Esra
3 Eshi omwedi omutiheyali wa fika, Ovaisrael* ova li moilando yavo nova li va ongala pamwe nelalakano limwe muJerusalem. 2 Jesua, omonamati waJosadak, pamwe novapristeri vakwao naSerubbabel, omonamati waSalatiel, novamwainamati, ova fikama, ndele tava tungu oaltari yaKalunga kaIsrael, opo va dule okuyambela ko omaxwikiloyambo, ngaashi sha shangwa mOmhango yaMoses, omupiya waKalunga kashili.
3 Ova tunga oaltari ponhele opo ya li nale, nonande ova li va tila ovanhu vomoilongo oyo ye va dingilila, nova hovela okuyambela Jehova omaxwikiloyambo kuyo, omaxwikiloyambo ongula nookonguloshi. 4 Opo nee ova dana Oshivilo shOmatwali* metwokumwe naasho sha shangwa, nova yamba omaxwikiloyambo efiku nefiku pamuvalu wokondadalunde, oo wa li tau pulwa efiku keshe. 5 Konima yaasho, ova yamba omaxwikiloyambo, oo haa yambwa pandjikilile, omaxwikiloyambo eemwedi dipe, naaeshe oo a yapulilwa oivilo iyapuki yaJehova nosho yo oo a dja kukeshe umwe, oo a yambela Jehova omayambo ehalo liwa. 6 Okudja kefiku lotete lomwedi omutiheyali, ova hovela okuyambela Jehova omaxwikiloyambo, nonande ekanghameno lotembeli yaJehova kala li la dikwa natango.
7 Ova yandja oimaliwa kovahongi vomamanya nokovahambwidi, nova yandja oikulya noikunwa nosho yo omaadi kOvasidon nokOvatirus, eshi ve va etela omiti domisederi dokutungifa muJoppa, okudilila mefuta laLibanon, she likolelela kelombwelo olo va pewa kohamba Kores yaPersia.
8 Momudo omutivali, eshi ve uya kotembeli yaKalunga kashili muJerusalem, momwedi omutivali, Serubbabel, omonamati waSalatiel, Jesua, omonamati waJosadak, pamwe novamwainamati aveshe, ovapristeri nOvalevi, naaveshe ovo ve uya kuJerusalem, va dja moukwatwa, ova hovela oilonga. Ova nangeka po Ovalevi okudja pomido 20 okuyuka pombada, va pashukile oilonga yotembeli yaJehova. 9 Opo nee Jesua, ovanamati vaye novamwainamati, naKadmiel novanamati vaye, ovanamati vaJuda, ove limanga kumwe, opo va pashukile ovo tava longo oilonga motembeli yaKalunga kashili pamwe novanamati vaHenadad, ovanamati vavo novamwainamati vavo, Ovalevi.
10 Eshi ovatungi va dika ekanghameno lotembeli yaJehova, ovapristeri va djala oikutu yavo yomotembeli, ve kwete omanghuma, pamwe nOvalevi, ovanamati vaAsaf, ve kwete omayaxa, ova fikama va hambelele Jehova palombwelo olo va pewa kohamba David yaIsrael. 11 Ovanhu ova hovela okwiimba tava tange nokupandula Jehova, tava itavele tava ti, “osheshi ye omuwa, nohole yaye i na oudiinini, oyo a ulikila Ovaisrael, otai kala po fiyo alushe.” Opo nee ovanhu aveshe ova ingida pombada tava hambelele Jehova, osheshi ekanghameno lotembeli yaJehova ola dikwa. 12 Ovapristeri vahapu, Ovalevi nomitwe domaukwaneumbo omapata, ovalumenhu ovakulunhu, ovo va monene otembeli oyo ya li po nale, ova lila mokule, eshi va mona ekanghameno lotembeli olo la dikwa, ofimbo vakwao vahapu va ingida nehafo pombada. 13 Onghee ovanhu inava dula okutongola, ngeenge ondaka oyehafo, ile oyovanhu tava lili, osheshi ovanhu ova li tava ingida unene mokule, fiyo osheshi eendaka davo da udika kokulekule.