Hihi Bibilia no Ĩndeithie Ingĩkorũo Thuthĩkĩte Ngoro?
Macokio ma Bibilia
Ĩĩ, tondũ ũteithio ũrĩa wa ma uumaga kũrĩ “Ngai ũrĩa ũũmagĩrĩria na agekĩra ngoro na akahurũkia na agacanjamũra arĩa moorĩĩtwo nĩ hinya.”—2 Akorintho 7:6, The Amplified Bible.
Ũteithio ũrĩa Ngai aheaga arĩa morĩtwo nĩ hinya
Hinya. Ngai ‘akũhurũkagia na agagũcanjamũra,’ ti na njĩra ya gũkwehereria mathĩna, no nĩ na njĩra ya gũcokia mahoya maku rĩrĩa wamũhoya akũhe hinya wa kũhiũrania namo. (Afilipi 4:13) No ũkorũo na ma atĩ nĩ akoragwo eharĩirie gũgũthikĩrĩria tondũ Bibilia yugaga ũũ: “Jehova nĩakoragwo hakuhĩ na arĩa athuthĩku ngoro; acio maherete roho-rĩ, agakĩmahonokia.” (Thaburi 34:18) Nĩ ma, Ngai nĩ aiguaga ũgĩkaya o na angĩkorũo nĩ ũremetwo nĩ gũtaarĩria ũrĩa ũraigua ngoro-inĩ.—Aroma 8:26, 27.
Cionereria cia gũtũteithia. Mwandĩki ũmwe wa Bibilia aahoire Ngai, akiuga: “Ngũkaĩire ndĩ o kũrĩa kũriku mũno thuthĩkĩte.” Mwandĩki ũcio wa Thaburi nĩ aahotire kũhiũrania na gũthuthĩka ngoro, aririkana atĩ Jehova ndatũrekagĩrĩria tũigue tũhinyĩrĩrĩkĩte ngoro mũno nĩ ũndũ wa mahĩtia maitũ. Handũ ha ũguo, eerire Ngai ũũ: “Ũngĩtindaga ũgĩtũtarĩra mawaganu-rĩ, nũ ũngĩgĩĩtiiria? No nĩ ũtuohagĩra, nĩguo tũtũũre tũgwĩtigĩrĩte.”—Thaburi 130:1, 3, 4, Good News Translation.
Kĩĩrĩgĩrĩro. Makĩria ma gũtũũmĩrĩria mahinda-inĩ maya, Ngai nĩ eeranĩire gũkeeheria mathĩna mothe marĩa matũmaga andũ mathuthĩke ngoro. Rĩrĩa akahingia kĩĩranĩro kĩu, “maũndũ marĩa ma tene [hamwe na gũthuthĩka ngoro] matikaririkanwo, o na kana marũmbũiyo.”—Isaia 65:17.
Ririkana: O na gũtuĩka Aira a Jehova nĩ metĩkĩtie atĩ Ngai nĩwe ũmateithagia rĩrĩa mathuthĩkĩte ngoro, nĩ macaragia ũrigitani ũrĩa wagĩrĩire rĩrĩa marũara mĩrimũ ĩrĩa yumanaga na gũthuthĩka ngoro. (Mariko 2:17) O na kũrĩ ũguo, tũtirĩ njĩra o na ĩmwe ya mwanya ya ũrigitani tũgaathagĩrĩria, tondũ o mũndũ agĩrĩire gũtua itua rĩake we mwene rĩgiĩ njĩra cia ũrigitani.