩ mwĩcirĩrie ũrĩkũ Saulu aabataraga kũgarũrĩra?
7 Ta wĩcirie ũhoro wĩgiĩ Saulu wa Tariso. Nĩ aathiaga na mbere wega maũndũ-inĩ ma ndini ya Kĩyahudi na akagĩa na igweta gatagatĩ-inĩ ka Ayahudi. (Gal. 1:13, 14; Afil. 3:5) Ihinda-inĩ rĩu, Ayahudi aingĩ moonaga Akristiano marĩ aregenyũki, na kwoguo Saulu nĩ aamanyariraga mũno. Eeciragia atĩ eekaga wendi wa Ngai, no nĩ aahĩtĩtie. (Atũm. 8:3; 9:1, 2; 26:9-11) Nĩguo etĩkie Jesu na abatithio atuĩke Mũkristiano, Saulu nĩ aabataraga gũkorũo ehaarĩirie kũnyarirũo.
8. (a) Nĩ kĩĩ gĩateithirie Saulu gũkinyĩrĩra kũbatithio? (b) Kũringana na Atũmwo 22:12-16, Anania aateithirie Saulu atĩa? (Ningĩ rora mbica.)
8 Nĩ kĩĩ gĩateithirie Saulu gũkinyĩrĩra kũbatithio? Rĩrĩa Jesu aarĩirie Saulu kuuma igũrũ, ũtheri mũnene nĩ wamũmũrĩkire nginya agĩtuĩka mũtumumu. (Atũm. 9:3-9) Kwa ihinda rĩa thikũ ithatũ, Saulu nĩ eehingire kũrĩa na kũnyua na no mũhaka akorũo nĩ eecũranirie ũhoro wĩgiĩ ũndũ ũcio wamũkorete. Ũndũ ũcio nĩ wamũteithirie gũkorũo na ma atĩ Jesu nĩwe warĩ Mesia na atĩ arũmĩrĩri ake nĩo maarĩ na ũthathaiya ũrĩa wa ma. No mũhaka akorũo Saulu nĩ aaiguire ũũru mũno nĩ ũndũ wa kũnyita mbaru kũũragwo kwa Stefano. (Atũm. 22:20) Thutha wa thikũ icio ithatũ, mũrutwo ũmwe wetagwo Anania nĩ aathiire kũrĩ Saulu, akĩmũcokeria ũhoti wake wa kuona, na akĩmwĩkĩra ngoro abatithio atekũmaĩrĩria. (Thoma Atũmwo 22:12-16.) Saulu nĩ eetĩkĩrire ũteithio ũcio arĩ na wĩnyihia na akĩbatithio.—Atũm. 9:17, 18.
Hihi nĩ ũgwĩtĩkĩra kũbatithio o ta Saulu? (Rora kĩbungo gĩa 8)
9. Nĩ maũndũ marĩkũ ũngĩĩruta kuumana na Saulu?
9 Nĩ harĩ maũndũ tũngĩĩruta kuumana na Saulu. Nĩ angĩetĩkĩririe mwĩtĩo kana gwĩtigĩra andũ kũmũgirĩrĩrie kũbatithio, no ndeekire ũguo. Saulu aarĩ na wĩnyihia na nĩ eehaarĩirie gwĩka mogarũrũku ũtũũro-inĩ wake nĩguo akorũo arĩ mũrũmĩrĩri wa Kristo. (Atũm. 26:14, 19) Saulu ndetigĩrire gũtuĩka Mũkristiano o na gũtuĩka nĩ aamenyaga atĩ nĩ angĩanyaririrũo. (Atũm. 9:15, 16; 20:22, 23) Thutha wa kũbatithio, nĩ aathiire na mbere kwĩhoka atĩ Jehova nĩ angĩamũteithirie gũkirĩrĩria magerio. (2 Kor. 4:7-10) O nawe wĩtĩkio waku no ũgerio kana ũcemanie na ũkararia thutha wa kũbatithio. O na kũrĩ ũguo, no ũkorũo na ma atĩ hingo ciothe Ngai na Kristo nĩ marĩkũheaga ũteithio ũrĩa ũrabatara, nĩguo ũhote gũkirĩrĩria na gũikara ũrĩ mwĩhokeku.—Afil. 4:13.
10. Ũreruta atĩa kuumana na kĩonereria kĩa Anna?
