Genesis

19 Ovaengeli ovo vavali ova li va fika kuSodom efimbo lokonguloshi, na Lot okwa hangika e li omutumba poshivelo shoshilando osho. Eshi e va mona, okwa fikama e ke va shakeneke, ndele te linyongamene pedu. 2 Okwa tya kuvo: “Ovafimanekwa, ileni mu nangale meumbo lomupiya weni, nye mu koshwe keemhadi, opo mu dule okupita ongula inene tamu i nondjila yeni.” Ovaengeli ova tya: “Ahowe, ohatu ka nangala ashike momapandavanda.” 3 Lot okwa kala te va kondjifa va ye naye keumbo laye. Opo nee okwe va longekidila eendja, nokwe va ningila omungome inau ya efulika, ndele tava li.

4 Fimbo inava nangala, ongudu yovalumenhu aveshe vomoshilando shaSodom, ovanyasha novakulunhu, oya li ya dingilila eumbo laLot. 5 Ongudu oyo oya kala tai ingida Lot, tai ti: “Ovalumenhu ovo ve uya meumbo loye oufiku ove li peni? Va eta kufye tu va nangale.”

6 Lot okwa ya kuvo pondje, ndele ta idile po peumbo. 7 Okwa tya kuvo: “Vakwetu, inamu longa owii. 8 Ondi na mo oukadona vavali ovo inava nangala nomulumenhu nande onale. Nandi ve mu etele mu va ningile keshe osho mwa hala. Ashike ovalumenhu ovo inamu va ningila sha nande, molwaashi ove uya okukonga eameno* meumbo lange.” 9 Opo nee ova ti: “Dja po!” Ova weda ko tava ti: “Omunailongo ou okwe uya okukala omu, ndele okwa hala vali oku tu tokola. Paife ohatu ke ku longela oushada shi dulife ovalumenhu ovo.” Ova li va ongalela* Lot tava kondjifa va teye po omuvelo. 10 Ovalumenhu vavali, ovo va li meumbo, ova nanena Lot meumbo, ndele tava idile omuvelo. 11 Ova li yo va twikifa ovalumenhu ovo va li poshivelo sheumbo, okudja koshipuna fiyo okohepele, ile komunyasha fiyo okomukulunhu, opo vaha dule okumona omuvelo.

12 Ovalumenhu, ovo va li meumbo, ova pula Lot, va ti: “Ou na mo vali ovapambele vamwe moshilando? Ovanhu voye aveshe va pitifa mo moshilando, oitenya yoye, ovanamati voye novanakadona voye. 13 Ohatu ka hanauna po onhele ei, molwaashi Jehova okwa uda ekemo linene li na sha novanhu vomoshilando eshi, na Jehova okwe tu tuma tu shi hanaune po.” 14 Onghee Lot okwa ya, ndele ta lombwele oitenya yaye, oyo ya li tai ka hombola ovanakadona vaye, nokwa kala ta ti: “Fikameni! Djeni mo moshilando eshi, molwaashi Jehova ote shi hanauna po.” Ndele oitenya yaye oya li ashike i wete a fa ta ningi omashendjo.

15 Eshi eluwa la li tali tende, ovaengeli ova li tava endelelifa Lot, tava ti: “Fikama! Kufa omukulukadi woye novanakadona voye vavali, ovo u li navo, opo muha hanaunwe po omolwoukolokoshi woshilando.” 16 Eshi Lot a li ta ongaonga, Jehova okwa li e mu fila onghenda, novalumenhu ovo ova li va kwata Lot, omukulukadi waye novanakadona vavo vavali momaoko, ndele tave va twala kondje yoshilando. 17 Diva eshi ve va twala kondje yoshilando, ova tya kuvo: “Fadukei po mu ka xupife eemwenyo deni! Inamu tala konima noinamu kanghama nande omoshitukulwa shimwe shi li popepi noshilando osho. Fadukei po mu ye koshitukulwa sheemhunda, opo muha hanaunwe po.”

