Hesekiel
20 Momudo omutiheyali, momwedi omutitano, mefiku etimulongo lomwedi, ovakulunhu vamwe vaIsrael ove uya, nokukala omutumba komesho yange, va pule Jehova. 2 Opo nee ondjovo yaJehova oye uya kwaame tai ti: 3 “Omona womunhu, popya novakulunhu vaIsrael, noku va lombwela to ti, ‘Eshi osho Omwene Omunamapangelo aeshe, Jehova, ta ti: “Omwe uya okupula nge sha? ‘Oshili, ofimbo ame ndi na omwenyo, itandi ka nyamukula eindilo leni,’ Omwene Omunamapangelo aeshe, Jehova, osho ta ti.”’
4 “Mbela owe lilongekida oku va tokola?* Omona womunhu, mbela owe lilongekida oku va tokola? Va shiivifila oinima itondifa, oyo ooxekulululwa va ninga. 5 Va lombwela kutya, ‘Eshi osho Omwene Omunamapangelo aeshe, Jehova, ta ti: “Mefiku olo nda hoolola Israel, onda ana* yo koludalo leumbo laJakob, ndele handi lishiivifa kuvo medu laEgipiti. Onghee onda ana kuvo, ndele handi ti, ‘Aame Jehova, Kalunga keni.’ 6 Mefiku olo, onda ana kutya ohandi ke va kufa mo medu laEgipiti, ndi va twale kedu, olo nde va kongela,* edu tali kunguluka omashini nomaadi eenyiki. Ola li edu liwa neenghono* momadu aeshe. 7 Opo nee onda tya kuvo, ‘Keshe umwe womunye na kupuleshi oinima itondifa, oyo i li moipafi yeni; inamu linyateka noikalunga itondifa* yaEgipiti. Aame Jehova, Kalunga keni.’
8 “‘“Ashike ova tukululila nge oshibofa, nokava li va hala okupwilikina kwaame. Inava ekelashi oinima itondifa, oyo ya li moipafi yavo, nokava li tava ka efa po oikalunga itondifa yaEgipiti. Onghee onda udaneka ndi va tilile onya yange, noku va fululukila filufilu nehandu lange medu laEgipiti. 9 Ashike onda katuka omolwedina lange, opo liha nyatekwe moipafi yoiwana mokati kaayo va li hava di. Osheshi onde ve* lishiivifila moipafi yoiwana, eshi nde va* kufa mo medu laEgipiti. 10 Onghee onde va kufa mo medu laEgipiti, ndele handi va twala mombuwa.
11 “‘“Opo nee onde va pa eenghedimhango dange, noku va shiivifila omatokolo ange, opo omunhu oo te i shikula a mone omwenyo muo. 12 Onde va pa yo omashabata ange e li edidiliko pokati kange navo, opo va shiive kutya ame, Jehova, aame handi va yapula.
13 “‘“Ashike eumbo laIsrael ola tukululila nge oshibofa mombuwa. Inava enda meenghedimhango dange, noinava tambula ko omatokolo ange, oo ngeenge omunhu okwe a shikula, ta ka kala nomwenyo omolwao. Ova nyateka filufilu omashabata ange. Onghee onda udaneka ndi va tilile ehandu lange mombuwa, opo ndi va hanaune po. 14 Onda katuka omolwedina lange mwene, opo liha nyatekwe moipafi yoiwana, oyo ya mona nge, eshi nde va* kufa mo. 15 Onda ana yo kuvo mombuwa kutya itandi ke va twala mo medu olo nde va pa, edu tali kunguluka omashini nomaadi eenyiki, edu liwa neenghono* momadu aeshe, 16 molwaashi inava tambula ko omatokolo ange, inava enda meenghedimhango dange, nova nyateka omashabata ange, osheshi omitima davo oda li tadi shikula oikalunga yavo itondifa.