10 Mwarĩ wa Ithe witũ Anna aarereirũo mwena wa irathĩro wa Europe. Thutha wa nyina kũbatithio, Anna nĩ aambĩrĩirie kwĩruta Bibilia arĩ na mĩaka 9 thutha wa kũheo rũtha nĩ ithe. O na kũrĩ ũguo, andũ a famĩlĩ ciao arĩa maaikaranagia nao nĩ maambĩrĩirie kũmũũkĩrĩra. Moonaga ũrĩ ũndũ wa gĩconoko mũndũ gũtiga ndini ya maithe mao ma tene. Rĩrĩa Anna aarĩ na mĩaka 12, nĩ aahoire baba wao rũtha rwa kũbatithio. Baba wao nĩ eendaga kũmenya kana rĩu rĩarĩ itua rĩa Anna kana harĩ mũndũ wamũtindĩkagĩrĩria gwĩka ũguo. Anna aamwĩrire atĩ eendaga kũbatithio tondũ nĩ endete Jehova, na baba wao akĩmwĩtĩkĩria. Thutha wa kũbatithio, andũ acio a famĩlĩ ciao nĩ maathiire na mbere kũmũnyũrũria na kũmwĩka maũndũ moru. Ũmwe wao aamwĩrire ũũ: “Nĩ kaba ũtũũre mũtũũrĩre wa ũũra-thoni na wa kũnyua thigara, handũ ha gũtuĩka Mũira wa Jehova.” Anna aahiũranirie atĩa na maũndũ macio? Aaugire, “Jehova nĩ aandeithirie gũikara ndĩhandĩte, na aciari akwa nĩ maandiirĩrĩire mũno.” Anna nĩ andĩkĩte handũ mahinda marĩa aneyonera guoko kwa Jehova ũtũũro-inĩ wake. Kaingĩ nĩ aikaraga akĩroraga ũhoro ũcio nĩguo ndakariganĩrũo nĩ ũrĩa Jehova amũteithĩtie. Angĩkorũo nĩ wĩtigagĩra gũkarario, ririkana atĩ o nawe Jehova nĩ arĩgũteithagia.—Ahib. 13:6.
KORINELIO NĨ AABATITHIRIO
11. Nĩ kĩĩ kĩngĩagirĩrĩirie Korinelio kũbatithio?
11 Ningĩ Bibilia nĩ yarĩtie ũhoro wa Korinelio. Aarĩ “mũnene wa thigari 100” cia mbũtũ ya Roma. (Atũm. 10:1, kohoro ka magũrũ-inĩ.) Nĩ ũndũ ũcio, kwahoteka aarĩ na igweta itũũra-inĩ na mbũtũ-inĩ. Ningĩ nĩ “aaheaga andũ iheo nyingĩ cia tha.” (Atũm. 10:2) Jehova nĩ aatũmire mũtũmwo Petero kũrĩ Korinelio nĩguo akamũhunjĩrie ũhoro ũrĩa mwega. Hihi Korinelio nĩ eetĩkĩririe gaturũa gake kamũgirĩrĩrie kũbatithio?
12. Nĩ kĩĩ gĩateithirie Korinelio gũkinyĩrĩra kũbatithio?
12 Nĩ kĩĩ gĩateithirie Korinelio gũkinyĩrĩra kũbatithio? Bibilia yugaga atĩ we “hamwe na andũ othe a nyũmba yake nĩ meetigĩrĩte Ngai.” Ningĩ Korinelio nĩ aathaithaga Ngai ategũtigithĩria. (Atũm. 10:2) Rĩrĩa Petero aahunjĩirie Korinelio ũhoro ũrĩa mwega, we hamwe na famĩlĩ yake nĩ meetĩkirie Jesu na makĩbatithio o rĩo. (Atũm. 10:47, 48) Hatarĩ nganja Korinelio nĩ eehaarĩirie gwĩka mogarũrũku marĩa maabataranagia, nĩguo athathaiye Jehova arĩ hamwe na famĩlĩ yake.—Josh. 24:15; Atũm. 10:24, 33.
13. Nĩ maũndũ marĩkũ ũngĩĩruta kuumana na Korinelio?
13 O ta Saulu, Korinelio nĩ angĩetĩkĩririe gaturũa gake kamũgirĩrĩrie gũtuĩka Mũkristiano, no ndarekire gũthiĩ ũguo. Hihi nĩ ũrabatara gwĩka mogarũrũku manene nĩguo wagĩrĩre kũbatithio? Angĩkorũo nĩguo kũrĩ, Jehova nĩ egũgũteithia. Nĩ egũkũrathima angĩkorũo nĩ ũtuĩte itua rĩa kũhũthĩra motaaro ma Bibilia ũtũũro-inĩ waku nĩguo ũmũtungatĩre.
14. Ũreruta atĩa kuumana na kĩonereria kĩa Suyoshi?
