Omafimbo omativali
15 Omhepo yaKalunga oye uya kombada yaAsaria, omonamati waOded. 2 Onghee okwa ya a ka shakeneke Asa, ndele ta ti kuye: “Alikana, Asa, Ovajuda nOvabenjamin amushe, pwilikineni kwaame. Jehova ota kala pamwe nanye, ngeenge omu li pamwe naye; ngeenge omwe mu kongo, ota ka efa mu mu mone, ashike ngeenge omwe mu fiye po, naye ote ke mu fiya po. 3 Israel okwa kala ita longele Kalunga kashili, ita hongwa komupristeri noita diinine omhango oule wefimbo lile.* 4 Ndele eshi va li moudjuu, ova li va alukila kuJehova, Kalunga kaIsrael, ve mu konga, nokwa li a efa ve mu mone. 5 Pefimbo opo, kapa li oo a li ta dulu okweenda e li meameno,* molwaashi moilongo aishe omwa li omapiyaano mahapu. 6 Oshiwana osha li tashi hanauna po oshiwana shikwao, noshilando oshilando shikwao, molwaashi Kalunga okwa li e i lyalyakanifa omolwomaupyakadi e lili noku lili. 7 Ndele nye, kaleni mwa pama noinamu teka omukumo,* osheshi otamu ka pewa ondjabi omolwoilonga yeni.”
8 Diva eshi Asa a uda eendjovo odo nosho yo exunganeko lomuprofeti Oded, okwa li e na ouladi nokwa hanauna po oikalunga aishe itondifa moshilongo ashishe shaJuda noshaBenjamin nosho yo moilando oyo a kwata ko, okudja koshitukulwa shokeemhunda shaEfraim, nokwa tungulula oaltari yaJehova, oyo ya li komesho yokalupale kokufikila meumbo laJehova. 9 Okwa ongaleka Ovajuda nOvabenjamin aveshe nosho yo ovanailongo, ovo va li pamwe navo va dja kuEfraim, kuManasse nokuSimeon, molwaashi vahapu ova li ve uya kuye okudja kuIsrael, eshi va mona kutya Jehova, Kalunga kaye, oku li pamwe naye. 10 Onghee ova li va ongala muJerusalem momwedi omutitatu momudo omuti-15 wepangelo laAsa. 11 Mefiku olo, ova yambela Jehova eengobe 700 needi 7 000, da dja moixuulwa* oyo va eta. 12 Shikwao vali, ova ninga ehangano, opo va konge Jehova, Kalunga kooxekulululwa, nomutima wavo aushe nosho yo nomwenyo* wavo aushe. 13 Keshe oo a li ina hala okukonga Jehova, Kalunga kaIsrael, okwa li e na okudipawa, kutya nee okaana, ile omukulunhu, omulumenhu, ile omukainhu. 14 Onghee ova li va ana kuJehova pombada, tava ingida nehafo notava shiki omanghuma nosho yo omaluvinga. 15 Ovajuda aveshe ova li va hafa omolweano olo, osheshi ova ana tashi di komutima, va konga Jehova va mana mo, nokwa efa ve mu mone, nokwa twikila oku va pa etulumuko keembinga adishe.
16 Ohamba Asa oya kufa nokuli inakulu, Maaka, ondodo yaye, e li ohambakainhu, molwaashi okwa ninga oshikalunga shitondifa, opo opala iyapuki* i longelwe. Asa okwa teta po nokunyanyaula oshikalunga shitondifa, ndele te shi xwikile mEfilu laKidron. 17 Ashike eenhele dokoikulundudu kada li da hanaunwa po muIsrael. Kakele kaasho, Asa okwa longela Kalunga nomutima aushe* okukalamwenyo* kwaye akushe. 18 Okwa eta meumbo laKalunga kashili oinima oyo ye naxe va yapula, oshisilveri, oshingoli noilongifo i lili noku lili. 19 MuJuda inamu kala oita fiyo omomudo omuti-35 wepangelo laAsa.