Josua

15 Edu olo la pewa* epata laJuda pamaludi avo, ola ya fiyo okeengaba daEdom mombuwa yaSin fiyo okongaba yaNegeb, kombinga yokolukadi. 2 Ongaba yavo yokolukadi oya dja komunghulo wEfuta lOmongwa,* sha hala okutya, omunghulofuta oo wa taalela kolukadi. 3 Oya ya kolukadi loshikulundudu shaAkrabim, ya pita muSin, ndele tai i fiyo okolukadi laKades-barnea, ya pita muHesron fiyo okuAddar, ndele tai i fiyo okuKarka. 4 Opo nee oya pita muAsmon, ndele tai i fiyo okEfilu* laEgipiti, nongaba oyo oya xulila kEfuta.* Oyo oya li ongaba yavo yokolukadi.

5 Ongaba yokoushilo oya li Efuta lOmongwa* fiyo opopo pa xulila omulonga waJordan, nongaba oyo i li kolundume oya tamekela komunghulofuta, opo pa xulila omulonga waJordan. 6 Ongaba oya ya fiyo okuBet-hogla, ndele tai piti kolundume laBet-araba, noya ya fiyo okemanya laBohan, omonamati waRuben. 7 Ongaba oya ya fiyo okuDebir pEfilu laAkor, ndele tai tanaukile kombinga yokolundume kuGilgal, osho shi li popepi noshikulundudu shaAdummim, sha hala okutya, kolukadi lefilu, noya pita pomeva omuEn-semes, ndele tai xulile kuEn-rogel. 8 Ongaba oya ya fiyo okEfilu laHinnom* fiyo okoshikulundudu shOvajebusi, kolukadi, sha hala okutya, Jerusalem, nongaba oya ya fiyo okoxulo yomhunda oyo i li popepi nEfilu laHinnom kouninginino, osho shi li komunghulo wEfilu lOvarefaim kombinga yokolundume. 9 Ongaba oya li ya tendwa okudja koxulo yomhunda fiyo okofifiya yomuNeftoa, noya ya fiyo okoilando yokomhunda yaEfron, noya tendwa fiyo okuBaala, sha hala okutya, Kiriat-jearim. 10 Ongaba oyo oya ngolyoka okudja kuBaala, kombinga yokouninginino, fiyo okomhunda yaSeir noya pita koshikulundudu komhunda yaJearim kolundume, sha hala okutya, Kesalon, ndele tai i fiyo okuBet-semes noya pita muTimna. 11 Ongaba oyo oya ya fiyo okoshikulundudu shaEkron kolundume, noya li ya tendwa fiyo okuSikeron, ndele tai piti komhunda Baala noya ya fiyo okuJabneel, ndele tai xulile kefuta.

12 Ongaba yokouninginino oya li pEfuta Linene* nokomunghulofuta walo. Ongaba yoludalo laJuda pamaludi avo osho ya li ngaho keembinga adishe.

13 Josua okwa yandja oshitukulwa kuKaleb, omonamati waJefunne, mokati koludalo laJuda palombwelo laJehova, shedina Kiriat-arba, (Arba oye a li xe yaAnak), sha hala okutya, Hebron. 14 Onghee Kaleb okwa taataa mo ovanamati vatatu vaAnak: Sheshai, Ahiman naTalmai, oludalo laAnak. 15 Opo nee okwa ya a ka lwife ovakalimo vomuDebir (edina Debir ola li Kiriat-sefer.) 16 Kaleb okwa tya: “Omulumenhu ou ta ponokele Kiriat-sefer noku shi kwata ko, ohandi ke mu pa omonakadona wange, Aksa, a ninge omukulukadi waye.” 17 Otniel, omonamati waKenas, omumwaina waKaleb, okwe shi kwata ko. Onghee okwe mu pa omonakadona waye, Aksa, a ninge omukulukadi waye. 18 Ofimbo Aksa a li ta i keumbo, okwa lombwela omushamane waye a pule xe epya. Opo nee Aksa okwa londoloka ko kondongi.* Kaleb okwe mu pula, a ti: “Owa hala shike?” 19 Aksa okwa tya: “Alikana, nangeke nge noupuna, molwaashi owa pa nge oshitukulwa shedu kombinga yokolukadi.* Pe nge yo Gullot-maim.”* Opo nee okwe mu pa Gullot, osho shi li komulondo, naGullot, osho shi li mefilu.

