Genesis

30 Eshi Rakel a mona kutya ina dala naJakob, okwa li a twila mumwaina, Lea, ondubo, ndele ta lombwele Jakob, ta ti: “Pe nge ounona, ngeenge hasho ohandi fi.” 2 Jakob okwa li a handukila unene Rakel nokwa tya kuye: “Mbela aame Kalunga ou e ku kelela uha dale ounona?”* 3 Rakel okwa ti: “Omupiya wange okakadona Bilha oye ou. Nangala naye, opo a dalele nge ounona,* opo naame ndi kale ndi na ounona ovo ta dalele nge.” 4 Opo nee Rakel okwa pa Jakob omupiya waye, Bilha, onga omukulukadi waye, na Jakob okwa nangala naye. 5 Bilha okwa ninga oufimba, ndele ta dalele Jakob okaana okamati. 6 Rakel okwa tya: “Kalunga oye omutokoli wange nokwa pwilikina kondaka yange, ndele ta pe nge okaana okamati.” Nomolwaasho a luka okaana oko Dan.* 7 Bilha, omupiya waRakel, okwa ninga natango oufimba, ndele ta dalele vali Jakob okaana okamati okativali. 8 Rakel okwa tya: “Onda kondja neenghono nomumwameme, nonda findana.” Onghee okaana oko okwe ka luka Naftali.*

9 Eshi Lea a mona kutya ita dala vali, okwa kufa omupiya waye, Silpa, ndele te mu yandje kuJakob onga omukulukadi waye. 10 Silpa, omupiya waLea, okwa dalela Jakob okaana okamati. 11 Lea okwa tya: “Aame omunelao.” Onghee okwe ka luka Gad.* 12 Lwanima, Silpa, omupiya waLea, okwa dalela vali Jakob okaana okamati okativali. 13 Opo nee Lea okwa tya: “Ehafo lange. Oukadona otava ka tya shili onda hafa.” Onghee okwe ka luka Asser.*

14 Efiku limwe, Ruben okwa li ta ende pefimbo leteyo loilya yo-wheat, ndele ta mono oiimati yoshimeno shonhumba* mepya. Oiimati oyo okwa li e i twala kuina Lea. Opo nee Rakel okwa tya kuLea: “Pe nge po poiimati yomonamati woye.” 15 Lea okwa tya kuye: “Omushamane wange ou wa kufa nge ina wana? Oto kufa po vali noiimati yomonamati wange?” Rakel okwa tya: “Ngeenge osho ngaho, oshi li nawa, pe nge oiimati yomonamati woye, ove u ka nangale naJakob konguloshi.”

16 Eshi Jakob a li ta di mepya konguloshi, Lea okwa ya e ke mu shakeneke, ndele ta ti: “Oto ka nangala naame, molwaashi onda futa Rakel oiimati yomonamati wange, opo ndi kale naave.” Onghee okwa nangala naye oufiku oo. 17 Kalunga okwa li a uda nokwa nyamukula eilikano laLea, ndele ta ningi oufimba nokwa dalela vali Jakob okaana okamati okatitano. 18 Lea okwa tya: “Kalunga okwa pa nge ondjabi,* molwaashi onda yandja omupiya wange komushamane wange.” Onghee okwe ka luka Isaskar.* 19 Lea okwa ninga vali oufimba, ndele ta dalele Jakob okaana okamati okatihamano. 20 Opo nee Lea okwa ti: “Kalunga okwa pa nge ondjabi iwa. Paife omushamane wange ota kala a hokwa nge, molwaashi onde mu dalela ovanamati vahamano.” Onghee okwe ka luka Sebulon.* 21 Lwanima, okwa ka dala okaana okakadona, ndele te ka luku Dina.

22 Xuuninwa, Kalunga okwa dimbuluka Rakel, nokwe mu uda, ndele ta nyamukula eilikano laye, eshi e mu kwafela a ninge oufimba.* 23 Rakel okwa ninga oufimba, ndele ta dala okaana okamati. Opo nee okwa tya: “Kalunga okwa kufa po okushekwa kwange.” 24 Onghee okwe ka luka Josef,* ndele ta ti: “Jehova okwa wedela nge po vali okaana okamati.”

