Exodus
13 Jehova okwa popya vali naMoses, a ti: 2 “Yapulile nge* ovalumenhu aveshe voiveli* vOvaisrael. Ovalumenhu ovo tava dalwa tete, ile oimuna yoindume oyo tai dalwa tete, aishe oyange.”
3 Opo nee okwa lombwela ovanhu, a ti: “Dimbulukeni efiku olo mwa dja muEgipiti, meumbo loupika, molwaashi Jehova okwe mu kufa mo neke li na eenghono. Onghee inamu lya nande osha sha ya efulika. 4 Omwa dja mo mefiku eli, momwedi waAbib.* 5 Ngeenge Jehova okwe mu twala medu lOvakaanan, lOvaheti, lOvaamori, lOvahevi nolOvajebusi, olo a li a udanekela ooxokulululwa kutya ote li mu pe, edu tali kunguluka omashini nomaadi eenyiki, omu na okukala hamu dimbuluka oshivilo* eshi momwedi oo. 6 Omu na okulya omingome inadi ya efulika oule womafiku aheyali, nomefiku etiheyali, omu na okuningila Jehova oshivilo. 7 Omungome inau ya efulika ou na okuliwa omafiku aheyali, nokamu na okuhangika nasha sha ya efulika. Moshitukulwa* sheni ashishe inamu kala olumbololo la ya efulika. 8 Mefiku olo, ou na okulombwela ovana voye kutya, ‘Ohandi ningi ngaho omolwoshinima osho Jehova a ningila nge, eshi a kufa nge muEgipiti.’ 9 Otashi ka kala edidiliko meke loye nedimbulukifo momupolo woye,* opo omhango yaJehova iha dje mo mokanya koye, osheshi Jehova okwe ku kufa mo muEgipiti neke li na eenghono. 10 Omu na okukala hamu diinine onghedimhango ei peufwafimbo layo omudo keshe.
11 “Ngeenge Jehova okwe mu twala medu lOvakaanan, olo a udaneka oku mu pa nosho yo ooxokulululwa, 12 omu na okupa Jehova ovalumenhu aveshe ovo va dalwa tete* nosho yo oimuna aishe yoindume oyo mu na, oyo ya dalwa tete. Ovalumenhu nosho yo oimuna yoindume oyaJehova. 13 Ondongi keshe ya dalwa tete ou na oku i pingakanifa* nodi, nongeenge ino i pingakanifa, ou na oku i teya ofingo. Novanamati voye voiveli ou na oku va kulila.
14 “Lwanima, ngeenge ovana voye ove ke ku pula kutya, ‘Osho osha hala okutya shike?’ ou na oku va lombwela kutya, ‘Jehova okwe tu kufa mo neke li na eenghono muEgipiti, meumbo loupika. 15 Eshi Farao a kala ta anye oku tu lekela, Jehova okwa dipaa oiveli aishe yomedu laEgipiti, okudja koiveli yovanhu, fiyo okoinamwenyo oyo ya dalwa tete. Nomolwaasho handi yambele Jehova oinamwenyo aishe yoindume oyo ya dalwa tete,* nohandi kulile ovana vange aveshe voiveli.’ 16 Otashi ka kala edidiliko meke loye nomomupolo woye,* osheshi Jehova okwe tu kufa mo muEgipiti neke li na eenghono.”
17 Eshi Farao a lekela ovanhu, Kalunga ine va efa va ye nondjila oyo ya finda kedu lOvafilisti, nonande ola li popepi. Kalunga okwa ti: “Ovanhu otashi dulika va ninguluke, ngeenge va shakeneke oita, ndele tava shuna kuEgipiti.” 18 Onghee Kalunga okwa li e va ningifa va ye nondjila yomombuwa oyo ya finda kEfuta Litilyana. Ovaisrael ovo ova dja mo medu laEgipiti va unganekwa nawa, ngaashi ashike eengudu domatangakwaita. 19 Moses okwa ya nomakipa aJosef, molwaashi Josef okwa li a anifa filufilu ovana vaIsrael, a ti: “Kalunga ote ke mu pashukila, nomu na okukufa mo omakipa ange omu, mu ye nao.” 20 Ova dja mo muSukkot, ndele tava ongo onhanda muEtam, popepi nombuwa.
21 Jehova okwe va kwatela komesho omutenya noluudi loshilemo, opo li va wilike molweendo lavo, noufiku okwe va wilika noluudi lomundilo, opo li va pe ouyelele, va dule okweenda omutenya noufiku. 22 Oluudi loshilemo kala li hali di po puvo omutenya, noluudi lomundilo kala li hali di po puvo oufiku.