Jeremia

36 Onghee modula onhine yaJehoiakim, omonamati waJosia, ohamba yaJuda, ondjovo ei oye uya kuJeremia ya dja kuJehova tai ti: 2 “Kufa omushangwatonywa* nokushanga mo eendjovo adishe, odo nde ku lombwela di li omhinge naIsrael, naJuda nosho yo oiwana aishe okudja kefiku lotete eshi nda popya naave pefimbo laJosia fiyo okunena eli. 3 Pamwe ovo vomeumbo laJuda ngeenge ova udu oudjuu aushe, oo nda hala oku va etela, otashi dulika va efe po eendjila davo dii, opo ndi va dimine po omanyono avo nomatimba avo.”

4 Opo nee Jeremia okwa ifana Baruk, omonamati waNeria, na Jeremia okwe mu lombwela eendjovo adishe odo Jehova e mu lombwela, na Baruk okwe di shanga momushangwatonywa.* 5 Opo nee Jeremia okwa lombwela Baruk ta ti: “Ame onda mangwa noitandi dulu okuya meumbo laJehova. 6 Onghee oove u na okuya mo nokulesha mokule eendjovo daJehova okudja momushangwatonywa oo wa shanga palombwelo lange. Di lesha ovanhu ve udite ko keumbo laJehova mefiku lelidiliko; ou na oku di leshela ovanhu aveshe vomuJuda ovo ve uya mo okudja koilando yavo. 7 Pamwe okwiindila kwavo va filwe onghenda taku fiki kuJehova, nakeshe umwe womuvo ota ka efa po eendjila daye dii, osheshi Jehova okwa tokola okuhololela ovanhu ava ehandu nosho yo onya inene.”

8 Onghee Baruk, omonamati waNeria, okwa ninga ashishe osho a lombwelwa komuprofeti Jeremia; okwa lesha mokule momushangwatonywa* eendjovo daJehova meumbo laJehova.

9 Onghee modula onhinhano yaJehoiakim, omonamati waJosia, ohamba yaJuda, momwedi omutimuwoi, ovanhu aveshe vomuJerusalem novanhu aveshe ovo ve uya kuJerusalem, va dja moilando yaJuda, ova tokola okulidilika koshipala shaJehova. 10 Opo nee Baruk okwa lesha mokule momushangwatonywa* eendjovo daJeremia meumbo laJehova monduda* yaGemaria, omonamati waSafan, omushangululi,* momukala wopombada, poshivelo shipe sheumbo laJehova, ovanhu aveshe ve udite ko.

11 Eshi Mikaia, omonamati waGemaria, omonamati waSafan, a uda eendjovo adishe daJehova okudja momushangwatonywa* 12 okwa ya keumbo* lohamba monduda yahamushanga. Omalenga* aeshe okwa li omutumba omo: hamushanga Elisama, Delaia, omonamati waShemaia, Elnatan, omonamati waAkbor, Gemaria, omonamati waSafan, Sedekia, omonamati waHanania, nomalenga aeshe makwao. 13 Mikaia okwe va lombwela eendjovo adishe, odo a uda, eshi Baruk a li ta lesha momushangwatonywa* moipafi yovanhu.

14 Opo nee omalenga aeshe okwa tuma Jehudi, omonamati waNetania, omonamati waSelemia, omonamati waKus, kuBaruk a ti: “Ila, ndele etelela omushangwatonywa omo wa lesha moipafi yovanhu.” Baruk, omonamati waNeria, okwa kufa omushangwatonywa meke laye nokwa ya mo kuvo. 15 Ova tya kuye: “Alikana, kala omutumba, ndele to tu leshele mokule.” Onghee Baruk okwe va leshela mo.

