Daniel

6 Darius okwa li a tokola okunangeka po omalenga 120 mouhamba aushe. 2 Oo a li koshi yewiliko lomalenga omakulunhu atatu, Daniel okwa li limwe lomuo; nomalenga oo okwa li haa lopota kwaao atatu, opo ohamba iha kanife sha. 3 Onghee Daniel okwa li te liyoolola ko komalenga makwao omakulunhu nosho yo komalenga, molwaashi muye omwa li mu na omhepo ye likalekelwa, nohamba oya li ya hala oku mu yelaayela mouhamba aushe.

4 Pefimbo opo, omalenga omakulunhu nosho yo omalenga okwa li taa kongo omapuko a lundile Daniel moinima i na sha nepangelo,* ashike inaa mona sha shoku mu lundila, ile oulingilingi washa, molwaashi okwa li omulineekelwa. Ka li omuhasha, noka li a nyika oulingilingi. 5 Opo nee ovalumenhu ovo ova ti: “Itatu mono sha shokulundila Daniel, shapo ongeenge hatu kongo sha shi na sha naye momhango yaKalunga kaye.”

6 Opo nee omalenga omakulunhu nosho yo omalenga okwa ya kohamba e li ongudu, ndele taa ti kuyo: “Omwene ohamba Darius, kala nomwenyo fiyo alushe. 7 Omalenga aeshe omombala, ovakulunhu, omalenga, omalenga omakulunhu omombala nosho yo oongoloneya, ova kundafana pamwe va tule po oshipango shomombala noshokukelela* kutya oule womafiku 30, keshe oo ta ilikana kukalunga umwe, ile komunhu, kakele kwoove, omwene ohamba, oku na okuumbilwa mekololo leenghoshi. 8 Paife, omwene ohamba, tula po oshipango, ndele to shi denge oshihako, opo shiha dule okulundululwa metwokumwe nomhango yOvamedia nOvapersia, oyo itai dulu okulundululwa.”

9 Onghee ohamba Darius oya denga oshihako oshipango nosho yo eshiliko.

10 Diva eshi Daniel a uda kutya oshipango osha dengwa oshihako, okwa ya keumbo laye, olo la li li na onduda i na omakende haa patuluka a taalela kuJerusalem. Noikando itatu mefiku, ohatu eengolo nokwiilikana nokuhambelela koshipala shaKalunga kaye, ngaashi a kala ha ningi shito, ofimbo osho inashi ningwa. 11 Pefimbo opo, ovalumenhu ovo ova ponokela mo, nova hanga Daniel ta ilikana, nota pula a filwe onghenda koshipala shaKalunga kaye.

12 Onghee ova ya kohamba, noku i dimbulukifa shi na sha noshipango shokushilika shomouhamba va ti: “Hano ino denga oshihako oshipango shokushilika, kutya oule womafiku 30 omunhu keshe ta ilikana kalunga umwe e lili, ile omunhu, kakele kwoove, omwene ohamba, oku na okuumbilwa mekololo leenghoshi?” Ohamba oya nyamukula ya ti: “Oshinima osho osha kolekwa nawa metwokumwe nomhango yOvamedia nOvapersia, oyo itai dulu okulundululwa.” 13 Ova nyamukula diva ohamba tava ti: “Daniel, umwe womeenghwate dokuJuda, ine ku fimaneka, omwene ohamba, noina fimaneka oshipango shokushilika osho wa denga oshihako, ndele oha ilikana oikando itatu mefiku.” 14 Diva, eshi ohamba ya uda oshinima eshi, oya li ya lulilwa unene noya hovela okudiladila kutya otai xupifa ngahelipi Daniel; noya ninga eenghendabala i mu xupife fiyo osheshi etango la ningina. 15 Xuuninwa, ovalumenhu ovo ova ya ve li ongudu kohamba, ndele tava ti kohamba: “Omwene ohamba, shiiva kutya omhango yOvamedia nOvapersia oyo kutya oshipango keshe shokushilika, ile omhango oyo ohamba ya tula po itai dulu okulundululwa.”

16 Onghee ohamba oye va pa elombwelo, nova ka tala Daniel, noku mu umbila mekololo leenghoshi. Ohamba oya tya kuDaniel: “Kalunga koye oo to twikile okulongela ote ke ku xupifa.” 17 Opo nee opa etwa emanya, ndele tali tulwa poshivelo* shekololo, nohamba oye li denga oshihako nolinga yayo yoshihako nosho yo nolinga yoshihako shovaleli vayo, opo paha dule okulundululwa sha shi na sha naDaniel.

18 Opo nee ohamba oya ya kombala yayo. Oya djuuka oufiku aushe tai lidilike noya anya omalihafifo oludi keshe,* nokaya li tai dulu okukofa.* 19 Xuuninwa, eshi eluwa la hovela okutenda, ohamba oya fikama, ndele tai i tai endelele ya finda kekololo leenghoshi. 20 Eshi ya ehena popepi nekololo, oya ifana Daniel newi la nyika oluhodi. Ohamba oya pula Daniel ya ti: “Akutu, Daniel, omupiya waKalunga omunamwenyo, Kalunga koye oo to twikile okulongela, okwa dula ngoo oku ku xupifa keenghoshi?” 21 Daniel okwa nyamukula diva ohamba ta ti: “Omwene ohamba, kala nomwenyo fiyo alushe. 22 Kalunga kange okwa tuma omweengeli waye nokwa mata omakanya eenghoshi, noinadi ehameka nge, molwaashi inandi monika ondjo koshipala shaye; nokandi na osho nda ninga sha puka kwoove, omwene ohamba.”

23 Ohamba oya li ya hafa neenghono noya yandja elombwelo, opo Daniel a shilwe mo mekololo. Eshi Daniel a shilwa mo mekololo, ka li a ehamekwa nandenande, molwaashi okwa li e lineekela muKalunga kaye.

24 Opo nee ohamba oya yandja elombwelo, novalumenhu ovo va lundila* Daniel ova li va etwa, nova umbilwa mekololo leenghoshi pamwe novanamati vavo nosho yo ovakulukadi vavo. Ofimbo inava hanga poshi yekololo, eenghoshi ode va yakela noda teyaula omakipa avo aeshe.

25 Opo nee ohamba Darius oya shangela ovanhu aveshe, oiwana neengudu domalaka odo di li kombada yedu alishe ya ti: “Ombili yeni nai hapupale! 26 Ohandi yandje oshipango kutya moshitukulwa keshe shomouhamba wange, ovanhu nava kale hava kakama va tila koshipala shaKalunga kaDaniel. Osheshi oye Kalunga omunamwenyo, nota kala po fiyo alushe. Ouhamba waye itau hanaunwa po nandenande, nepangelo* laye olaalushe. 27 Oha amene, ha xupifa noha longo omadidiliko noinenelonga meulu nosho yo kombada yedu, osheshi okwa xupifa Daniel komakasha eenghoshi.”

28 Onghee Daniel oo osha kala tashi mu endele nawa mouhamba waDarius nosho yo mouhamba waKores, Omupersia.