Johannes omutitatu
1 Ame omunamido,* ohandi shangele omumwatate omuholike Gaius oo ndi hole unene.
2 Omumwatate omuholike, ohandi ku ilikanene opo u kale u na oukolele muwa, noinima aishe i kale tai ku endele nawa monghalamwenyo yoye. 3 Onda li nda hafa neenghono eshi ovamwatate va li ve uya nova lombwela nge kutya owa diinina oshili, noto twikile oku i diinina. 4 Osha hafifa nge* neenghono eshi nda uda kutya ovana vange ova diinina oshili.
5 Omumwatate omuholike, osho wa ningila ovamwatate, nokuli naavo uhe shii, osha ulika kutya ou li omudiinini. 6 Ova hepaululila eongalo kombinga yohole yoye. Onghee eshi to va lekele, va kwafela* monghedi oyo tai hafifa Kalunga. 7 Osheshi ove uyile okuudifa omolwedina laKalunga, nokava li va teelela okupewa sha kovanhu vomoiwana. 8 Onghee hano, otu na oku va yakula, opo tu kale ovalongi pamwe navo mokuudifa kombinga yoshili.
9 Onda shangela eongalo onhumwafo, ndele Diotrefes, oo e liholele komesho mokati kavo, ine tu fimaneka noina tambula ko osho twa popya. 10 Nomolwaasho ngeenge onde uya, ohandi ka nyaneka pomutenya oilonga yaye eshi te tu popile mowii. Kakele kaasho, ka li ha tambula ko nefimaneko ovamwatate, nokwa li yo ha kendabala okukelela nokukonda mo meongalo ovo va hala oku va tambula ko.
11 Omumwatate omuholike, ino hopaenena ovo tava longo owii, ndele hopaenena ovo tava longo ouwa. Ovo tava longo ouwa ovaKalunga. Ndele ovo tava longo owii inava shiiva Kalunga. 12 Demetrius oha popilwa mouwa kovamwatate aveshe noha kala metwokumwe noshili. Nafye ohatu hepaulula kombinga yaye, nou shi shii kutya ehepaululo letu oloshili.
13 Ondi na oinima ihapu oku ku lombwela, ashike inandi hala oku i shanga. 14 Ndele onda hala oku ku mona diva, opo tu popye okanya nokanya.
Ombili nai kale naave.
Ovamwatate otave ku kundile po. Kundila po yo ovamwatate pauhandimwe.