Jeremia
38 Paife Sefatia, omonamati waMattan, Gedalia, omonamati waPashur, Jukal, omonamati waSelemia, naPashur, omonamati waMalkia, ova uda eendjovo odo Jeremia a lombwela ovanhu aveshe a ti: 2 “Eshi osho Jehova ta ti: ‘Oo ta kala moshilando eshi ota ka fya keongamukonda, kondjala nokoudu* wolutapo. Ashike oo te liyandje* kOvakaldea ota ka xupa nomwenyo nota ka kala nomwenyo waye onga oshixuulwa* nota kala nomwenyo.’ 3 Eshi osho Jehova ta ti, ‘Oshilando eshi otashi ka yandjwa shili meke letangakwaita lohamba yaBabilon, notai ke shi kwata ko.’”
4 Omalenga okwa tya kohamba: “Alikana, dipaifa omulumenhu ou, osheshi kungaha, ota shololifa ovakwaita va kale vehe na ondjungu,* ava va fyaala moshilando eshi nosho yo yovanhu aveshe, eshi te va lombwele eendjovo odo. Osheshi omulumenhu ou ina halela ovanhu ombili, ndele oupyakadi ashike.” 5 Ohamba Sedekia oya nyamukula ya ti: “Taleni, ye oku li momake eni, osheshi ohamba itai dulu okuninga po sha i mu kelele.”
6 Onghee ova kwata Jeremia, ndele tave mu kupula mondungu yaMalkia, omonamati wohamba, oyo ya li momukala wovanangeli. Ova kulukifila mo Jeremia neengodi. Mondungu kamwa li omeva, omwa li ashike onhata, na Jeremia okwa hovela okuningina monhata.
7 Ebed-melek, Omuetiopia, elenga* lomeumbo* lohamba, okwa uda kutya ova tula Jeremia mondungu. Ohamba oya li i li omutumba poshivelo shaBenjamin, 8 onghee Ebed-melek okwa ya keumbo* lohamba, ndele ta popi nohamba ta ti: 9 “Omwene wange ohamba, eshi ovalumenhu ava va ningila omuprofeti Jeremia oshii! Ove mu kupula mondungu, nota file mo kondjala, osheshi moshilando inamu fyaala omungome.”
10 Opo nee ohamba oya lombwela Ebed-melek, Omuetiopia, tai ti: “Kufa ovalumenhu 30 apa, ndele tamu nane mo omuprofeti Jeremia mondungu, ofimbo ina fya.” 11 Onghee Ebed-melek okwa kufa ovalumenhu nokwa ya pamwe navo meumbo* lohamba konhele i li koshi yeemhungulilo, nova kufa ko oilapi noituta ya nyanyauka, ndele tave i kulukifile neengodi kuJeremia mondungu. 12 Opo nee Ebed-melek, Omuetiopia, okwa tya kuJeremia: “Alikana, tula oituta noilapi meenghwapa doye nosho yo eengodi.” Jeremia osho a ninga, 13 nova shila mo Jeremia neengodi noku mu nana mo mondungu. Na Jeremia okwa kala mOmukala wOvanangeli.
14 Ohamba Sedekia oya tuma omuprofeti Jeremia e uye kuyo poshivelo oshititatu, osho shi li meumbo laJehova, nohamba oya tya kuJeremia: “Onda hala oku ku pula sha. Ino holeka nge sha.” 15 Opo nee Jeremia okwa tya kuSedekia: “Ngeenge onde ku lombwele, oto dipaa nge shili. Nongeenge onde ku pe omayele, ito ka pwilikina nge.” 16 Onghee ohamba Sedekia oya anena Jeremia meholeko tai ti: “Oshili, ofimbo Jehova e na omwenyo, ou e tu pa omwenyo ou,* itandi ku dipaa, noitandi ke ku yandja kovalumenhu ovo tava kongo omwenyo woye.”
17 Opo nee Jeremia okwa tya kuSedekia: “Eshi osho Jehova, Kalunga komatangakwaita, Kalunga kaIsrael, ta ti: ‘Ngeenge owe liyandje* komalenga ohamba yaBabilon, omwenyo woye otau ka xupifwa,* noshilando eshi itashi ka xwikwa po nomundilo, naave nosho yo ovaneumbo loye otamu ka xupifwa. 18 Ndele ngeenge ito liyandje* komalenga ohamba yaBabilon, oshilando eshi otashi ka yandjwa kOvakaldea, notave ke shi xwika po nomundilo, naave ito ka dja mo meke lavo.’”
19 Opo nee ohamba Sedekia oya tya kuJeremia: “Ame onda tila Ovajuda ovo va ya kOvakaldea, osheshi ngeenge onda yandjwa kuvo, otashi dulika va ungaunge naame nonyanya.” 20 Ashike Jeremia okwa ti: “Ove ito ka yandjwa kuvo. Alikana, dulika kondaka yaJehova mwaashi handi ku lombwele, notashi ke ku endela nawa, naave* oto ka twikila okukala nomwenyo. 21 Ndele ngeenge owa anye okuliyandja,* eshi osho Jehova a hololela nge: 22 Tala! Ovakainhu aveshe ovo va fyaala meumbo* lohamba yaJuda, otava twalwa komalenga ohamba yaBabilon, notava ti,
‘Ovalumenhu, ovo wa li we lineekela,* ove ku kengelela nove ku finda.
Ova ningifa omhadi yoye i ningine monhata.
Paife ova ya onhapo.’
23 Novakulukadi voye aveshe nosho yo ovanamati voye otave va twala kOvakaldea, naave ito ka dja mo meke lavo, ashike oto ka kwatwa kohamba yaBabilon, nomolwoye oshilando eshi otashi ka xwikwa po nomundilo.”
24 Opo nee Sedekia okwa tya kuJeremia: “Oshinima eshi inashi shiivika nande okomunhu, opo uha fye. 25 Nongeenge omalenga okwa udu kutya onda popya naave, ndele tae uya kwoove, nokutya kwoove, ‘Alikana, tu lombwela osho wa lombwela ohamba. Ino tu holeka sha nande, noitatu ke ku dipaa. Ohamba oye ku lombwela shike?’ 26 Ou na oku va nyamukula kutya, ‘Onda li ashike handi indile ohamba iha shunife nge keumbo laJehonatan oko ndi ka file.’”
27 Lwanima, omalenga aeshe okwe uya kuJeremia nokwe mu pula. Okwe a lombwela oinima aishe, oyo ohamba ye mu lombwela a popye. Onghee inaa popya sha vali naye, osheshi kapa li oo a uda eenghundafana davo. 28 Fiyo efiku olo Jerusalem sha kwatwa ko, Jeremia okwa kala mOmukala wOvanangeli; omo a li natango omo, eshi Jerusalem sha kwatwa ko.