Daniel

2 Momudo omutivali wepangelo laye, Nebukadnesar okwa twa eendjodi, nokwa* li a lyalyakana neenghono, ita dulu okukofa. 2 Onghee ohamba oya yandja elombwelo, opo ku ongelwe ovapristeri veemhule, ovanyanekeli, ovalodi nOvakaldea,* opo va lombwele ohamba kombinga yondjodi yayo. Onghee ove uya mo, ndele tava kala ofika koshipala shohamba. 3 Opo nee ohamba oye va lombwela ya ti: “Onda twa ondjodi nonda* lyalyakana, molwaashi onda hala okushiiva kombinga yondjodi oyo nda twa.” 4 Ovakaldea ova nyamukula ohamba melaka lOshiaramea* tava ti: “Omwene ohamba, kala nomwenyo fiyo alushe. Lombwela ovapiya voye ondjodi, nohatu ka popya efatululo.”

5 Ohamba oya nyamukula Ovakaldea tai ti: “Ei oyo ondjovo yange yaxuuninwa: Ngeenge inamu lombwela nge kombinga yondjodi oyo nda twa pamwe nefatululo layo, otamu ka tetaulwa moinhimbu, nomaumbo eni otaa ka ninga oundjuwo vovakwashiwana.* 6 Ashike ngeenge omwa popi ondjodi oyo nefatululo layo, ohandi ke mu pa eeshali nosho yo ondjabi nefimano linene. Onghee lombwelei nge ondjodi nefatululo layo.”

7 Ova nyamukula oshikando oshitivali tava ti: “Ohamba nai lombwele ovapiya vayo ondjodi, nohatu ke i fatulula.”

8 Ohamba oye va nyamukula ya ti: “Ondi shii nawa kutya otamu kendabala okumana po efimbo, osheshi omu shii ondjovo yange yaxuuninwa. 9 Ngeenge inamu lombwela nge ondjodi oyo, ope na ashike ehandukilo limwe leni amushe. Ashike omwa udafana mu lombwele nge oipupulu nokupukifa nge, fiyo osheshi onghalo ya lunduluka. Onghee lombwelei nge ondjodi oyo, nohandi ka shiiva kutya otamu dulu oku i fatulula.”

10 Ovakaldea ova nyamukula ohamba tava ti: “Kape na nande omunhu kombada yedu* ta dulu okuninga osho ohamba tai pula, osheshi kape na ohamba inene, ile ngoloneya a pula oshinima sha tya ngaho komupristeri womhule, ile komunyanekeli, ile kOmukaldea. 11 Osho ohamba tai pula oshidjuu, nokape na omunhu ta dulu okulombwela ohamba oshinima eshi, kakele kookalunga, ovo ihava kala mokati kovanhu* ovo vehe kwete okufya.”

12 Opo nee ohamba oya handuka unene noya yandja elombwelo, opo ovalumenhu aveshe ovanaendunge vomuBabilon va hanaunwe po. 13 Eshi elombwelo la yandjwa, novalumenhu ovanaendunge va li pokudipawa, ova konga yo Daniel nookaume kaye navo ve va dipae.

14 Pefimbo opo, Daniel okwa longifa eendunge dokuyoolola nokwa popya nelungi naAriok, omukulunhu wovanangeli vohamba, oo a ya a ka dipae ovalumenhu ovanaendunge vomuBabilon. 15 Okwa pula Ariok, omunambelewa wohamba, a ti: “Omolwashike ohamba ya yandja elombwelo la kwata moiti la tya ngaho?” Opo nee Ariok okwa lombwela Daniel kombinga yoshinima osho. 16 Onghee Daniel okwa ya mo, ndele ta pula ohamba, i mu pe efimbo, opo a lombwele ohamba efatululo.

17 Opo nee Daniel okwa ya keumbo, ndele ta lombwele ookaume kaye, Hanania, Mishael naAsaria kombinga yoshinima osho. 18 Okwe va pula va ilikane va filwe onghenda kuKalunga komeulu, shi na sha noshiholekwa osho, opo Daniel nookaume kaye vaha hanaunwe po pamwe novalumenhu aveshe ovanaendunge vomuBabilon.

19 Opo nee oshiholekwa osho osha li sha hololelwa Daniel memoniko oufiku. Onghee Daniel okwa tanga Kalunga komeulu. 20 Daniel okwa popya a ti:

24 Opo nee Daniel okwa ya mo kuAriok, oo a nangekwa po kohamba a hanaune po ovalumenhu ovanaendunge vomuBabilon, nokwe mu lombwela a ti: “Ino hanauna po nande oumwe womovalumenhu ovanaendunge vomuBabilon, twale nge mo koshipala shohamba, nohamba ohandi ke i lombwela efatululo.”

25 Ariok okwa twala mo diva Daniel koshipala shohamba, ndele ta ti kuyo: “Onda mona omulumenhu umwe womeenghwate domuJuda, oo ta dulu okushiivifila ohamba efatululo.” 26 Ohamba oya tya kuDaniel, oo a lukwa Beltesasar: “Oto dulu ngoo shili okulombwela nge ondjodi oyo nda twa nosho yo efatululo layo?” 27 Daniel okwa nyamukula ohamba ta ti: “Kape na nande oumwe womovalumenhu ovanaendunge, womovanyanekeli, womovapristeri veemhule, ile womovanyanekeli veenyofi ta dulu okulombwela ohamba oshiholekwa osho tai pula. 28 Ashike ope na Kalunga komeulu, oo e li Omuhololi woiholekwa, nokwa shiivifila ohamba Nebukadnesar osho tashi ka ningwa pexulilo lomafiku. Ei oyo ondjodi oyo wa twa nosho yo omamoniko omomutwe woye, eshi wa li wa nangala kombete yoye:

29 “Shi na sha naave, omufimanekwa ohamba, eshi wa li kombete yoye, omadiladilo oye okwa lundulukila kwaasho tashi ka ningwa monakwiiwa, nOmuhololi woiholekwa okwe ku shiivifila osho tashi ka ningwa. 30 Ndele shi na sha naame, oshiholekwa eshi inandi shi hololelwa, molwaashi ndi na ounongo muhapu ndi dule keshe oo e na omwenyo, ponhele yaasho, onelalakano lokushiivifila ohamba efatululo, opo u dule okushiiva omadiladilo oo e li momutima woye.