20 Olo ola li efyuululo lepata laJuda pamaludi avo.

21 Oilando oyo ya li kombinga yokolukadi loshitukulwa shaJuda, oyo ya ya fiyo okeengaba dOvaedom, oyo: Kabseel, Eder, Jagur, 22 Kina, Dimona, Adada, 23 Kedes, Hasor, Itnan, 24 Sif, Telem, Bealot, 25 Hasor-hadatta nosho yo Keriot-hesron, sha hala okutya Hasor, 26 Amam, Shema, Molada, 27 Hasar-gadda, Hesmon, Bet-pelet, 28 Hasar-sual, Ber-seba, Bisiotia, 29 Baala, Iim, Esem, 30 Eltolad, Kesil, Horma, 31 Siklag, Madmanna, Sansanna, 32 Leboat, Silhim, Ain nosho yo Rimmon, oilando aishe kumwe oya li 29 pamwe nomikunda dayo.

33 MuShefela omwa li Estaol, Sora, Asna, 34 Sanoa, En-gannim, Tappua, Enam, 35 Jarmut, Adullam, Soko, Aseka, 36 Saaraim, Aditaim, Gedera nosho yo Gederotaim,* oilando 14 nosho yo omikunda dayo.

37 Omwa li yo Senan, Hadasa, Migdal-gad, 38 Dilean, Mispe, Jokteel, 39 Lakis, Boskat, Eglon, 40 Kabbon, Lahmas, Kitlis, 41 Gederot, Bet-dagon, Naama nosho yo Makkeda, oilando 16 nomikunda dayo.

42 Omwa li yo Libna, Eter, Asan, 43 Ifta, Asna, Nesib, 44 Keila, Aksib nosho yo Maresha, oilando omuwoi nomikunda dayo.

45 Natango omwa li yo Ekron needoolopa dasho* nomikunda dasho, 46 okudja kombinga yokouninginino waEkron, oitukulwa aishe oyo ya dingilila Asdod nosho yo omikunda dayo.

47 Asdod needoolopa dasho* nomikunda dasho; Gasa needoolopa dasho nomikunda dasho, fiyo okEfilu laEgipiti, Efuta Linene* nosho yo komunghulofuta walo.

48 Moshitukulwa shokeemhunda omwa li Samir, Jattir, Soko, 49 Danna, Kiriat-sanna, sha hala okutya, Debir, 50 Anab, Estemo, Anim, 51 Gosen, Holon nosho yo Gilo, oilando 11 nomikunda dayo.

52 Omwa li yo Araba, Duma, Eshan, 53 Janim, Bet-tappua, Afek, 54 Humta, Kiriat-arba, sha hala okutya, Hebron, nosho yo Sior, oilando omuwoi nomikunda dayo.

55 Omwa li yo Maon, Karmel, Sif, Jutta, 56 Jisreel, Jokdeam, Sanoa, 57 Kain, Gibea nosho yo Timna, oilando omulongo nomikunda dayo.

58 Omwa li yo Halhul, Bet-sur, Gedor, 59 Maarat, Bet-anot nosho yo Eltekon, oilando ihamano nomikunda dayo.

60 Omwa li yo Kiriat-baal, sha hala okutya, Kiriat-jearim nosho yo Rabba, oilando ivali nomikunda dayo.

61 Mombuwa omwa li yo Bet-araba, Middin, Sekaka, 62 Nibsan, oshilando shomongwa nosho yo En-gedi, oilando ihamano nomikunda dayo.

63 Ovalumenhu Ovajuda kava li tava dulu okutaataa mo Ovajebusi ovo va li hava di muJerusalem, onghee Ovajebusi ova twikila okukala pamwe nOvajuda muJerusalem fiyo okunena.