Levitikus
3 “‘Ngeenge eyambo laye oli li eyambo loukumwe,* nongeenge ota yandje ongobe, kutya nee ondume, ile onghadi, oku na okuyandja ongobe ya koshoka koshipala shaJehova. 2 Oku na okutenheka omake aye komutwe wongobe oyo ta yambe noi na okudipaelwa poshivelo shetwali lokwoongalela, novanamati vaAron, ovapristeri, otava ka shamina ohonde yayo keembinga adishe doaltari. 3 Oku na okuyandja oshitukulwa sheyambo loukumwe shi li eyambo la yambelwa Jehova okupitila momundilo: oinghene oyo i li komandjadja, oinghene aishe oyo ya dingilila omandjadja, 4 nosho yo eefiyo mbali noinghene oyo i li kudo, oyo i li popepi nekalo. Ota ka kufa ko yo oinghene oyo i li kexuli nosho yo eefiyo. 5 Ovanamati vaAron otave ke i xwikila koaltari kombada yexwikiloyambo olo la tulwa koikuni, oyo i li pomundilo; oi li eyambo lomundilo ledimba liwa* koshipala shaJehova.
6 “‘Ngeenge osho ta yambele Jehova shi li eyambo loukumwe odi, ile oshikombo, oku na okuyandja oshindume, ile oshikadi sha koshoka. 7 Ngeenge ota yandje odjona yondume i li eyambo laye, oku na oku i yandja koshipala shaJehova. 8 Ota ka tenheka omake aye komutwe woshinamwenyo shexwikiloyambo laye, notashi ka dipaelwa komesho yetwali lokwoongalela. Ovanamati vaAron otava ka shamina ohonde yasho keembinga adishe doaltari. 9 Ota ka yandja oinghene yeyambo loukumwe i li eyambo lomundilo kuJehova. Ota ka kufa ko oinghene aishe yokomushila oyo i li popepi nekipa lombuda, oinghene oyo i li komandjadja, oinghene aishe oyo ya dingilila omandjadja, 10 nosho yo eefiyo mbali noinghene, oyo i li kudo, oyo i li popepi nekalo. Ota ka kufa ko yo oinghene, oyo i li kexuli, nosho yo eefiyo. 11 Omupristeri ote ke i xwikila koaltari i li eendja,* eyambo la yambelwa Jehova okupitila momundilo.
12 “‘Ngeenge eyambo laye oloshikombo, oku na oku shi yandja koshipala shaJehova. 13 Ota ka tenheka omake aye komutwe washo, notashi ka dipaelwa komesho yetwali lokwoongalela, novanamati vaAron ove na okushamina ohonde yasho keembinga adishe doaltari. 14 Oshitukulwa osho ta ka yandja, shi li eyambo laye la yambelwa Jehova okupitila momundilo, ongaashi oinghene oyo i li komandjadja, oinghene aishe oyo ya dingilila omandjadja, 15 nosho yo eefiyo mbali noinghene oyo i li kudo, oyo i li popepi nekalo. Ota ka kufa ko yo oinghene oyo i li kexuli nosho yo eefiyo. 16 Omupristeri ote ke i xwikila koaltari i li eendja,* eyambo ledimba liwa* la yambwa okupitila momundilo. Oinghene aishe oyaJehova.
17 “‘Oi li onghedimhango yaalushe komapupi eni, meenhele deni adishe: Kamu na okulya oinghene, ile ohonde nandenande.’”