17 “‘“Ashike ame* onde va fila onghenda, noinandi va hanauna po; inandi va xulifila po mombuwa. 18 Onda tya kovanamati vavo mombuwa, ‘Inamu enda pamaufomhango ooxokulululwa, ile mu diinine omatokolo avo, ile mu linyateke noikalunga yavo itondifa. 19 Aame Jehova, Kalunga keni. Endeni meenghedimhango dange nokudiinina omatokolo ange, ndele tamu a wanifa po. 20 Ndele tamu yapula omashabata ange, notaa ka kala e li edidiliko pokati kange nanye, opo mu shiive kutya aame Jehova, Kalunga keni.’
21 “‘“Ashike ovanamati ova li va hovela okutukululila nge oshibofa. Inava enda meenghedimhango dange, noinava diinina nokuwanifa po omatokolo ange, oo ngeenge omunhu okwe a shikula, ta ka kala nomwenyo omolwao. Ova nyateka omashabata ange. Onghee onda udaneka ndi va tilile onya yange, noku va fululukila filufilu nehandu lange mombuwa. 22 Ashike onde likelela nonda katuka omolwedina lange mwene, opo liha nyatekwe moipafi yoiwana, oyo ya mona nge, eshi nde va* kufa mo. 23 Onda li yo nda ana kuvo mombuwa kutya ohandi ke ve lihanifila mokati koiwana noku va halakanifila mokati komadu oo, 24 molwaashi inava wanifa po omatokolo ange, noinava tambula ko eenghedimhango dange, ova nyateka omashabata ange, nova li va shikula* oikalunga itondifa yooxekulululwa. 25 Onda li yo nde va efa va shikule eenghedimhango, odo da li dihe fi diwa nosho yo omatokolo, oo a li taa dulu oku va kanififa omwenyo. 26 Onde va efa va nyatekwe komayambo avo vene, eshi va endifa momundilo ovana vavo aveshe voiveli, ndi va mbuwapaleke, opo va shiive kutya aame Jehova.”’
27 “Onghee popya neumbo laIsrael, ove omona womunhu, ndele to va lombwele kutya, ‘Eshi osho Omwene Omunamapangelo aeshe, Jehova, ta ti: “Ooxokulululwa ova li va sheka nge mokuhakala ovadiinini kwaame monghedi yo ya tya ngaho. 28 Onde va eta medu, olo nda ana kutya ohandi ke va pa. Eshi va mona oikulundudu aishe ile nosho yo omiti di na omafo, ova hovela okuyamba omayambo avo nosho yo omayambo avo taa nyemateke. Ova yandja edimba liwa* lomayambo avo nova tilashi oikunwayambo yavo oko. 29 Onghee onde va pula nda ti, ‘Elalakano leni lokuya konhele ei yoshikulundudu olashike? (Natango ohai ifanwa Onhele yOshikulundudu fiyo okunena.)’”’
30 “Paife tya keumbo laIsrael, ‘Eshi osho Omwene Omunamapangelo aeshe, Jehova, ta ti: “Mbela otamu linyateke nye vene, ngaashi ooxokulululwa va ninga mokushikula oikalunga yavo itondifa, opo va haele pamhepo nayo? 31 Ndele mbela natango otamu linyateke nye vene fiyo omefiku eli mokuyamba omayambo koikalunga yeni aishe itondifa, mokweendifa ovanamati veni momundilo? Nye eumbo laIsrael, mbela ondi na oku mu nyamukula, eshi tamu pula nge pefimbo la faafana?”’
“‘Oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘itandi ka nyamukula eindilo leni. 32 Naasho shi li momadiladilo* eni, eshi tamu ti, “Natu ningeni ngaashi oiwana, ngaashi omaukwaneumbo okomadu amwe, oo haa longele* oshiti nosho yo emanya,” kashi na efiku shi ningwe nandenande.’”
