Deuteronomion
6 “Aa omalombwelo, omaufomhango nomatokolo oo Jehova, Kalunga keni, e mu honga, opo mu dule oku ke a diinina, ngeenge omwa tauluka mu ye medu olo te ke mu pa, 2 opo mu tile Jehova, Kalunga keni, nokudiinina eenghedimhango daye adishe nomalombwelo aye oo handi mu lombwele, nye novana veni novatekulu veni, onghalamwenyo yeni aishe, opo mu kale nomwenyo efimbo lile. 3 Israel, ou na okupwilikina nokudiinina filufilu oinima oyo, opo u pondole nou hapupale medu tali kunguluka omashini nomaadi eenyiki, ngaashi Jehova, Kalunga kooxokulululwa, e ku udanekela.
4 “Israel, pwilikina, Jehova, Kalunga ketu, oye aeke Jehova. 5 Hola Jehova, Kalunga koye, nomutima woye aushe nomwenyo* woye aushe neenghono doye adishe.* 6 Eendjovo edi handi ku lombwele nena eli odi na okukala momutima woye, 7 nou na oku di honga* ovana voye, noku di popya ngeenge u li omutumba meumbo loye, to ende mondjila nongeenge wa nangala, ile to penduka. 8 Di mangela keke loye, opo u kale noku di dimbuluka, do nadi kale ngaashi edidiliko mombaba yoshipala* shoye. 9 Di shanga koikulo yomuvelo weumbo loye nokomivelo doshilando.
10 “Ngeenge Jehova, Kalunga keni, okwe mu twala medu olo a anena ooxokulululwa, Abraham, Isak naJakob kutya ote li mu pe, oilando inene noiwa oyo inamu tunga, 11 omaumbo e yadi oinima aishe oyo iwa inamu longela, eendungu domamanya, odo inamu xupa,* oikokola yomandjebele nomiti deemono, odo inamu twika, ndele tamu li fiyo mwa kuta, 12 lungameni muha dimbwe Jehova oo e mu kufa medu laEgipiti, meumbo loupika. 13 Omu na okutila Jehova, Kalunga keni, noye aeke mu na okulongela, nomu na okwaana medina laye. 14 Inamu shikula ookalunga vamwe, ookalunga aveshe ovo hava longelwa kovanhu ovo ve mu dingilila, 15 osheshi Jehova, Kalunga keni, oo e li mokati keni, oye Kalunga oo a teelela okulongelwa oye aeke. Ngeenge omwa shikula ookalunga vamwe, Jehova, Kalunga keni, ote ke mu handukila neenghono note ke mu hanauna po kombada yedu.
16 “Inamu yeleka Jehova, Kalunga keni, ngaashi mwe mu yeleka muMassa. 17 Omu na okudiinina filufilu omalombwelo aJehova, Kalunga keni, omadimbulukifo aye nomaufomhango aye oo e mu lombwela mu diinine. 18 Omu na okuninga osho shi li mondjila noshiwa momesho aJehova, opo mu pondole nomu ye mu ka kale medu olo liwa, olo Jehova a udanekela ooxokulululwa. 19 Otamu ka taataa mo ovatondi veni aveshe, ngaashi ashike Jehova a udaneka.
20 “Ngeenge ovana veni ove ke mu pula monakwiiwa kutya: ‘Omadimbulukifo, omaufomhango nomatokolo oo Jehova, Kalunga keni, e mu lombwela otaa ti shike?’ 21 Otamu ke va nyamukula kutya: ‘Otwa li twa ninga ovapika vaFarao muEgipiti, ashike Jehova okwe tu kufa mo muEgipiti neke li na eenghono. 22 Onghee Jehova okwa kala ta ningi omadidiliko moipafi yetu nokulonga oikumwifilonga inene muEgipiti noya nyika oshiponga kuFarao nosho yo koukwaneumbo waye aushe. 23 Okwe tu kufa mo, ndele te tu eta oku, opo e tu pe edu olo a anena ootatekulululwa. 24 Opo nee Jehova okwe tu lombwela tu diinine omaufomhango aeshe oo, notu tile Jehova, Kalunga ketu, omolwouwa wetu tau kalelele, opo tu kale nomwenyo, ngaashi naanaa tu li kunena. 25 Ngeenge otwa diinine filufilu omalombwelo aeshe oo mokudulika kuJehova, Kalunga ketu, ngaashi e tu lombwela, ohatu ka talika ko ovayuki.’