16 Diva ashike eshi va uda eendjovo adishe, ova talafana va tila, nova tya kuBaruk: “Otu na okulombwela filufilu ohamba eendjovo adishe edi.” 17 Nova pula Baruk va ti: “Alikana, tu lombwela nghee wa shanga eendjovo adishe edi. Mbela opalombwelo laye?” 18 Baruk okwe va nyamukula a ti: “Okwa lombwela nge eendjovo adishe edi, nonde di shanga nohinga momushangwatonywa* ou.” 19 Omalenga okwa lombwela Baruk a ti: “Indeni, ndele tamu ka hondama, ove naJeremia, noinamu efa nande oumwe a shiive apa mu li.”

20 Opo nee okwa ya mo kohamba momukala nokwa twala omushangwatonywa monduda yahamushaga Elisama, nokwa lombwela ohamba oinima aishe oyo a uda.

21 Onghee ohamba oya tuma Jehudi a ka tale omushangwatonywa nokwe u eta okudja monduda yahamushanga Elisama. Jehudi okwa hovela oku u lesha momatwi ohamba noomalenga aeshe, oo a li a fikama pohamba. 22 Ohamba oya li i li omutumba meumbo lopokufu momwedi omutimuwoi,* nomundilo owa li wa tema mefiya komesho yayo. 23 Shimha Jehudi a lesha ko omapandja atatu, ile anhe, ohamba ohai tete ko oshitukulwa osho nombele yahamushanga noku shi xwela momundilo, oo wa li wa tema mefiya, fiyo osheshi omushangwatonywa aushe wa tulwa momundilo oo wa li mefiya. 24 Nokava li va kwatwa koumbada; kutya nee ohamba, ile ovapiya vayo aveshe, ovo va uda eendjovo adishe edi, inava pombaula oikutu yavo. 25 Nonande Elnatan, Delaia naGemaria ova indila ohamba iha xwike po omushangwatonywa, inai pwilikina kuvo. 26 Natango, ohamba oya lombwela Jerahmeel, omonamati wohamba, Seraja, omonamati waAsriel, naSelemia, omonamati waAbdel, va ka kwate hamushanga Baruk nosho yo omuprofeti Jeremia, ashike Jehova okwa kala e va holeka.

27 Nondjovo yaJehova oye uya vali kuJeremia, konima eshi ohamba ya xwika po omushangwatonywa, oo wa li u na eendjovo odo da shangwa kuBaruk palombwelo laJeremia tai ti: 28 “Kufa vali omushangwatonywa umwe, nokushanga mo eendjovo adishe da faafana naado da li momushangwatonywa wotete, oo wa xwikwa po kohamba yaJuda, Jehoiakim. 29 Nou na okupopya u li omhinge nohamba yaJuda, Jehoiakim, to ti, ‘Eshi osho Jehova ta ti: “Ove owa xwika po omushangwatonywa nowa ti, ‘Omolwashike wa shangela mo kutya: “Ohamba yaBabilon otai ke uya shili nokuhanauna po oshilongo eshi nokuyeleka mo ovanhu noinamwenyo”?’ 30 Onghee hano, eshi osho Jehova ta ti shi na sha nohamba yaJuda, Jehoiakim: ‘Itai ka kala i na oo ta ka kala omutumba kolukalwapangelo laDavid, noshimhu shayo otashi ka efiwa shi pye omutenya efimbo lomutenya nokufya outalala oufiku. 31 Ye, oludalo laye novapiya vaye ohandi ke va handukila omolwenyono lavo, vo novakalimo vomuJerusalem novanhu vomuJuda, ohandi ke va etela oudjuu aushe oo nda popya shi na sha navo, ashike inava pwilikina.’”’”

32 Opo nee Jeremia okwa kufa vali omushangwatonywa umwe, nokwe u yandja kuBaruk, omonamati waNeria, nopalombwelo laJeremia okwa shanga mo eendjovo adishe domomushangwatonywa,* oo wa xwikwa po kohamba yaJuda, Jehoiakim. Neendjovo dihapu da fa odo oda wedwa mo.