Omafimbo omativali
34 Josia okwa ninga ohamba, eshi a li e na eedula hetatu, nokwa pangela muJerusalem oule weedula 31. 2 Okwa longa osho sha yuka momesho aJehova nokwa enda meendjila daxekulululwa, David; ina yapuka mo a ye kolulyo, ile kolumosho.
3 Momudo omuti-8 wepangelo laye, ofimbo a li natango okamatyona, okwa hovela okulongela Kalunga kaxekulululwa David; modula onhi-12, okwa hovela okuyeleka mo muJuda nomuJerusalem eenhele dokoikulundudu, eepala diyapuki,* oihongwafano ya hongwa noihongwafano ya hambulwa moshivela.* 4 Okudja opo, ova hanauna po eealtari daBaal moipafi yaye, nokwa ngumauna po eealtari dokutwimina, odo da li kombada yado. Okwa hanauna po yo eepala diyapuki,* oihongwafano ya hongwa noihongwafano ya hambulwa moshivela.* Okwe i nyanyaula fiyo ya ninga ombudu, ndele te i undu kombada yeembila daavo va li have i yambele. 5 Okwa xwikila oipongolo yovapristeri keealtari davo. MuJuda nomuJerusalem osho a yeleka mo ngaho.
6 Moilando yaManasse, yaEfraim, yaSimeon nosho yo fiyo okuNaftali noilando aishe oyo ya hanaunwa po, 7 okwa ngumauna po eealtari nokwa nyanyaula po eepala diyapuki* noihongwafano, ndele te i nyanyaula fiyo ya ninga ombudu; okwa ngumauna po eealtari adishe dokutwimina medu alishe laIsrael; konima yaasho, okwa shuna kuJerusalem.
8 Momudo omuti-18 wepangelo laye, eshi a wapaleka moshilongo notembeli,* okwa tuma Safan, omonamati waAsalia, Maasea, elenga loshilando, naJoa, omonamati waJoahas, omushangi wondjokonona, va ka wapekulule eumbo laJehova, Kalunga kaye. 9 Ove uya kuHilkia, omupristeri munene, ndele tave mu pe oimaliwa, oyo ya etwa keumbo laKalunga, oyo Ovalevi, ovo hava longo ve li ovapashukili vopoivelo va ongela okudja kuManasse, kuEfraim nomuIsrael ashishe nosho yo muJuda, muBenjamin nomovakalimo vomuJerusalem. 10 Opo nee ove i yandja kwaavo va nangekwa po va pashukile oilonga yomeumbo laJehova. Ovalongi vomeumbo laJehova ove i longifa va vandeke nokuwapekulula eumbo. 11 Ove i yandja kovahambwidi nokovatungi va lande omamanya a hongwa noiti yokupameka etungo nova tunge nomitengi omatungo, oo eehamba daJuda da efa a mbonyauke po.
12 Ovanhu ova longa oilonga noudiinini. Ova li tava pashukilwa kOvalevi, ovo va nangekwa po, Jahat naObadja, vomoludalo lOvamerari, nosho yo Sakaria naMesullam, vomoludalo lOvakohat, tava longo ve li ovapashukili. Ovalevi aveshe, ovo ve na ounghulungu wokwiimba, 13 ova li tava pashukile ovanailonga voilonga yokomake* nova li ovapashukili vovanhu aveshe ovo va li tava longo oilonga yoludi keshe; Ovalevi vamwe ova li oohamushanga, ovawiliki novapashukili vopoivelo.
14 Ofimbo va li tava kufa oimaliwa, oyo ya etwa keumbo laJehova, omupristeri Hilkia okwe litwa embo lOmhango yaJehova, oyo ya yandjwa okupitila* muMoses. 15 Onghee Hilkia okwa lombwela hamushanga Safan, a ti: “Onda hanga embo lOmhango meumbo laJehova.” Hilkia okwa yandja embo olo kuSafan. 16 Opo nee Safan okwa twala embo olo kohamba, ndele te i lombwele, ta ti: “Ovapiya voye otava longo oilonga aishe oyo va pewa. 17 Ova kufa mo oimaliwa, oyo va hanga meumbo laJehova, nove i yandja kovalumenhu, ovo va nangekwa po, nokwaavo tava longo oilonga.” 18 Hamushanga Safan okwa lombwela yo ohamba, a ti: “Ope na embo olo nda pewa komupristeri Hilkia.” Opo nee Safan okwa hovela oku li leshela ohamba.
