Esra
7 Konima yoinima ei, pefimbo lepangelo lohamba Artasasta yaPersia, Esra* okwa shuna kuJerusalem a dja kuBabilon. Okwa li omonamati waSeraja, omonamati waAsaria, omonamati waHilkia, 2 omonamati waSallum, omonamati waSadok, omonamati waAhitub, 3 omonamati waAmaria, omonamati waAsaria, omonamati waMeraiot, 4 omonamati waSerahia, omonamati waUssi, omonamati waBukki, 5 omonamati waAbisua, omonamati waPinehas, omonamati waEliaser, omonamati waAron, omupristeri omukulunhu. 6 Esra okwa dja kuBabilon. Okwa li omushangululi,* oo a li e shii nawa* Omhango yaMoses, oyo Jehova, Kalunga kaIsrael, a yandja. Ohamba oya li ye mu pa keshe shimwe osho a li a pula, molwaashi eke laJehova, Kalunga kaye, ola li pamwe naye.
7 Ovaisrael vamwe, ovapristeri, Ovalevi, ovaimbi, ovapashukili vopoivelo novapiya votembeli,* ova ya kuJerusalem momudo omutiheyali wohamba Artasasta. 8 Esra okwe uya muJerusalem momwedi omutitano, momudo omutiheyali wepangelo lohamba oyo. 9 Mefiku lotete lomwedi wotete, okwa hovela olweendo laye a dja muBabilon, nokwa fika muJerusalem mefiku lotete lomwedi omutitano, molwaashi eke liwa laKalunga kaye ola li pamwe naye. 10 Esra okwa li a longekida omutima waye,* opo a konakone Omhango yaJehova, oku i tula moilonga, nokuhonga omaufomhango nomatokolo ayo muIsrael.
11 Ei okopi yonhumwafo, oyo ohamba Artasasta ya yandja komupristeri nomushangululi* Esra, omukonakoni omunekeka woipango* yaJehova nosho yo omaufomhango aye, oo a pa Ovaisrael:
12 * “Artasasta, ohamba yeehamba, komupristeri Esra, omushangululi* wOmhango yaKalunga komeulu: Kala u na ombili inene. 13 Onda yandja elombwelo kutya keshe umwe oo e li mouhamba wange womoshiwana shaIsrael nosho yo ovapristeri nOvalevi, ovo va hala okuya pamwe naave kuJerusalem, otava dulu okuya. 14 Ove owa tumwa kohamba pamwe novayandjimayele vayo u konakone, ngeenge Omhango yaKalunga koye oyo u kwete,* otai wanifwa ngoo muJuda nomuJerusalem, 15 nokukufa oshisilveri noshingoli, osho ohamba pamwe novayandjimayele vayo va yandja nehalo liwa kuKalunga kaIsrael, oo onhele yaye i li muJerusalem, 16 pamwe noisilveri noingoli aishe, oyo wa pewa* moitukulwalongo aishe yaBabilon, pamwe neeshali odo ovanhu nosho yo ovapristeri va yandja nehalo liwa kotembeli yaKalunga kavo, oyo i li muJerusalem. 17 Oimaliwa ei ou na oku i landa po diva eengobe deemhedi, eedi deendume, eedjona deendume, pamwe neendjayambo dayo nosho yo oikunwayambo yado, nou na oku i yandja koaltari yomotembeli yaKalunga keni muJerusalem.
18 “Oisilveri noingoli, oyo tai xupu po, oto dulu oku i longifa osho u wete tashi ku wapalele nosho yo ovamwaxo, metwokumwe nehalo laKalunga keni. 19 Oikwatelwa aishe, oyo to pewa omolwoilonga yotembeli yaKalunga koye, ou na oku i twala kuJerusalem koshipala shaKalunga. 20 Oipumbiwa ikwao yomotembeli yaKalunga koye, oyo wa teelelwa u yandje, i yandja to kufa momamona omouhamba.
21 “Ame, ohamba Artasasta, onda yandja elombwelo kovatuvikili aveshe vomamona, ovo ve li moshitukulwa shoKombada yOmulonga,* kutya keshe shimwe osho omupristeri Esra, omushangululi* wOmhango yaKalunga komeulu, te mu pula oshi na okuningwa diva, 22 fiyo opoitalenti* 100 yoshisilveri, poiyelekifo yokori* 100 yo-wheat, poiyelekifo yobata* 100 yomaviinyu, oiyelekifo yobata 100 yomaadi nosho yo omongwa wa wana. 23 Oinima aishe, oyo Kalunga komeulu a popya, nai longwe nouladi omolwotembeli yaKalunga komeulu, opo Kalunga aha handukile oshiwana shetu, ame novanamati vange. 24 Otamu kunghililwa kutya inashi pitikwa okupula oifendela, eemhale,* ile okukunguda ovapristeri nOvalevi, ovaimbi, ovapashukili vopoivelo, ovapiya votembeli,* novalongi vomotembeli yaKalunga.
25 “Ove Esra, metwokumwe nounongo, oo wa pewa kuKalunga koye,* nangeka po ovanambelewa vomeemhangu novatokoli va tokole ovanhu aveshe, ovo ve li moshitukulwa shoKombada yOmulonga, aveshe ovo ve shii eemhango daKalunga koye; omu na oku di honga keshe umwe oo ehe di shii. 26 Keshe oo iha diinine Omhango yaKalunga koye nosho yo omhango yohamba oku na okutokolwa diva, kutya nee okutokolelwa efyo, okutewatewa, okufutifwa, ile okutulwa modolongo.”
27 Jehova, Kalunga kootatekulululwa, na hambelelwe, oo e linyengifa ohamba i wapalekife otembeli yaJehova, oyo i li muJerusalem! 28 Okwa ulikila nge ohole i na oudiinini moipafi yohamba novayandjimayele vayo nosho yo omalenga aeshe ohamba omanaenghono. Onghee onda li nda nyatipala,* molwaashi eke laJehova, Kalunga kange, ola li pamwe naame. Onda ongela muIsrael ovalumenhu* ovakwatelikomesho va ye pamwe naame kuJerusalem.