33 “‘Oshili, ofimbo ame ndi na omwenyo,’ Omwene Omunamapangelo aeshe, Jehova, ota ti, ‘Ohandi ke mu pangela ndi li ohamba neke li na eenghono, nokwooko kwa yeluka noku mu fululukila nehandu. 34 Ohandi ke mu kufa mo movanhu noku mu ongela mo momadu omo mwa li mwa halakanifilwa neke li na eenghono, nokwooko kwa yeluka nosho yo nehandu tali fuluka. 35 Ohandi ke mu twala mombuwa yovanhu, nohandi ke mu tokolela oko oshipala noshipala.
36 “‘Ngaashi ashike nda tokola ooxokulululwa mombuwa yomedu laEgipiti, osho yo handi ke mu tokola,’ Omwene Omunamapangelo aeshe, Jehova, osho ta ti. 37 ‘Ohandi ke mu endifa koshi yodibo yomufita, nohandi ke mu ningifa mu kale metwokumwe* nehangano. 38 Ashike ohandi ka kufa mo mokati keni ovanashibofa nosho yo ovo tava nyono kwaame. Osheshi ohandi ke va kufa mo medu lavo, omo ve li ovanailongo, ashike itava ka ya mo medu laIsrael; nove na oku ka shiiva kutya aame Jehova.’
39 “Ndele nye, eumbo laIsrael, eshi osho Omwene Omunamapangelo aeshe, Jehova, ta ti: ‘Keshe umwe womunye na ye, ndele ta ka longela oikalunga yaye itondifa. Ashike konima yaasho, ngeenge inamu pwilikina kwaame, itamu ka dula vali okunyateka edina lange liyapuki nomayambo eni nosho yo noikalunga yeni itondifa.’
40 “‘Osheshi momhunda yange iyapuki, komhunda yaIsrael ile,’ Omwene Omunamapangelo aeshe, Jehova, ota ti, ‘oko eumbo laIsrael alishe, aveshe, tali ka longela medu olo. Ohandi ka kala nde va hokwa oko, nohandi ka teelela omayambidido eni nosho yo omayambo eni oilikolomwa yeni, oyo ya pya tete, oinima yeni aishe iyapuki. 41 Omolwedimba liwa,* ohandi ke mu hokwa, eshi handi ke mu kufa mo movanhu noku mu ongela mo momadu oo, omo mwa li mwa halakanifilwa, nohandi ka yapulwa mokati keni moipafi yoiwana.’
42 “‘Nomu na oku ka shiiva kutya aame Jehova, eshi handi ke mu twala kedu laIsrael, medu olo nda ana kutya ohandi ke li pa ooxokulululwa. 43 Naako oko tamu ka dimbulukila elihumbato leni nosho yo oilonga yeni aishe, oyo mwe linyateka nayo, notamu ke litonda nye vene,* omolwoinima aishe ii oyo mwa ninga. 44 Opo nee nye, eumbo laIsrael, omu na oku ka shiiva kutya aame Jehova, eshi handi ka ungaunga nanye ngaho omolwedina lange, ndele hamolwelihumbato leni lii, ile molwoinima ii oyo mwa ninga,’ Omwene Omunamapangelo aeshe, Jehova, osho ta ti.”
45 Nondjovo yaJehova oye uya vali kwaame tai ti: 46 “Omona womunhu, taalelifa oshipala shoye kombinga yokolukadi nokushiivifa kolukadi, ndele to xunganekele ofuka yomedu lokolukadi. 47 Tya kofuka yokolukadi, ‘Uda ondjovo yaJehova. Eshi osho Omwene Omunamapangelo aeshe, Jehova, ta ti: “Ohandi ke mu shakalela omundilo, nohandi ka xwika po omuti keshe mutalala nosho yo omuti keshe wa kukuta mwoove. Omalaka omundilo itaa ka dimwa, noshipala keshe otashi ka pya kuo, okudja kolukadi fiyo okolundume. 48 Nombelela* aishe otai ka mona kutya ame mwene, Jehova, aame nde i tomeka omundilo, opo uha dule okudimwa.”’”
49 Ndele onda ti: “Akutu shili! Omwene Omunamapangelo aeshe, Jehova! Otava popi kombinga yange tava ti, ‘Mbela ita popi ashike meetumbutumbu?’”*