25 Eshi Rakel a dala Josef, Jakob okwa ya diva kuLaban, ndele ta ti: “Lekele nge ndi ye konhele yetu nokoshilongo shetu. 26 Pe nge ovakulukadi vange ovo nda longela pwoove nosho yo ovana vange, opo ndi dule okuya, molwaashi ou shi shii nawa kutya onde ku longela shi fike peni.” 27 Opo nee Laban okwa tya kuye: “Ngeenge onda filwa onghenda momesho oye . . . , eshi nda tala momukonda, onda mona* kutya Jehova ota nangeke nge noupuna omolwoye.” 28 Okwa weda ko a ti: “Lombwele nge kutya owa hala ondjabi yashike, nohandi ke i ku pa.” 29 Onghee Jakob okwa tya kuye: “Ou shi shii nawa nghee nde ku longela nanghee oufita woye wa hapupala, eshi nda kala nao. 30 Owa li u na oufita munini ofimbo inandi uya, ashike paife owa hapupala neenghono, na Jehova okwe ku nangeka noupuna okudja eshi nde uya. Onaini handi ka longela eumbo lange?”

31 Laban okwa ti: “Nandi ku fute shike?” Jakob okwa tya: “Ino pumbwa okufuta nge. Ndele ngeenge owa ningile nge oshinima shimwe, ohandi ka twikila okulifa oufita woye noku u fila oshisho. 32 Ohandi ka ya moufita woye aushe nena, ndele ove to tongola mo eedi adishe doutotone, odo di na omambafifi, noudjona aveshe oundume, ovo ve na oluvala leimbi, noikombo yoikadi yomambafifi naayo i na outotone. Okudja paife oimuna oyo otai ningi ondjabi yange. 33 Ouyuki* wange oo tau ka popila nge monakwiiwa, eshi to ke uya u tale ondjabi yange. Ngeenge owa hange ndi na oikombo yoikadi, oyo ihe na outotone naayo ihe fi yomambafifi, nosho yo oudjona voundume, ovo vehe na oluvala leimbi, onde i vaka.”

34 Opo nee Laban okwa tya: “Nashi kale ngaashi wa popya.” 35 Mefiku olo, okwa tongola mo oikombo aishe yoindume, oyo i na omakonda, naayo yomambafifi nosho yo oikombo yoikadi aishe, oyo i na outotone, naayo yomambafifi, aishe oyo ya li i na evala litoka noudjona aveshe voundume ovo ve na oluvala leimbi, nokwe i yandja i ka filwe oshisho kovanamati vaye. 36 Konima yaasho, Laban okwa ya kokule naJakob oule woshinano hashi endwa omafiku atatu, na Jakob okwa kala ta lifa oufita woimuna yaLaban oo wa fyaala po.

37 Opo nee Jakob okwa teta outi va talala vomiti do-storax, do-almond nodo-plane, ndele outi ovo te va take omakonda. 38 Outi ovo a honga okwe va tula komesho youfita, mominino omo hamu endele omeva, momatemba okunwina, omo hamu nwine oimuna, opo ngeenge ye uya okunwa, oikadi i kale ya hala okulondwa, eshi tai tale outi ovo.

39 Onghee ngeenge oimuna ya mono outi ovo, ohai lilondo nohai dala oukombwena, ile oudjona ve na omakonda, outotone nosho yo omambafifi. 40 Opo nee Jakob okwa tongola mo oudjona voundume, ndele oufita te u taalelifa koufita woimuna yaLaban, oyo i na omakonda naayo i na oluvala leimbi. Onghee okwa tongola mo oufita waye, noine u lumbakanifa noufita waLaban. 41 Ngeenge oimuna oyo ya paluka nawa ya hala okulondwa, Jakob okwa li ha tula outi ovo momeva komesho youfita, opo i dule okukala tai va tale, eshi tai londwa. 42 Ndele ngeenge oimuna inai paluka nawa, iha tula outi ovo komesho yayo. Onghee oyo inai paluka nawa oya ninga yaLaban, ofimbo oyo ya paluka nawa ya ninga yaJakob.

43 Jakob okwa ninga oshipuna elela, nokwa likola oufita munene novapiya ovalumenhu novakainhu nosho yo eengamelo neendongi.