18 Opo nee Lot okwa tya kuvo: “Ahawe Jehova, ino tumina nge oko. 19 Omupiya woye owe mu kenukila nowe mu fila onghenda,* opo a kale nomwenyo, ashike itandi dulu okuya koshitukulwa sheemhunda, molwaashi onda tila okuhangelelwa ko koshiponga, ndele handi fi. 20 Ope na okadoolopa kanini ke li popepi, oko handi dulu okuya. Ohandi dulu okufaduka po ndi ye kokadoolopa oko? Onhele oyo oinini lela. Opo ashike handi dulu okuxupa.”* 21 Onghee Kalunga* okwa tya kuye: “Oshi li nawa, ohandi ku file onghenda, itandi ka hanauna po okadoolopa oko wa popya. 22 Endelela u ye kokadoolopa oko, molwaashi itandi ka ninga po sha, ofimbo ino fika ko.” Osho osho sha ningifa okadoolopa oko ka lukwe Soar.*

23 Lot okwa fika kuSoar etango la pita. 24 Opo nee Jehova okwa lokifa omundilo nosulfuri muSodom naGomorra; omundilo nosulfuri oya dja meulu kuJehova. 25 Okwa hanauna po oshitukulwa ashishe noilando oyo ya li mo, mwa kwatelwa ovakalimo aveshe noimeno aishe. 26 Omukulukadi waLot, oo a li monima, okwa tala konima, ndele ta shituka oshivanda shomongwa.

27 Abraham okwa penduka ongula inene, ndele ta i konhele oko a li a fikama, eshi va li tava popi naJehova. 28 Eshi a tala kuSodom naGomorra nokoilando aishe yomoshitukulwa, okwa mona oshinima shikumwifa. Moshitukulwa osho omwa li tamu lundumuka omwifi wa fa tau di mediko lomundilo. 29 Eshi Kalunga a hanauna po oilando yomoshitukulwa osho, ka li a dimbwa Abraham, nomolwaasho a kufa mo Lot moilando oyo a hanauna po, oilando omo Lot a li ha di.

30 Lwanima, Lot okwa li a dja mo muSoar pamwe novanakadona vaye vavali, nova ka kala hava di koshitukulwa sheemhunda, molwaashi okwa li a tila okukala muSoar. Okwa li ha di mekololo pamwe novanakadona vaye vavali. 31 Omonakadona woshiveli okwa lombwela oo munini ta ti: “Tate okwa kulupa, nomoshitukulwa kamu na omulumenhu oo ta dulu okunangala nafye ngaashi hashi ningwa kovanhu vakwetu. 32 Ila tu pe tate omaviinyu a nwe, opo tu dule okunangala naye, fye tu dale ounona naye.”

33 Oufiku oo ova kala tava pe xe omaviinyu a nwe. Omonakadona woshiveli okwa li a ya mo, ndele ta nangala naxe, ashike xe ka li e shi shii kutya okwe uya mo efimbo peni, nokwa dja mo efimbo peni. 34 Mefiku la landula ko, omonakadona woshiveli okwa lombwela oo munini ta ti: “Onguloshi onda nangala natate. Natu mu pe vali omaviinyu konguloshi, ndele to i u ka nangale naye, fye tu dale ounona naye.” 35 Natango ove mu pa omaviinyu oufiku oo. Opo nee omonakadona oo munini okwa ya mo, ndele ta nangala naxe, ashike xe ka li e shii kutya okwe uya mo efimbo peni, nokwa dja mo efimbo peni. 36 Onghee ovanakadona aveshe vaLot ova li va ninga oufimba waxe. 37 Omonakadona woshiveli okwa dala okaana okamati, ndele te ka luku Moab, na Moab oye a ka ninga xe yOvamoab. 38 Omonakadona oo munini naye okwa ka dala okaana okamati, ndele te ka luku Ben-ammi, na Ben-ammi oye a ka ninga xe yOvaammoni.