Daniel
9 Modula yotete yaDarius, omonamati waAhasveros, . . . womoludalo lOvamedia, oo a ningwa ohamba youhamba wOvakaldea, . . . 2 modula yotete yepangelo laye, ame, Daniel, onda kwafelwa komambo* ndi ude ko omuvalu weedula, odo da tumbulwa mondjovo yaJehova komuprofeti Jeremia, di na sha newanifo lokukala eputu kwaJerusalem, sha hala okutya eedula 70. 3 Onghee onda taalelifa oshipala shange kuJehova, Kalunga kashili, handi mu indile meilikano, pamwe nokulidilika nokudjala eeshako nokulifundila omute. 4 Onda ilikana kuJehova, Kalunga kange, nokuhokolola omatimba etu, handi ti:
“Akutu, Jehova, Kalunga kashili, Oo munene nomukumwifi, Oo ha diinine ehangano laye, noha ulikile ohole i na oudiinini ovo ve mu hole nohava diinine oipango yaye. 5 Otwa nyona, notwa longa owii, notwa katuka shihe li pandunge, notwa tukula ounashibofa; otwa efa po oipango yoye nomatokolo oye. 6 Inatu pwilikina kovapiya voye ovaprofeti, ovo va popya medina loye neehamba detu, nomalenga etu, nootatekulululwa novanhu aveshe vomoshilongo. 7 Akutu! Jehova, ouyuki owoye, ashike fye otwa fya ohoni,* ngaashi shi li kunena eli, kovalumenhu vomuJuda, ovakalimo vomuJerusalem nOvaisrael aveshe, ovo ve li popepi nokokule, moitukulwa aishe omo we ve lihanifila, molwaashi inava kala ovadiinini kwoove.
8 “Akutu, Jehova, fye otwa fya ohoni,* eehamba detu, omalenga etu nootatekulululwa, molwaashi otwa nyona kwoove. 9 Jehova, Kalunga ketu, oku na onghenda nediminepo, osheshi otwe mu tukululila oshibofa. 10 Inatu dulika kondaka yaJehova, Kalunga ketu, shaashi inatu shikula eemhango daye, odo e tu tulila po okupitila movapiya vaye, ovaprofeti. 11 Ovaisrael aveshe ova tauluka Omhango yoye, nova efa po okudulika kondaka yoye, onghee owe tu tilila efingo neano la shangwa mOmhango yaMoses, omupiya waKalunga kashili, osheshi otwa nyona kuYe. 12 Okwa wanifa po eendjovo daye adishe odo a popya shi na sha nafye nodi na sha novapangeli vetu ovo ve tu pangela,* moku tu etela oudjuu wa kwata moiti; inapa ningwa nande nale oshinima sha tya ngaho koshi yeulu alishe, ngaashi osho sha ningwa muJerusalem. 13 Ngaashi ashike sha shangwa mOmhango yaMoses, oudjuu aushe ou owe tu hanga, ashike nande ongaho, inatu indila efilonghenda* kuJehova, Kalunga ketu, mokweefa po omanyono etu nomokuulika kutya otu udite ko moule oshili* yoye.
14 “Onghee Jehova okwa kala ta tale nokwe tu etela oudjuu, osheshi Jehova, Kalunga ketu, omuyuki moilonga yaye aishe, oyo a longa, ashike nande ongaho, inatu dulika kondaka yaye.
15 “Paife, akutu, Jehova, Kalunga ketu, Ou wa kufa oshiwana shoye medu laEgipiti neke li na eenghono, nowe liningila edina fiyo okefiku eli, fye otwa nyona notwa katuka shihe li pandunge. 16 Akutu, Jehova, she likolelela koilonga yoye aishe youyuki, alikana, ehandu loye nonya yoye nai dje mo moshilando shoye, Jerusalem, omhunda yoye iyapuki, osheshi omolwomanyono etu nomapuko ootatekulululwa, Jerusalem novanhu voye ova ninga oshinima shodino kwaaveshe ovo ve tu dingilila. 17 Ndele paife pwilikina, alikana, Kalunga ketu, keilikano lomupiya woye nokomaindilo aye, noku vemifa oshipala shoye konhele yoye iyapuki oyo ya hanaunwa po, omolwedina loye mwene, akutu, Jehova. 18 Endeka okutwi kwoye, alikana, Kalunga kange, ndele to pwilikine! Pashula omesho oye nokutala ehanauno letu noloshilando, osho sha li sha lukilwa edina loye, osheshi fye itatu ku indile omolwoilonga yetu youyuki, ndele omolwonghenda yoye inene. 19 Alikana! Jehova, uda ko, alikana, Jehova, tu dimina po. Akutu! Jehova, yandja elitulemo nokukatuka onghatu! Ino ongaonga omolwedina loye mwene, akutu, Kalunga kange, omolwedina loye, olo la lukilwa oshilando shoye noshiwana shoye.”
20 Ofimbo natango nda li handi popi nokwiilikana nokuhokolola omatimba ange nomatimba oshiwana shetu, Israel, nokwiindila efilonghenda koshipala shaJehova, Kalunga kange, shi na sha nomhunda iyapuki yaKalunga kange, 21 heeno, ofimbo natango nda li handi popi meilikano, omulumenhu Gabriel, oo nda li nda mona nale memoniko, okwe uya kwaame, ofimbo nda li nda loloka neenghono pefimbo lokuyandja oshaliyambo konguloshi. 22 Nokwa kwafela nge ndi ude ko, ta ti:
“Akutu Daniel, paife onde uya oku ku pa eendunge noku ku kwafela u kale u na eudeko. 23 Eshi wa hovela eindilo loye, ondjovo oya ya, nonde uya oku i ku shiivifila, molwaashi ove ou na ondilo unene,* onghee konakona oshinima eshi, nokuuda ko emoniko.
24 “Ope na oivike* omilongo 70, oyo ya tokolelwa oshiwana shoye noshilando shoye, opo etauluko li xulifwe po, enyono li xulifwe po, ku yambwe eyambo lekwatakanifo omolwepuko, ku etwe ouyuki waalushe, ku pamekwe emoniko nexunganeko* noku vaekwe Omuyapuki wOvayapuki.* 25 Shiiva nokuuda ko kutya okudja pokuyandja epitikilo li na sha nondjovo yokuwapekulula nokutungulula Jerusalem fiyo okuMessias,* Omuwiliki, otapa ka kala oivike 7 nosho yo oivike 62. Otashi ka wapekululwa nokutungululwa, shi na ehalandjadja noluumbo, ashike omomafimbo madjuu.
26 “Nokonima yoivike 62, Messias ota ka xulifwa po,* ehe na sha shaye mwene.
“Novanhu vomuwiliki oo te uya otava ka hanauna po oshilando nonhele iyapuki, nexulilo lasho otali ka kala onga efundja. Nofiyo okexulilo otapa ka kala oita; osha tokolelwa ehanauno.
27 “Nota ka twikila okudiinina okutula moilonga ehangano oule woshivike omolwavahapu, nometata loshivike ota ka ningifa omayambo neeshaliyambo di xule po.
“Nokevava loinima itondifa otaku ka kala oo ta etifa ehanauno; ndele fiyo osheshi ehanauno le uya, osho sha tokolwa otashi ka hanga nokuhanauna po oo a nangala mehanauno.”