Exodus
32 Mokweendela ko kwefimbo, ovanhu ova li ve wete Moses ta anye okudja ko komhunda. Onghee ova li va ongalela Aron, ndele tava ti kuye: “Fikama, tu ningila kalunga e tu kwatele komesho, molwaashi katu shi shii kutya oshike sha ningilwa Moses, omulumenhu oo e tu kufa mo medu laEgipiti.” 2 Opo nee Aron okwa tya kuvo: “Kufei mo outenda voshingoli ovo ve li momatwi ovakulukadi veni, ovanamati veni novanakadona veni, ndele tamu va eta kwaame.” 3 Opo nee ovanhu aveshe ova hovela okukufa mo outenda voshingoli ovo va li momatwi avo, ndele tave va pe Aron. 4 Opo nee okwa kufa oshingoli kuvo, ndele te shi hongo noshihongifo nokwa ninga oshikalunga* shonhana. Ovanhu ova hovela okutya: “Israel, ou oye Kalunga koye, ou e ku kufa mo medu laEgipiti.”
5 Eshi Aron e shi mona, okwa tunga oaltari komesho yasho. Opo nee Aron okwa ingida ta ti: “Mongula oku na oshivilo shaJehova.” 6 Onghee ova penduka ongula inene yefiku la shikula ko nova hovela okuyamba omaxwikiloyambo, nokuyandja omayambo oukumwe. Konima yaasho, ovanhu ova kala omutumba va lye nokunwa. Opo nee ova fikama ve lihafife.
7 Jehova okwa tya kuMoses: “Inda, londoloka, molwaashi oshiwana shoye, osho wa kufa medu laEgipiti, oshe linyona. 8 Ova dja mo diva mondjila oyo nde va lombwela va ye nayo. Ove liningila oshikalunga* shonhana, nova kala tave shi linyongamene noku shi yambela tava ti, ‘Israel, ou oye Kalunga koye, ou e ku kufa mo medu laEgipiti.’” 9 Jehova okwa lombwela vali Moses, a ti: “Onda mona kutya ovanhu ovo ovatangalali.* 10 Onda handuka neenghono nohandi ke va hanauna po, naave ohandi ke ku ninga oshiwana shinene ponhele yavo.”
11 Opo nee Moses okwa indila* kuJehova, Kalunga kaye, a ti: “Jehova, omolwashike u na okuhandukila neenghono oshiwana shoye, konima eshi we shi kufa medu laEgipiti neenghono doye dinene nosho yo neke loye li na eenghono? 12 Omolwashike Ovaegipiti tava ti, ‘Kalunga okwa li e na omalinyengotomheno mai, eshi e va kufa mo, a li a hala oku va dipaela komhunda noku va xulifa ko kombada yedu’? Lialuluka kehandu loye linene nokutalulula* etokolo loye lokweetela ovanhu voye oupyakadi. 13 Dimbuluka ovapiya voye Abraham, Isak naIsrael ovo wa ningila eano medina loye wa ti: ‘Ohandi ka hapupalifa oludalo leni ngaashi eenyofi odo di li keulu, nohandi ka yandja edu alishe e li, olo nda udanekela oludalo leni, opo li ninge lavo li li emona laalushe.’”
14 Onghee Jehova okwa hovela okutalulula* etokolo, olo a li a ninga, lokweetela oshiwana shaye oupyakadi.
15 Opo nee Moses okwa piluka, ndele ta londoloka ko komhunda e na oipelende yOumbangi ivali momake aye. Oipelende oyo oya li ya shangwa keembinga adishe, ya shangwa komesho nokonima. 16 Kalunga oye mwene a li a longa oipelende oyo, ndele ta shange ko eendjovo daye. 17 Eshi Josua a uda omaweelelo ovanhu, molwaashi ova li tava ingida, okwa tya kuMoses: “Monhanda omu na omaweelelo olwoodi.” 18 Ashike Moses okwa tya:
“Kae fi omawi eimbilo lefindano,*
Nokae fi omaweelelo ovanhu va findwa;
Ondi udite omawi ovanhu tava imbi shimwe shi lili.”
19 Diva eshi Moses a ehena popepi nonhanda nokwa mona onhana novanhu tava dana, okwa li a handuka neenghono, ndele ta ekele pedu oipelende oyo ya li momake aye nokwe i tatulila pefina lomhunda. 20 Okwa kufa onhana oyo va ninga, ndele te i xwike po momundilo nokwe i nyanyaula, fiyo ya ninga ombudu, ndele te i pilulile momeva nokulombwela Ovaisrael ve a nwe po. 21 Moses okwa tya kuAron: “Ovanhu ava ove ku ninga shike, eshi we va nyonifa enyono la kwata moiti?” 22 Aron okwa nyamukula a ti: “Ino handuka omwene wange, ou shi shii filufilu kutya ovanhu ove hole okulonga owii. 23 Onghee ova tya kwaame, ‘Tu ningila kalunga e tu kwatele komesho, molwaashi katu shi shii kutya oshike sha ningilwa Moses, omulumenhu oo e tu kufa mo medu laEgipiti.’ 24 Onghee onda tya kuvo, ‘Keshe oo e na oshingoli ne shi kufe mo, ndele te shi pe nge.’ Opo nee onde i umbila momundilo nomwa dja onhana ei.”
25 Moses okwa li a mona kutya ovanhu ove li moukakombolilifa, molwaashi Aron okwa li e va efela moukakombolilifa, osheshi osho va li tava ningi osha li she va dinififa kovatondi vavo. 26 Opo nee Moses okwa fikama poshivelo shonhanda, ndele ta ti: “Olyelye a ama kombinga yaJehova? Ileni kwaame!” NOvalevi aveshe ove mu ongalela. 27 Opo nee okwa tya kuvo: “Jehova, Kalunga kaIsrael, okwa tya, ‘Keshe umwe womunye na homate eongamukonda laye, ndele ta ende monhanda aishe, okudja koshivelo shimwe fiyo okoshivelo shikwao, ta dipaa omumwaina, omushiinda shaye nakaume kaye kopofingo.’” 28 Ovalevi ova ninga osho Moses a popya. Novanhu 3 000 lwaapo ova dipawa mefiku olo. 29 Opo nee Moses okwa tya: “Liyapulileni* Jehova nena, molwaashi keshe umwe womunye okwa lwifa omona waye nomumwaina waye; ote ke mu nangeka noupuna nena.”
30 Mefiku la landula ko, Moses okwa tya koshiwana: “Omwa nyona enyono la kwata moiti, ndele paife ohandi i kuJehova ndi tale ngeenge ohandi dulu okuninga po sha, opo a dime po enyono leni.” 31 Moses okwa shuna kuJehova, ndele ta ti: “Oshiwana eshi osha nyona enyono la kwata moiti. Oshe liningila oshikalunga shoshingoli. 32 Ashike paife dima po enyono lavo, ngeenge owe shi hala, ndele ngeenge hasho, alikana, dime nge mo membo loye olo wa shanga.” 33 Onghee Jehova okwa tya kuMoses: “Keshe ou ta nyono kwaame, ohandi mu dimi mo membo lange. 34 Inda paife, ndele to twala ovanhu konhele oyo nde ku lombwela. Tala, omweengeli wange ote ku tetekele komesho, nomefiku olo handi ka tokola, ohandi ke va handukila omolwenyono lavo.” 35 Opo nee Jehova okwa hovela okuhandukila ovanhu, molwaashi ova ninga onhana, oyo Aron a ninga.