Samuel wotete
9 Opa li omulumenhu Omubenjamin wedina Kish, omonamati waAbiel, omonamati waSeror, omonamati waBekorat, omonamati waAfia, nokwa li oshipuna elela. 2 Okwa li e na omonamati wedina Saul, oo a li omunyasha, nokwa li muwa unene, nomOvaisrael kamwa li omunhu muwa e mu dule. Okwa li mule e dule ovanhu aveshe. Ovanhu ova li ashike have mu tetele pomapepe.
3 Eshi eendongi* daKish, xe yaSaul, da kana, Kish okwa lombwela omonamati waye Saul a ti: “Alikana, inda pamwe nomupiya umwe mu ka konge eendongi.” 4 Ova pita moshitukulwa shokeemhunda shaEfraim nomedu laShalisha, ndele inave di mona. Ova enda yo medu laShaalim, ashike eendongi kada li mo. Natango ova enda medu alishe lOvabenjamin, ndele inave di mona.
5 Ova ya medu laSuf, na Saul okwa lombwela omupiya waye, oo a li pamwe naye, a ti: “Natu shune, opo tate aha hovele okulipula nafye ponhele yeendongi.” 6 Ashike omupiya okwa nyamukula a ti: “Tala, moshilando osho omu na omupiya waKalunga, omulumenhu oo a fimanekwa. Oinima aishe oyo ha popi ohai wanifwa filufilu. Natu ye mo paife. Otashi dulika e ke tu lombwele ondjila oyo tu na okuya nayo.” 7 Opo nee Saul okwa tya komupiya waye: “Ngeenge ohatu i, omulumenhu oo ohatu mu twaalele shike? Momakutu etu kamu na omungome. Kape na oshali oyo hatu dulu okutwaalela omupiya waKalunga kashili. Oshike osho tu na hatu dulu oku mu twaalela?” 8 Omupiya okwa nyamukula vali Saul a ti: “Tala, ondi na oshitine shosekeli* yoshisilveri meke lange. Ohandi ke shi yandja komupiya waKalunga kashili, note ke tu lombwela ondjila oyo tu na okuya nayo.” 9 (Pefimbo lonale, muIsrael, ovanhu ngeenge tava ka konga ekwafo kuKalunga ova li hava popi ngaha: “Natu ye komumonikokule.” Osheshi ovaprofeti ova li hava ifanwa ovamonikokule pefimbo lonale.) 10 Opo nee Saul okwa tya komupiya waye: “Ediladilo olo oliwa. Natu ye.” Onghee ova ya koshilando oko kwa li omupiya waKalunga kashili.
11 Ofimbo va li tava londo koshikulundudu va finda moshilando, ova shakeneka oukadona tava ka teka omeva. Ove va pula va ti: “Monhele ei omu na omumonikokule?” 12 Ova nyamukula va ti: “Heeno, omu na. Taleni, oye winya e li komesho yeni. Endeleleni, osheshi okwe uya moshilando nena eli, molwaashi ovanhu otava yandje omayambo nena koshikulundudu shiyapuki. 13 Diva shimha mwa i moshilando, otamu ke mu hanga, ofimbo ina ya koshikulundudu shiyapuki a ka lye. Ovanhu itava ka lya, ofimbo ine uya, osheshi oye ha nangeke noupuna omayambo. Ngeenge osho osha ningwa, ovo va shivwa otava dulu okulya. Indeni paife, opo mu ke mu hange.” 14 Onghee ova ya moshilando. Eshi va ya moshilando, Samuel okwa li e uya oku va shakeneka va ye koshikulundudu shiyapuki.
15 Efiku la tetekela, ofimbo Saul ine uya, Jehova okwa li a lombwela* Samuel a ti: 16 “Mongula pefimbo eli, ohandi ke ku tumina omulumenhu womedu laBenjamin. Ou na oku mu vaeka a ninge omuwiliki woshiwana shange Israel, nota ka xupifa oshiwana shange momake Ovafilisti. Onda mona nghee oshiwana shange tashi hepekwa, nonghuwo yasho oya fika kwaame.” 17 Eshi Samuel a mona Saul, Jehova okwe mu lombwela a ti: “Omulumenhu ou oye nde ku lombwela nda ti, ‘Ou oye ta ka pangela oshiwana shange.’”*
18 Opo nee Saul okwa ehena puSamuel pomuvelo, ndele ta ti: “Alikana, lombwele nge, eumbo lomumonikokule oli li peni?” 19 Samuel okwa nyamukula Saul a ti: “Aame omumonikokule. Pita komesho tu ye koshikulundudu shiyapuki, osheshi otamu ka lya pamwe naame nena. Ohandi ke ku lekela ongula, nohandi ke ku lombwela ashishe osho wa hala okushiiva.* 20 Ino lipula neendongi, odo da kana oule womafiku atatu, osheshi oda monika. Kakele kaasho, omamona aeshe omuIsrael ooye noukwaneumbo aushe waxo.” 21 Opo nee Saul okwa nyamukula a ti: “Ame Omubenjamin womepata olo linini elela momapata aIsrael, noludi lange inali fimana momaludi aeshe omepata laBenjamin. Omolwashike to lombwele nge oshinima sha tya ngaho?”
22 Samuel okwa kufa Saul nomupiya waye, nokwe va twala monhele yokulila, ndele te va pe onhele i li komesho yaavo va shivwa. Omwa li ovalumenhu 30 lwaapo. 23 Samuel okwa lombwela omuteleki a ti: “Eta oshitukulwa shombelela osho nde ku pa, nonde ku lombwela kutya, ‘Shi likalekela.’” 24 Omuteleki okwa kufa oshilama, ndele te shi pe Saul. Samuel okwa tya: “Owa etelwa osho wa li wa tuvikililwa. Lya, molwaashi ove shi ku tuvikilila omolwoshivilo eshi. Onde va lombwela kutya, ‘Onda shiva ovaenda.’” Onghee Saul okwa lya pamwe naSamuel mefiku olo. 25 Opo nee ova dja ko koshikulundudu shiyapuki va finda moshilando, na Samuel okwa twikila okupopya naSaul ve li pombada yeumbo. 26 Ova penduka ongula inene, naashi eluwa tali tende, Samuel okwa ifana Saul pombada yeumbo, ndele ta ti: “Lilongekida, opo ndi ku lekele u ye.” Onghee Saul okwe lilongekida, ndele tava i naSamuel pondje. 27 Ofimbo va li tava londoloka va finda kondje yoshilando, Samuel okwa tya kuSaul: “Lombwela omupiya woye a pite komesho, ashike ove kanghama, opo ndi ku lombwele osho Kalunga a popya.” Onghee omupiya okwa pita komesho.