Bibilia Yugaga Atĩa Igũrũ Rĩgiĩ Gwĩkĩrũo Thakame?

Macokio ma Bibilia

Bibilia nĩ ĩgirĩtie andũ kũrĩa thakame. Nĩ ũndũ ũcio, tũtiagĩrĩirũo nĩ kũrĩa thakame ĩrĩ yothe kana icunjĩ ciayo, o na kana gwĩkĩrũo mĩkiha-inĩ. Ta rora wone ũrĩa Bibilia yugĩte:

• Kĩambĩrĩria 9:4. Thutha wa mũiyũro, Ngai nĩ aaheire Nuhu na famĩlĩ yake rũtha rwa kũrĩaga nyama, no akĩmagiria kũrĩa thakame. Ngai eerire Nuhu ũũ: “Mũtikanarĩanĩrie nyama hamwe na muoyo wacio.” Watho ũcio ũhũthĩkaga kũrĩ andũ othe tondũ ithuothe tũrĩ njiarũa cia Nuhu.

• Maũndũ ma Alawii 17:14. “Mũtikanarĩe thakame ya mũthemba o na ũrĩkũ wa nyamũ; nĩ gũkorũo muoyo wa kĩndũ o gĩothe kĩrĩa kĩĩ naguo wĩ thĩinĩ wa thakame yakĩo; nake mũndũ o wothe ũrĩa ũkamĩrĩa nĩakaingatwo athengio biũ.” Muoyo nĩ wa Ngai, na awonaga ũrĩ thakame-inĩ. O na gũtuĩka watho ũcio wahetwo ciana cia Isiraeli, nĩ wonanagia ũrĩa Ngai oyaga na ũritũ ũhoro wa kũrĩa thakame.

• Atũmwo 15:20. ‘Mwĩthemage thakame.’ Ngai nĩ aaheire Akristiano watho o ta ũcio aahete Aisiraeli. Historĩ nĩ yonanagia atĩ Akristiano a karine ya mbere nĩ meethemaga thakame ĩrĩ yothe na matiamĩhũthagĩra o na ũrigitani-inĩ.

Nĩ kĩĩ gĩtũmaga Ngai atwĩre twĩtheme thakame?

Nĩ harĩ itũmi njega ikonaine na ũgima mwega wa mwĩrĩ, iria ĩtũmaga twage gwĩkĩrũo thakame. O na kũrĩ ũguo, gĩtũmi kĩrĩa kĩnene gĩtũmaga twĩtheme thakame, nĩ tondũ Ngai nĩ atwathĩte twĩke ũguo tondũ kĩrĩa ĩrũgamagĩrĩra nĩ gĩtheru.—Maũndũ ma Alawii 17:11; Akolosai 1:20.