Omayeletumbulo
23 Ngeenge owa kala omutumba u lye pamwe nohamba,
Diladila noukeka onghalo yoye;
2 Tula ombele pomunino woye,*
Ngeenge ou na ehalo lokulya la pitilila.*
3 Ino kala wa hala eendja daye tadi tokola elaka,
Molwaashi do oikulya tai pukifa.
4 Ino lilolola nokulikongela emona.
Efa okuninga ngaho, ndele to kala u na eudeko lomoule.*
5 Ngeenge owe li tale, ito li mono,
Osheshi otali ka ninga omavava ngaashi onhwa, ndele tali tuka la finda mewangadjo.
6 Ino lya oikulya yomuluva;*
Ino kala wa hala eendja daye tadi tokola elaka,
7 Molwaashi okwa fa oo ta koneke oikando oyo to li.*
Ote ku lombwele kutya, “Lya nokunwa,” ashike ote ku mbweenga.*
8 Oto ka kunga ko oikulya oyo wa lya
Nowa hepifa olupandu loye.
9 Ino popya nelai,
Molwaashi otali ka tonda eendjovo doye dounongo.
10 Ino lundulula edidiliko longaba ikulu,
Ile u kufe ko epya laao ehe na xe.
11 Osheshi Omupopili* wavo omunaenghono;
Ote ke va popila noku ku kondjifa.
12 Omutima woye nau yandje elitulemo koutekuduliko,
Nomatwi oye naa pwilikine keendjovo deshiivo.
13 Ino ongaonga okupa okamati* outekuduliko.
Ngeenge owe ka denge noshimwati, itaka fi.
15 Omumwange, ngeenge omutima woye owa ningi eendunge,
Opo nee omutima wange otau ka kala wa hafa.
17 Ino kala wa twila ondubo ovakolokoshi,
Ndele kala ho tila Jehova efimbo keshe,
18 Opo nee oto ka kala nonakwiiwa iwa
Noito ka kanifa eteelelo.
19 Omumwange, pwilikina, ndele to ningi omunaendunge,
Nokuyukifa omutima woye mondjila ya yuka.
20 Ino kala mokati kaavo hava nu omaviinyu sha pitilila,
Mokati kaavo hava li ombelela ihapu unene,
21 Molwaashi eengholwe novafukenhu otava ka ninga ovakwanaluhepo,
Naavo ve hole eemhofi otava ka djala oinyanyu.
22 Pwilikina kuxo, oo e ku dala,
Noino dina nyoko, molwaashi ashike a kulupa.
24 Xe yomuyuki ota kala a hafa filufilu;
Nakeshe oo a dala omona omunaendunge ote ke mu hafela.
25 Xo nanyoko otava ka kala va hafa,
Nanyoko oo e ku dala ota ka nyakukwa.
26 Omumwange, yandja elitulemo filufilu kwaame,
Nomesho oye naa hafele eendjila dange.
27 Osheshi ombwada oi li ngaashi elambo lile,
Nomukainhu omuhaeli* oku li ngaashi ondungu ya finana.
28 Oha kala a nangela a teelela ngaashi ombudi;
Oha ningifa ovanhu vahapu va kale vehe fi ovadiinini.
29 Oolyelye ve na oupyakadi? Oolyelye ve na oisho?
Oolyelye hava tanguna? Oolyelye hava ngongota?
Oolyelye ve na oipute omolwoinima yongaho? Oolyelye ve na omesho a tilyana?*
30 Ovovo hava kala efimbo lihapu tava nu omaviinyu;
Ovo hava kongo* omaviinyu a lumbakanifwa.
31 Ino tala koutilyane womaviinyu,
Eshi taa shoma e li meholo, naashi taa i omufenu pofingo,
32 Osheshi xuuninwa otaa ka lumata ngaashi eyoka,
Noku li ngaashi oudiyo weuta.
33 Omesho oye otaa ka mona oinima ihe po,
Nomutima woye otau ka popya oinima ya penga.
34 Oto ka kala ngaashi omunhu a nangala mokati kefuta,
Ngaashi omunhu a nangala koxulo yopala yoskepa.
35 Oto ka tya: “Ova ponokela nge, ndele inandi uda po sha.*
Ova denga nge, ndele inandi shi shiiva.
Ohandi ka penduka naini?
Onda hala vali okunwa.”*