Nũũ Ũkaahonokia Thĩ?

Andũ aingĩ nĩ maratangĩka nĩ ũndũ wa kuona ũrĩa andũ marathũkangia thĩ o hamwe na indo iria irĩ muoyo. Kũringana na ataaramu amwe a maũndũ marĩa matũrigicĩirie, ciĩko cia andũ nĩ iratũma indo nyingĩ irĩ muoyo ikorũo ũgwati-inĩ wa gũthira na igathũkangia mĩmera na nyamũ nyingĩ gũkĩra hĩndĩ ĩngĩ o yothe.

Hihi andũ nĩ mekwananga thĩ? Kana hihi nĩ kũrĩ hĩndĩ makaahota gũtũũra na njĩra matarathũkangia ũũmbi?

Hihi kĩyo kĩa andũ nĩ gĩkũgaacĩra?

Ataaramu aingĩ makoragwo na ma atĩ andũ no mahote kũgitĩra thĩ na matũũre na njĩra matarathũkangia ũũmbi. Athuthuria amwe maugaga atĩ nĩguo kĩyo kĩa andũ kĩgaacĩre, no mũhaka gwĩkwo mogarũrũku maũndũ-inĩ maigana ũna na mekwo ihinda-inĩ rĩmwe. Mogarũrũku macio nĩ ta:

Kwagagĩria ũrĩa andũ mamenyagĩrĩra mĩgũnda, mĩtitũ, matomboya, na maria.
Kũhũthĩra njĩra ngũrani cia ũrĩmi na gũcaria ihumo ingĩ cia hinya wa thitima.
Kũgarũrĩra ũrĩa irio irathondekwo na gũkinyĩrio andũ nĩguo andũ makarĩaga kaingĩ irio iria ciumanĩte na mĩmera, makarĩaga o mũigana mũnini wa nyama na thamaki, makarĩaga irio nini na makaga gũitanga irio nyingĩ.
Gwĩtĩkĩra atĩ ũtũũro mwega ndũkoragwo wĩhocetie harĩ gũkorũo na indo nyingĩ cia kĩĩmwĩrĩ.

Ũgwĩciria atĩa? Hihi no twĩrĩgĩrĩre thirikari itiganĩte, mathondeka ma biacara, na andũ othe manyitanĩre na gĩkĩro kĩnene gũkĩra hĩndĩ ĩngĩ o yothe? Kana hihi nĩ ũkuona ta ũndũ ũcio ũngĩrema nĩ ũndũ wa ũrĩa andũ amwe makoragwo na ũkoroku, mwĩyendo, na makaga gwĩciria ũhoro wa ihinda rĩũkĩte?—2 Timotheo 3:1-5.

Kũrĩ na mwĩhoko

Bibilia nĩ ĩtũteithagia gũkorũo na ma na ihinda rĩega rĩũkĩte rĩa thĩ ĩno itũ. Nĩ ĩtaaragĩria kĩrĩa gĩtũmaga kĩyo kĩa andũ gĩkorũo gĩtarĩ kĩiganu harĩ kũhonokia thĩ, na ũgarũrũku ũrĩa arĩ o mũhaka wĩkwo. Ningĩ nĩ ĩtaaragĩria ũrĩa ũgarũrũku ũcio ũgekĩka.

Nĩ kĩĩ gĩtũmaga kĩyo kĩa andũ gĩkorũo gĩtarĩ kĩiganu harĩ kũhonokia thĩ? Jehovaa Ngai oombire thĩ, na akĩhe andũ wĩra wa kũmĩrũmbũyagia. (Kĩambĩrĩria 1:28; 2:15) Nĩ mangĩagaacĩrire wĩra-inĩ ũcio korũo nĩ meehokire Mũũmbi wao amatongorie na maathĩkĩre motaaro make. (Thimo 20:24) O na kũrĩ ũguo, nĩ maaregire gũtongorio nĩ Jehova, na makĩambĩrĩria gwĩtuagĩra matua o ene. (Kohelethu 7:29) No andũ matirĩ na ũhoti wa kũrũmbũiya thĩ o ene, na o na mangĩĩrutanĩria atĩa, matingĩgaacĩra na gĩkĩro kĩnene.—Thimo 21:30; Jeremia 10:23.

Ũgarũrũku ũrĩa ũrabatara gwĩkwo. Ngai nĩ abangĩte gũkaagirĩrĩria andũ matige kwananga thĩ. (Kũguũrĩrio 11:18) Ndakaagagĩria thirikari na mathondeka marĩa marananga thĩ; nĩ kũmaniina akaamaniina. (Kũguũrĩrio 21:1) Nĩ ũndũ ũcio, Jehova augĩte ũũ: “Atĩrĩrĩ, nĩ kwerũhia ndĩrerũhia maũndũ mothe.”—Kũguũrĩrio 21:5.

Ũrĩa ũgarũrũku ũcio ũgeekĩka. Jehova akeeheria thirikari cia andũ na ithenya rĩa cio arehe thirikari ya igũrũ ĩrĩa ĩtagwo Ũthamaki wa Ngai. Thirikari ĩyo, ĩgĩtongorio nĩ Jesu Kristo, nĩ ĩgaatha thĩ yothe.—Danieli 2:44; Mathayo 6:10.