31 “Ove, omwene ohamba, owa li to tale nowa mona oshihongwafano* sha kula. Oshihongwafano osho, osho sha li shinene notashi vadima neenghono, osha li sha fikama komesho yoye, neholokepo lasho ola li litilifa. 32 Omutwe woshihongwafano osho owa li oshingoli elela, onhulo yasho nomaoko asho okwa li oshisilveri, edimo lasho nosho yo omatundji asho, okwa li ongopolo, 33 omaulu asho okwa li oshivela shilaula, neemhadi dasho oda li oshivela shilaula sha lumbakanifwa mumwe nelova.* 34 Owa kala we shi tala, fiyo osheshi emanya la tetwa ko, hakomake, nola denga oshihongwafano keemhadi dasho doshivela shilaula nodelova nole di nyanyaula. 35 Pefimbo opo, oshivela shilaula, elova, ongopolo, oshisilveri nosho yo oshingoli, aishe kumwe oya nyanyaulwa, noya ninga ngaashi olungu poshipale pokwenye, nomhepo oye i pepelashi, opo iha monike vali. Ndele emanya olo la denga oshihongwafano ola ninga omhunda inene, noya mana ko edu alishe.

36 “Oyo oyo ondjodi yoye, nopaife ohatu ka lombwela ohamba efatululo layo. 37 Ove, omwene ohamba, ohamba yeehamba, oyo Kalunga komeulu a pa ouhamba, omafa, eenghono nosho yo efimano, 38 nokwa yandja meke layo ovanhu keshe opo ve li nosho yo oinamwenyo yomoixwa needila dokeulu, naayo a ninga omupangeli waaishe, ove, oove naanaa omutwe woshingoli.

39 “Ashike konima yoye otape ke uya ouhamba umwe munini kwoove; opo nee otape ke uya ouhamba mukwao utitatu wongopolo, oo tau ka pangela kombada yedu alishe.

40 “Ashike shi na sha nouhamba utine, otau ka kala wa pama, ngaashi oshivela shilaula, osheshi ngaashi ashike oshivela shilaula hashi nyanyaula nokuteyaula oshinima keshe, heeno, ngaashi oshivela shilaula osho hashi hanauna, otau ka nyanyaula nokuhanauna po oinima aishe ei.

41 “Ndele ngaashi ashike wa mona eemhadi nosho yo ominwe, odo kombinga imwe elova lomuhongi woiyuma nokombinga ikwao oshivela shilaula, ouhamba otau ka kala wa tukauka, ashike oupamene umwe woshivela shilaula omo tau ka kala muo, ngaashi ashike wa mona oshivela shilaula sha lumbakanifwa mumwe nelova lipu. 42 Ndele ngaashi ashike ominwe dokeemhadi da li oshivela shilaula sha lumbakana nelova, osho yo ombinga imwe youhamba tai ka kala ya pama, nombinga ikwao inai pama. 43 Ngaashi ashike wa mona oshivela shilaula sha lumbakanifwa mumwe nelova lipu, otaa ka lumbakanifwa novanhu;* ashike itava ka kwatafana umwe namukwao, ngaashi ashike oshivela shilaula ihashi kwatafana nelova.

44 “Pomafiku eehamba odo, Kalunga komeulu ota ka dika po ouhamba, oo itau ka hanaunwa po nandenande. Nouhamba oo itau ka yandjwa kovanhu vamwe. Otau ka nyanyaula notau ka xulifa po omauhamba aeshe aa nowo auke tau kala po fiyo alushe, 45 ngaashi ashike wa mona kutya komhunda okwa tetwa emanya, ndele hakomake, nola nyanyaula oshivela shilaula, ongopolo, elova, oshisilveri nosho yo oshingoli. Kalunga munene okwa shiivifila ohamba osho tashi ka ningwa po monakwiiwa. Ondjodi oyoshili, nefatululo layo oli shii okulineekelwa.”

46 Opo nee ohamba Nebukadnesar oya twa eengolo, oshipala shayo sha twa pedu moipafi yaDaniel, noye mu pa efimano linene. Noya yandja elombwelo a pewe oshali nokutwiminwe oitwiminifo. 47 Ohamba oya tya kuDaniel: “Oshoshili, Kalunga keni oye Kalunga kookalunga nosho yo Omwene weehamba nOmuhololi woiholekwa, molwaashi owa dula okuholola oshiholekwa eshi.” 48 Opo nee ohamba oya yelaayela Daniel noye mu pa eeshali dihapu diwa elela, noye mu ninga omupangeli woitukulwalongo* aishe yomuBabilon nosho yo elenga ekulunhu lovalumenhu aveshe ovanaendunge vomuBabilon. 49 Nopaindilo laDaniel, ohamba oya nangeka po Sadrak, Mesak naAbednego va pangele oitukulwalongo* yomuBabilon, ashike Daniel okwa kala ta longele mombala yohamba.