14 Mũrũ wa Ithe witũ Suyoshi ũrĩa ũikaraga Japan, nĩ aabataraga gwĩka ũgarũrũku wĩra-inĩ wake nĩguo agĩrĩre kũbatithio. Aarĩ mũnini wa mwarimũ mũnene wa cukuru ya Ikenobo ĩrĩa ĩrutanaga ũhoro wa kũbanga mahũa. Hĩndĩ ya mathiko, mwarimũ mũnene nĩ angĩabangire mahũa, na anyitanĩre magongona-inĩ ma ndini ya Buddha. Na rĩrĩa aremwo gũthiĩ, Suyoshi nĩwe wamũrũgamagĩrĩra na akanyitanĩra magongona-inĩ macio. O na kũrĩ ũguo, rĩrĩa Suyoshi eerutire ũhoro wa ma wĩgiĩ akuũ, nĩ aamenyire atĩ kũnyitanĩra magongona-inĩ macio nĩ kũngĩamũgirĩrĩirie kũbatithio. Nĩ aatuire itua rĩa kwaga kũnyitanĩra na maũndũ macio ma ndini ya Buddha. (2 Kor. 6:15, 16) Suyoshi nĩ aaririe na mwarimũ mũnene igũrũ rĩgiĩ ũndũ ũcio. Maumĩrĩro maarĩ marĩkũ? Suyoshi nĩ aathiire na mbere na wĩra wake atekũnyitanĩra magongona-inĩ macio. Nĩ aabatithirio kĩndũ mwaka ũmwe thutha wa kwambĩrĩria kwĩruta Bibilia.a Angĩkorũo nĩ ũrabatara gwĩka ũgarũrũku wĩra-inĩ waku nĩguo ũkenie Ngai, korũo na ma atĩ nĩ arĩkũhingagĩria mabataro maku na ma famĩlĩ yaku.—Thab. 127:2; Mat. 6:33.
AKORINTHO NĨ MAABATITHIRIO
15. Nĩ mĩhĩnga ĩrĩkũ ĩngĩagirĩrĩirie Akorintho kũbatithio?
15 Andũ a itũũra rĩa Korintho nĩ maatengʼeranagia mũno na indo cia kĩĩmwĩrĩ na maaikaraga mũtũũrĩre wa ũũra-thoni. Andũ aingĩ a kũu meekaga maũndũ matarĩ metĩkĩrĩku nĩ Ngai. Kwoguo ndũngĩarĩ ũndũ mũhũthũ harĩ mũndũ waikaraga itũũra-inĩ rĩu kwambĩrĩria gũtungatĩra Jehova. No rĩrĩa mũtũmwo Paulo aathiire itũũra-inĩ rĩu na akĩmahunjĩria ũhoro mwega wĩgiĩ Kristo, “andũ aingĩ a Korintho arĩa maaiguire . . . makĩambĩrĩria gwĩtĩkia na makĩbatithio.” (Atũm. 18:7-11) Thutha ũcio Jesu nĩ aaumĩrĩire Paulo kĩoneki-inĩ akĩmwĩra: “Ndĩ na andũ aingĩ thĩinĩ wa itũũra rĩrĩ.” Kwoguo Paulo agĩthiĩ na mbere kũmahunjĩria kwa ihinda rĩa mwaka ũmwe na nuthu.
16. Nĩ kĩĩ gĩateithirie andũ amwe a Korintho gũkinyĩrĩra kũbatithio? (2 Akorintho 10:4, 5)
16 Nĩ kĩĩ gĩateithirie Akorintho gũkinyĩrĩra kũbatithio? (Thoma 2 Akorintho 10:4, 5.) Kiugo kĩa Ngai o hamwe na roho wake mũtheru ũrĩ hinya nĩ ciamateithirie gwĩka mogarũrũku manene ũtũũro-inĩ wao. (Ahib. 4:12) Andũ a Korintho arĩa meetĩkĩrire ũhoro ũrĩa mwega wĩgiĩ Kristo, nĩ maahotire gũtigana na maũndũ moru marĩa meekaga, ta ũrĩĩu, ũici, na ngomanio cia andũ a mũthemba ũmwe.—1 Kor. 6:9-11.b
17. Ũreruta atĩa kuumana na andũ a Korintho?
