Samuel omutivali
23 Edi eendjovo daxuuninwa daDavid:
“Ondjovo yaDavid, omona waIsai,
Ondjovo yomulumenhu oo a tumbalekwa,
Omuvaekwa waKalunga kaJakob,
Omwiimbi* womaimbilo aIsrael.
2 Omhepo yaJehova oya wilika nge ndi popye;
Neendjovo daye oda li kelaka lange.
3 Kalunga kaIsrael okwa popya;
Emanya laIsrael ola tya kwaame:
‘Ngeenge ou ta pangele ovanhu omuyuki,
Ta pangele e na etilokalunga,
4 Epangelo laye otali ka kala ngaashi ouyelele wetango tau minikile ongula,
Efimbo longula, kuhe na oilemo.
Otali ka kala la fa ouyelele oo hau uya, ngeenge odula ya sheka,
Oyo tai ningifa omwiidi u twiyuke.’
5 Mbela eumbo lange hasho li li ngaho moipafi yaKalunga?
Osheshi okwa ninga naame ehangano laalushe,
Nouyelele owa unganekwa nawa, noitau ka lundululwa.
Molwaashi otali etele nge exupifo nehafo tali kalelele,
Mbela osho hasho hashi ningifa oukwaneumbo wange u pondole?
6 Ashike ovalumenhu aveshe vongaho ohava ekelwashi, ngaashi omano,
Osheshi itaa dulu okukwatwa nomake.
7 Ngeenge omulumenhu te a kwata,
Oku na okukala a homata oshivela nosho yo eonga,
Noku na okuxwikwa po filufilu nomundilo, opo a menena.”
8 Aa omadina ovakwaita vaDavid ovanaenghono: Josef-bassebet, Omutakmoni, omuwiliki wavakwao vatatu. Okwa dipaa ovanhu ve dulife po 800 neonga poshikando shimwe. 9 Eliaser, omonamati waDodo, omonamati waAhohi, oo a li popepi naye, okwa li umwe womovakwaita vatatu ovanaenghono vaDavid, eshi va li tava sheke Ovafilisti. Ovafilisti ova li va ongala va ye molwoodi, naashi ovakwaita Ovaisrael va faduka po, 10 okwa kala a fikama, nokwa twikila okudipaa Ovafilisti fiyo osheshi okwooko kwaye kwa loloka, neke laye ola li la kukuta, molwaashi okwa li e kwete nalo eongamukonda. Onghee Jehova okwe va etela efindano* linene mefiku olo, novanhu ova aluka ve mu shikula, ndele tava kufa ko oixuulwa* kovanhu ovo va dipawa.
11 Shamma, omonamati waAge, Omuharari, okwa li popepi naye. Ovafilisti ova li va ongala pamwe, puLehi, opo pa li pe na epya, olo la li li yadi oukunde, novanhu ova li va faduka po omolwOvafilisti. 12 Okwa fikama mokati kepya, noina efa li kwatwe ko, ndele ta kala nokudipaa Ovafilisti. Onghee Jehova okwe va etela efindano* linene.
13 Ovalumenhu vatatu vomovawiliki 30 ova ya pefimbo leteyo kuDavid kekololo laAdullam, nongudu yOvafilisti oya li ya onga onhanda mefilu laRefaim. 14 David okwa li a hondama monhele ya amenwa, nongudu imwe yOvafilisti oya li muBetlehem. 15 David okwa ti: “Ngeno osha li tashi shiiva ndi nwe omeva omondungu, oyo i li poshivelo shaBetlehem, ngeno ohandi kala nda hafa.” 16 Opo nee ovakwaita vatatu ovanaenghono ove livakela monhanda yOvafilisti, nova teka omeva mondungu, oyo i li poshivelo shaBetlehem, ndele tave a twala kuDavid. Ashike David okwa anya oku a nwa, ndele te a tileshi moipafi yaJehova. 17 Okwa tya: “Jehova, itandi dulu nandenande okuninga oshinima sha tya ngaho. Ongahelipi handi dulu okunwa ohonde yovalumenhu ovo va tula eemwenyo davo moshiponga?” Onghee okwa anya oku a nwa. Ei oinima oyo ovakwaita vatatu ovanaenghono va ninga.
18 Abisai, omumwaina waJoab, omonamati waSerua, okwa li omuwiliki wavakwao vatatu, nokwa dipaa ovanhu ve dulife po 300 neonga laye, nokwa li e shiivike nawa, ngaashi ashike ovalumenhu venya vatatu. 19 Nonande okwa li a yooloka ko kuvakwao vatatu, nokwa li ondjai yavo, ka li e na ondodo i fike pwaayo yaavenya vatatu votete.
20 Benaia, omonamati waJehoiada, okwa li omulumenhu omuladi,* oo a longa oilonganghono muKabseel. Okwa dipaa ovanamati vavali vaAriel, wokuMoab, nokwa li a ya melambo lomeva, mefiku olo kwa li ku na olumi,* ndele ta dipaa onghoshi. 21 Okwa li yo a dipaa omulumenhu umwe, Omuegipiti, oo a li munene neenghono. Nonande Omuegipiti oo okwa li e na eonga meke laye, Benaia okwa ya kuye nodibo, nokwa nyeka ko eonga olo kOmuegipiti, ndele te li mu dipaifa. 22 Oinima oyo oya ningwa kuBenaia, omonamati waJehoiada, nokwa li ha ningi ngaashi ovakwaita vatatu votete ovanaenghono. 23 Nonande okwa li a yooloka ko filufilu kwaaveshe ovo omilongo nhatu, ka li nande e na ondodo i fike pwaai yovakwaita vatatu votete. Ashike David okwa li e mu nangeka po a kale umwe womovanangeli vaye.
24 Asahel, omumwaina waJoab, okwa li umwe womovalumenhu ava omilongo nhatu: Elhanan, omonamati waDodo, Omubetlehem, 25 Shamma, Omuharodi, Elika, Omuharodi, 26 Heles, Omupalti, Ira, omonamati waIkkes, Omutekoa, 27 Abieser, Omuanatot, Mebunnai, Omuhusai, 28 Salmon, Omuahohi, Maharai, Omunetofa, 29 Heleb, omonamati waBaana, Omunetofa, Ittai, omonamati waRibai, wokuGibea shOvabenjamin, 30 Benaia, Omupiratoni, Hiddai, womomalufilu* aGaas, 31 Abialbon, Omuarabat, Asmavet, Omubarihumi, 32 Eliaba, Omusaalbim, ovanamati vaJasen, Jonatan, 33 Shamma, Omuharari, Ahiam, omonamati waSarar, Omuharari, 34 Elifelet, omonamati waAhasbai, omonamati womuAmaakati, Eliam, omonamati waAhitofel, Omugilo, 35 Hesro, Omukarmel, Paarai, Omuaraba, 36 Igal, omonamati waNatan, womuSoba, Bani, Omugad, 37 Selek, Omuammoni, Naharai, Omubeerot, omuhumbati woilwifo yaJoab, omonamati waSerua, 38 Ira, Omuiitri, Gareb, Omuiitri, 39 nosho yo Uria, Omuheti. Kumwe aveshe ova li 37.