Omafimbo omativali
22 Ovakalimo vomuJerusalem ova ninga Ahasia, omonamati waye oo munini, ohamba ponhele yaye, molwaashi ongudu yovaponokeli, oyo ye uya pamwe nOvaaraba konhanda, oya dipaa ovakulu vaye aveshe. Onghee Ahasia, omonamati waJehoram, okwa hovela okupangela e li ohamba yaJuda. 2 Ahasia okwa li e na eedula 22, eshi a ninga ohamba, nokwa pangela muJerusalem omudo umwe. Ina oAtalia, omutekulu* waOmri.
3 Naye okwa enda yo meendjila, odo da endwa koukwaneumbo waAhab, molwaashi ina okwa li he mu pe omayele, oo e mu ningifa a katuke shihe li pandunge. 4 Okwa twikila okulonga osho shii momesho aJehova, ngaashi eumbo laAhab, molwaashi ova li va ninga ovayandjimayele vaye konima yefyo laxe, nove mu twalifa mehanauno. 5 Okwa shikula omayele avo nokwa ya pamwe naJehoram, omonamati waAhab, ohamba yaIsrael, va ka lwife Hasael, ohamba yaSiria, puRamot-gilead, opo ovaumbi vomauta va ehamekela Jehoram. 6 Jehoram okwa shuna kuJisreel, a ka veluke koipute oyo ve mu yashela puRama, eshi a li ta lwifa Hasael, ohamba yaSiria.
Ahasia,* omonamati waJehoram, ohamba yaJuda, okwa ya kuJisreel a ka talele po Jehoram, omonamati waAhab, molwaashi okwa li a ehamekwa.* 7 Ashike Kalunga okwa etifa ehanauno laAhasia, eshi a ka talela po Jehoram; eshi Ahasia a ya, okwa ya pamwe naJehoram, va ka shakeneke Jehu, omutekulu* waNimsi, oo Jehova a hoolola a hanaune po* eumbo laAhab. 8 Eshi Jehu a hovela okuhanauna po eumbo laAhab, okwa hanga mo omalenga aJuda novanamati vovamwaina vaAhasia, ovayakuli vaAhasia, ndele te va dipaa. 9 Opo nee Jehu okwa lombwela ovanhu va konge Ahasia. Ove mu kufa po opo a li a hondama muSamaria, ndele tave mu twala kuJehu. Ove mu dipaa, ndele tave mu pake, molwaashi ova ti: “Ye omutekulu waJosafat, oo a longela Jehova nomutima waye aushe.” Kapa li umwe womeumbo laAhasia a li e na eenghono dokupangela mouhamba.
10 Eshi Atalia, ina yaAhasia, a mona kutya omonamati waye okwa fya, okwa fikama, ndele ta dipaa aveshe ovo va li ve na okuninga eehamba* domepata laJuda. 11 Ashike Josabat, omonakadona wohamba, okwa kufa Joas, omonamati waAhasia, ndele te mu vake mo movanamati vohamba, ovo va li ve na okudipawa, ndele ye nomutekuli waye te va tula monduda yomeni yokunangala. Josabat, omonakadona wohamba Jehoram (okwa li omukulukadi womupristeri Jehoiada nomumwainakadona waAhasia), okwa pondola mokukala e mu holeka Atalia, onghee Atalia ine mu dipaa. 12 Joas okwa kala navo oule weedula hamano, a hondama meumbo laKalunga kashili, ofimbo Atalia a li ta pangele oshilongo.