17 O na gũtuĩka andũ amwe a Korintho nĩ maabataraga gwĩka mogarũrũku manene, matiaugire atĩ matingĩhota gwĩka mogarũrũku macio nĩguo matuĩke Akristiano. Nĩ meerutanĩirie mũno nĩguo magerere njĩra-inĩ ngunderu ĩrĩa ĩkinyagia andũ muoyo-inĩ wa tene na tene. (Mat. 7:13, 14) Hihi nĩ ũraritũhĩrũo gũtigana na mũtugo mũna mũũru ũrĩa ũrakũgirĩrĩria kũbatithio? Ndwagĩrĩirũo gũkua ngoro. Thiĩ na mbere kũhoya Jehova akũhe roho wake mũtheru nĩguo ũhote kũregana na merirĩria ma gwĩka ũndũ ũrĩa ũtagĩrĩire.
18. Ũreruta atĩa kuumana na kĩonereria kĩa Monika?
18 Monika ũrĩa ũikaraga bũrũri wa Georgia, nĩ eerutanĩirie biũ gũtigana na mĩario ĩtarĩ mĩtheru na maũndũ matagĩrĩire ma gwĩkenia nĩguo agĩrĩre kũbatithio. Aaugire: “Rĩrĩa ndaarĩ tinĩnja, mahoya nĩ maaheire hinya ũrĩa ndaabataraga nĩguo hote kũgarũrĩra. Jehova nĩ ooĩ atĩ nĩ ndeendaga gwĩka ũrĩa kwagĩrĩire, na hingo ciothe nĩ aandeithagia na akandongoria.” Monika nĩ aabatithirio arĩ na mĩaka 16. Hihi nĩ harĩ mĩtugo ũrabatara gũtigana nayo nĩguo ũtungata waku wĩtĩkĩrĩke nĩ Jehova? Thiĩ na mbere kũmũhoya akũhe hinya wa gwĩka mogarũrũku. Jehova nĩ arĩkũheaga roho wake mũtheru arĩ na ũtaana.—Joh. 3:34.
WĨTĨKIO WAKU NO ŨTHAMIE KĨRĨMA
19. Nĩ kĩĩ kĩngĩgũteithia gũtooria mĩhĩnga nginya ĩrĩa ĩigana kĩrĩma? (Ningĩ rora mbica.)
19 Gũtekũmakania maũndũ marĩa marakũgirĩrĩria kũbatithio, korũo na ma atĩ Jehova nĩ akwendete na nĩ endaga ũkorũo thĩinĩ wa famĩlĩ yake. Jesu eerire arutwo amwe ake ũũ: “Mũngĩrĩ na wĩtĩkio ũigana mbegũ ya karatarĩ, no mũhote kwĩra kĩrĩma gĩkĩ, ‘Ehera haha ũthiĩ haarĩa,’ nakĩo kĩehere, na gũtirĩ ũndũ ũngĩmũrema.” (Mat. 17:20) Arutwo acio maakoretwo hamwe na Jesu kwa ihinda rĩa mĩaka mĩnini, na kwoguo nĩ maabataraga kuongerera wĩtĩkio wao. No Jesu nĩ aamaheire ũũma atĩ mangĩakũririe wĩtĩkio mũiganu, Jehova nĩ angĩamateithirie gũtooria mĩhĩnga nginya ĩrĩa ĩigana kĩrĩma. Na o nawe Jehova nĩ arĩgũteithagia gwĩka ũguo.
Korũo na ma atĩ Jehova nĩ akwendete na nĩ endaga ũkorũo thĩinĩ wa famĩlĩ yake (Rora kĩbungo gĩa 19)c
20. Cionereria cia Akristiano a karine ya mbere na a mahinda maya iria igwetetwo gĩcunjĩ-inĩ gĩkĩ ciagwĩkĩra ngoro atĩa?
20 Angĩkorũo harĩ na mĩhĩnga ĩrakũgirĩrĩria kũbatithio, oya makinya marĩa marabatarania ũtekũmaĩrĩria. No ũmĩrĩrio na wĩkĩrũo hinya nĩ cionereria cia Akristiano a karine ya mbere na a mahinda maya. Kĩonereria kĩao kĩrogwĩkĩra ngoro na gĩgũtindĩke kwĩyamũrĩra Jehova na kũbatithio. Rĩu nĩrĩo itua rĩrĩa rĩega biũ ũngĩtua!
RWĨMBO NA. 38 Nĩ Arĩkũheaga Hinya
a No wone rũgano rwa ũtũũro rwa Mũrũ wa Ithe Witũ Suyoshi Fujii thĩinĩ wa ngathĩti ya Amkeni! ya Agosti 8, 2005, kar. 20-23.
b Wĩrorere video ya ‘Nĩ Kĩĩ Kĩragiria Ũbatithio?’ thĩinĩ wa jw.org/ki.
c GŨTAARĨRIA MBICA: Aarĩ na ariũ a Ithe witũ makenete makĩnyita ũgeni andũ arĩa makorũo mabatithio.