Ũthamaki wa Ngai nĩ ũkaaruta andũ gũtũũra kũringana na ithimi cia Ngai cia ũthingu. Rĩrĩa andũ magaataũkĩrũo nĩ Mũũmbi wao na marũmĩrĩre ũtongoria wake, nĩ makaahota gũtũũrania wega na ũũmbi ũrĩa ũngĩ ũrĩ thĩinĩ wa thĩ. (Isaia 11:9) Bibilia nĩ ĩtaaragĩria ũrĩa thirikari ya Ngai ĩkaahotithia raia ayo gũkenera ũtũũro mwega biũ, ũtũũro ũtakaananga thĩ. Thirikari ĩyo ĩgeeka maũndũ maya:

Kũhe andũ othe irio cia kũigana.—Thaburi 72:16.
Gũcokereria ũũmbi ũrĩa wothe ũthũkangĩtio.—Isaia 35:1, 2, 6, 7.
Gũtigĩrĩra atĩ andũ nĩ mararũmbũiya nyamũ na atĩ nyamũ itiragera andũ ngero.—Isaia 11:6-8; Hosea 2:18.
Kũgirĩrĩria icanjama cia ndũire.—Mariko 4:37-41.

No wĩrĩgĩrĩre atĩ Ũthamaki wa Ngai nĩ ũkũrehe mogarũrũku macio ica ikuhĩ. Nĩguo wone ũhoro makĩria, thoma gĩcunjĩ kĩrĩ na kĩongo “Ũthamaki wa Ngai Ũgaathana Thĩinĩ wa Thĩ Rĩ?”

a Jehova nĩrĩo rĩĩtwa rĩa Ngai.—Thaburi 83:18.

Tũngĩka atĩa ihinda-inĩ rĩrĩ nĩguo tuonanie atĩ nĩ tũtĩĩte thĩ ĩno itũ?

O twetererie Ũthamaki wa Ngai ũũke gũthondeka biũ kũrĩa thĩ ĩthũkangĩtio, no twĩke ũrĩa wothe tũngĩhota ihinda-inĩ rĩrĩ kuonania atĩ nĩ tũtĩĩte thĩ ĩno itũ. Kwa ngerekano, no twĩtheme ũitangi wa indo, na twathĩkĩre mawatho ma gwitũ megiĩ kwaga gũte indo iria ingĩhũthĩka na njĩra ĩngĩ.—Johana 6:12, 13; Aroma 13:1, 5.

Brett aarĩ mũtaarani wa maũndũ marĩa matũrigicĩirie. Gĩthomo gĩake kĩgiĩ ũũmbi nĩ kĩamũteithirie gũtaũkĩrũo atĩ nĩ kũrĩ Mũũmbi ũrĩa ũkooya ikinya rĩa kũhonokia thĩ. Thoma rũgano rwake.
Ũndũ ũmwe Aira a Jehova monanagia naguo atĩ nĩ matĩĩte Mũũmbi wao nĩ kũhũthĩra njĩra itarathũkangia thĩ rĩrĩa maraaka mĩako mĩnene. Nĩguo wone maũndũ marĩa mahingĩtie, wĩrorere video ya Mĩako Ĩgoocithagia Jehova.

Mĩhari ya Bibilia ĩgiĩ thĩ

Kĩambĩrĩria 2:15: “Jehova Ngai akĩoya mũndũ ũcio na akĩmũiga mũgũnda-inĩ wa Edeni nĩguo aũrĩmage na aũrũmbũyagie.”

Ũrutani: Ngai nĩ aaheire andũ wĩra wa kũrũmbũiya thĩ.

Kĩambĩrĩria 1:28: “Ngai akĩmarathima, na Ngai akĩmeera ũũ: ‘Ciaranai na mũingĩhe, mũiyũrie thĩ na mũmĩtoorie, mwathage thamaki cia iria-inĩ na ciũmbe iria ciũmbũkaga na kĩũmbe o gĩothe kĩrĩ muoyo gĩthiagĩra thĩ.’”

Ũrutani: Ngai nĩ aaheire andũ wĩra wa kũrũmbũiya nyamũ.

Isaia 45:18: “Ũũ nĩguo Jehova oigĩte, o we Mũũmbi wa igũrũ, Ngai ũrĩa wa ma, ũrĩa wombire thĩ, Mũũmbi wayo ũrĩa wamĩrũmirie wega, na ndaamĩũmbire hatarĩ gĩtũmi, ĩndĩ aamĩũmbire nĩguo ĩtũũragwo: ‘Niĩ nĩ niĩ Jehova, na gũtirĩ ũngĩ.’”

Ũrutani: Muoroto wa Ngai harĩ thĩ ndũcenjetie. Nĩ ĩgaikarũo nĩ andũ mareka o ũrĩa aabangĩte kĩambĩrĩria-inĩ.

Thaburi 37:29: “Andũ arĩa athingu nĩ makaagaya thĩ, na magaatũũra thĩinĩ wayo tene na tene.”

Ũrutani: Arĩa marũmagĩrĩra ithimi cia Ngai cia ũthingu nĩ magaakorũo na mweke wa gũtũũra tene na tene thĩinĩ wa thĩ.

Thaburi 98:6-8: “Anĩrĩrai nĩ ũndũ wa ũhootani mbere ya Jehova, o we Mũthamaki. Iria nĩ rĩrurume o na kĩrĩa gĩothe kĩiyũrĩte thĩinĩ warĩo, o na thĩ na arĩa maikaraga thĩinĩ wayo. Njũũĩ nĩ ihũũre hĩ; irĩma nĩ cianĩrĩre ikenete irĩ hamwe.”

Ũrutani: Ũũmbi wothe nĩ ũkaagunĩka kuumana na wathani wa Ngai.