Job
24 “Omolwashike Omunaenghono adishe ina tula po efimbo?
Omolwashike ovo have mu longele vehe shii efiku laye?*
2 Ovanhu ohava lundulula eengaba;
Ohava shingile moulifilo wavo eedi noikombo.
3 Ohava shingi po eendongi dounona, ovo vehe na ooxe,
Nohava kwata ko eengobe deemhedi dovafiyekadi, di li eshilipaleko lokushunifa omukuli.*
4 Ohava fininike eehepele di dje mo mondjila;
Ovo vehe na ekwafo lasha kombada yedu ohave va hondama.
5 Eehepele ohadi nyange oikulya momaluhaela, ngaashi eendongi domoixwa;
Ohadi kongele ovana vado oikulya mombuwa.
6 Odi na okuteya momapya avamwe,*
Nokupupudulula moikokola yomandjebele yovakolokoshi.
7 Oufiku aushe ohadi kala hamunghele, dihe na oikutu;
Kadi na sha shokulituvikila omolwoutalala.
8 Ohadi tutikwa kodula yokeemhunda;
Ohadi londo komamanya, molwaashi kadi na apa tadi kala.
9 Okaana, oko kehe na xe, ohaka kufwa ko komavele;
Noikutu yohepele ohai kufwa ko, i li eshilipaleko lokushunifa omukuli,
10 Nohashi di fininike di endaende di li hamunghele, dihe na oikutu,
Noda humbata oipandi yoihati da fya ondjala.
11 Ohadi lilolola metokopya lomutenya pokati komakuma omoshikunino;*
Ohadi kolo omaviinyu, ashike ohadi kala da fya enota.
12 Ovo ve li pokufya ohava kala tava keme moshilando;
Naavo va ehamekwa unene* ohava kongo ekwafo,
Ashike Kalunga ke na ko nasha nasho.*
13 Ope na ovo ve li omhinge nouyelele;
Ihava didilike eendjila dao,
Noihava shikula omalila ao.
14 Omudipai oha i, eshi eluwa tali tende;
Oha dipaa oo ehe na ekwafo lasha nosho yo ohepele,
Ofimbo oufiku ha ka vaka.
15 Omuhaeli oha teelele, eshi taku wiwile,
Oha ti, ‘Kape na ou ta mono nge!’
Noha uvike oshipala shaye.
16 Ohave liteyele* momaumbo momilaulu;
Ohave liidilile mo omutenya.
Kave shii ouyelele.
17 Osheshi kuvo efimbo longula ola faafana nomilaulu fokofoko;
Ove shii omatilifo omilaulu fokofoko.
18 Ashike ohava kungululwa po diva komeva.*
Oshitukulwa shavo shedu otashi fingwa.
Itava shuna ko vali koikokola yavo yomandjebele.
19 Ngaashi ashike oshikukuta nosho yo oupyu hau hengumukifa olumi,*
Ombila* ohai kufa po ovo va nyona.
20 Ina* ote ke mu dimbwa; omainyo otae ke mu papatela.
Ita ka dimbulukiwa vali.
Nokuhenouyuki otaku ka hanaunwa po ngaashi omuti.
21 Oha tane omukainhu ongadji,
Noha ungaunga nai nomufiyekadi.
22 Kalunga* ota ka longifa eenghono daye a xulife po ovanaenghono;
Nonande nava nghonopale, kave shii ngeenge otava kala nomwenyo.
23 Kalunga* ohe va efa va kale ve na elineekelo nova amenwa,
Ashike omesho aye okwa tala kwaashishe osho tava ningi.*
24 Ohava tumbalekwa oule wokafimbo kanini, nokudja opo ihava kala po vali.
Ohava ninipikwa, nohava pakwa ngaashi ashike omunhu keshe;
Ohava tetwa po ngaashi omitwe doilya.
25 Paife olyelye ta dulu okuulika kutya ame omunaipupulu,
Ile okupataneka eendjovo dange?”