Exodus

22 “Ngeenge omunhu okwa vake ongobe yomhedi, ile odi, ndele te i dipaa, ile te i landifa po, oku na okufuta eengobe deemhedi nhano momhedi imwe, needi nhee modi imwe.

2 (“Ngeenge ombudi oya hangika tai teya, ndele tai dengwa fiyo ya fya, ou e i dipaa ke na etimba lohonde. 3 Ashike ngeenge osha ningwa etango la pita, oku na etimba lohonde.)

“Ombudi oi na okufuta. Ngeenge kai na sha, oi na okulandifwa po omolwoinima oyo ya vaka. 4 Ngeenge osho ya vaka osha hangwa shi na omwenyo moimuna yayo, kutya nee ongobe yomhedi, ile ondongi, ile odi, oi na okufuta lwomapa avali.

5 “Ngeenge umwe okwa pitifa mo oimuna yaye i ka lye mepya, ile moshikunino shomandjebele, ndele tai i mepya laumwe, oku na okuyandja ombinga ei iwa yepya laye, ile ombinga iwa yoshikunino shaye shomandjebele.

6 “Ngeenge omundilo owa tema, ndele tau lihanene momano nokuxwika po eenduba doilya, ile oilya oyo inai teywa, ile epya, oo a tema omundilo oo oku na okufuta osho sha pya po.

7 “Ngeenge omulumenhu okwa pe mukwao oimaliwa, ile oinima e i tuvikile, ndele oinima oyo tai vakwa meumbo lomunhu oo, ndele ombudi tai kwatwa, oi na okufuta lwomapa avali. 8 Ngeenge ombudi inai monika, mwene weumbo oku na okutwalwa koshipala shaKalunga kashili, opo ku talike ngeenge pamwe oye a kufa po oinima yamukwao. 9 Meenghalo adishe odo da kwatela mo okukufa po oinima yovanhu nopehe na epitikilo, kutya nee ongobe yomhedi, ondongi, odi, oshikutu, ile keshe osho sha kana, osho taku dulu okutiwa, ‘Eshi oshange,’ aveshe ovo va kwatelwa mo ove na okutwala oibofa yavo koshipala shaKalunga kashili. Oo a monika ondjo kuKalunga oku na okufuta mukwao lwomapa avali.

10 “Ngeenge omulumenhu okwa pe mukwao ondongi, ile ongobe yomhedi, ile odi, ile oshinamwenyo keshe shopovanhu a kale nasho, ndele tashi fi, ile sha mona oshiponga, ile sha iwa nasho, ndele kape na ovo ve na oumbangi, 11 ope na okukala eano pokati kavo, la ningwa moipafi yaJehova, kutya ina kufa po oinima yamukwao. Mwene woshinamwenyo osho oku na oku shi dimina. Omulumenhu oo a li a pewa oinima ke na okufuta. 12 Ashike oshimuna osho ngeenge osha vakwa po puye, oku na okufuta mwene washo. 13 Ngeenge osha lika po koshifitukuti, oku na okweeta sha tashi yandje oumbangi. Ke na okufuta oshinamwenyo osho sha lika po koshifitukuti.

14 “Ngeenge umwe okwa ehela oshinamwenyo kumukwao, ndele tashi mono oshiponga, ile tashi fi shihe li kumwene, omulumenhu ou e shi ehela oku na okufuta. 15 Ndele ngeenge oshi li pumwene washo, ou e shi ehela ke na okufuta. Ngeenge osha li hashi futilwa, oimaliwa oyo sha li hashi futilwa oyo tai ningi ofuto.

16 “Ngeenge omulumenhu okwa hongaula okakadona oko inaka valekwa, ndele ta nangala nako, oku na okufuta oyoonda, opo ka ninge omukulukadi waye. 17 Ngeenge xe yokakadona okwa anye filufilu oku ka yandja kuye, omulumenhu oo oku na okufuta oifuta i fike poyoonda.

18 “Ino efa ondudu yomukainhu i kale nomwenyo.

19 “Keshe oo ta nangala noshinamwenyo oku na shili okudipawa.

20 “Keshe oo ta yambele ookalunga, ndele haJehova aeke, oku na okuhanaunwa po.

21 “Ino ungaunga nai nomunailongo, ile u mu fininike, osheshi naave owa li omunailongo medu laEgipiti.

22 Ino fininika omufiyekadi, ile okaana oko kehe na xe.* 23 Ngeenge owe mu fininike shili, ndele ta kuu kwaame, ohandi ka uda shili onghuwo yaye, 24 nehandu lange otali ka xwama, ndele handi ke ku dipaa neongamukonda, novakulukadi voye otava ka ninga ovafiyekadi, novana voye otava ka kala vehe na xe.

25 “Ngeenge owa yandje oimaliwa kuumwe womoshiwana shange oo a hepa,* ha di pwoove, ino ungaunga naye wa fa ovayandji vomikuli. Ku na oku mu pula oishoshela.

26 “Ngeenge owa kufa oshikutu shamukweni shi li eshilipaleko lokwaalula omukuli, ou na oku shi shunifa eshi etango tali ningine, 27 shaashi osho ashike e na shokulituvikila, oshikutu shokutuvikila olutu* laye. Ote ke lituvikila shike eshi ta ka nangala? Ngeenge okwa kuu kwaame, ohandi ke mu uda shili, osheshi ame omunalukeno.*

28 “Ino tuka* Kalunga, noino tuka elenga* lomoshiwana sheni.

29 “Ino ongaonga okuyandja omayambo okudja moilikolomwa yoye ihapu nosho yo omaadi nomaviinyu oye oo taa xunga. Ou na okupa nge oshiveli shomovanamati voye. 30 Ongobe yomhedi yoye nodi yoye ou na oku i ninga ngaha: Oi na okukala puina omafiku aheyali. Mefiku etihetatu, ou na oku i pa nge.

31 “Omu na okuulikila nge kutya nye ovayapuki. Kamu na okulya ombelela yakeshe osho shi li mofuka sha lika koshifitukuti. Omu na oku shi pa eembwa.