19 Diva eshi ohamba ya uda eendjovo dOmhango, oya pombaula oikutu yayo. 20 Opo nee ohamba oya yandja elombwelo kuHilkia, kuAhikam, omonamati waSafan, kuAbdon, omonamati waMika, kuhamushanga Safan nokuAsaia, omupiya wohamba, ya ti: 21 “Indeni, ka puleni kuJehova ponhele yange noponhele yaavo va xupa po muIsrael nomuJuda shi na sha neendjovo odo di li membo olo la monika, molwaashi Jehova ote ke tu handukila neenghono, osheshi ootatekulululwa inava wanifa po ondjovo yaJehova mokudiinina oinima aishe oyo ya shangwa membo olo.”
22 Onghee Hilkia pamwe navakwao, ovo va tumwa kohamba, ova ya kuHulda, omuprofeti omukainhu. Hulda okwa li omukulukadi waSallum, omonamati waTikva, omonamati waHarhas, omupashukili woikutu,* nokwa li ha di moshitukulwa oshitivali shaJerusalem; oko va popila naye oko. 23 Omuprofeti Hulda okwe va lombwela, a ti: “Jehova, Kalunga kaIsrael, ota ti ngaha, ‘Lombweleni omulumenhu oo e mu tuma kwaame, tamu ti: 24 “Jehova ota ti ngaha, ‘Ohandi ka etela onhele ei novakalimo vamo oudjuu, omafingo aeshe oo a shangwa membo olo la leshelwa ohamba yaJuda. 25 Molwaashi ova efa nge po notava twimine ookalunga vamwe omatwiminoyambo, opo va handukife nge noilonga aishe yomake avo, ehandu lange otali ka hanga onhele ei noitali ka lotekwa.’” 26 Ndele ohamba yaJuda, oyo ye mu tuma mu pule kuJehova, omu na oku i lombwela ngaha, “Jehova, Kalunga kaIsrael, ota ti: ‘Shi na sha neendjovo odo wa uda, 27 molwaashi owa pupaleka omutima woye, we lininipika koshipala shaKalunga, eshi wa uda eendjovo di na sha nonhele ei nosho yo ovakalimo vamo, we lininipika koshipala shange, wa pombaula oikutu yoye nokulila koshipala shange, naame onde ku uda yo, Jehova osho ta ti. 28 Nomolwaasho handi ke ku paka pooxokulululwa,* noto ka nangekwa mombila yoye nombili, nomesho oye itaa ka mona oudjuu aushe, oo tau ka hanga onhele ei nosho yo ovakalimo vamo.’”’”
Opo nee ova twala enyamukulo kohamba. 29 Onghee ohamba oya tuma ondjovo noya ongaleka ovakulunhu aveshe vomuJuda novomuJerusalem. 30 Konima yaasho, ohamba oya ya keumbo laJehova pamwe novalumenhu aveshe vomuJuda, ovakalimo vomuJerusalem, ovapristeri, Ovalevi, ovanhu aveshe, ovakulunhu nounona. Oye va leshela eendjovo adishe odo di li membo lehangano, olo la hangwa meumbo laJehova. 31 Ohamba oya fikama ponhele yayo, ndele tai ningi ehangano* koshipala shaJehova, kutya otai ka shikula Jehova nokudiinina oipango yaye, omadimbulukifo aye nomaufomhango aye nomutima wayo aushe nosho yo nomwenyo* wayo aushe, mokuwanifa po eendjovo dehangano, odo da shangwa membo olo. 32 Natango, oya ladipika ovakalimo aveshe vomuJerusalem novomuBenjamin ve li diinine. Ovakalimo vomuJerusalem ova katuka metwokumwe nehangano laKalunga, Kalunga kooxekulululwa. 33 Opo nee Josia okwa hanauna po oinima aishe itondifa* medu alishe lOvaisrael nokwa kwafela Ovaisrael aveshe va longele Jehova, Kalunga kavo. Mokukalamwenyo kwaye akushe,* inava efa okushikula Jehova, Kalunga kooxekulululwa.