Hesekiel

18 Nondjovo yaJehova oye uya vali kwaame tai ti: 2 “Eyeletumbulo ola hala okutya ngahelipi, olo hamu tofa medu laIsrael, tali ti, ‘Ooxe ova lya omandjebele malula, ashike omayoo ovanamati oo a kwatwa kouwe’?

3 “‘Oshili, ofimbo ame ndi na omwenyo,’ Omwene Omunamapangelo aeshe, Jehova, osho ta ti, ‘Itamu ka twikila okutofa omupopyo oo muIsrael. 4 Tala! Eemwenyo* adishe odange. Omwenyo waxe nosho yo omwenyo womona adishe odange. Omwenyo* ou tau nyono oo tau ka fya.

5 “‘Natu tye nee ngeno omunhu omuyuki noha longo osho sha yuka noshi li mondjila. 6 Iha li oinima oyo ya yambelwa oikalunga keemhunda; ihe lineekele oikalunga itondifa* yeumbo laIsrael; iha nyateke omukulukadi wamukwao, ile a nangale nomukainhu, oo e li komafimbo; 7 iha ungaunga nande naumwe nai, ashike oha shunifa osho omuyandji weengunga e mu pa shi li omukuli; iha nyeke nande oumwe, ashike oha yandje oikulya yaye mwene kwaao a fya ondjala, noha uvike noshikutu oo e li hamunghele; 8 iha pula oishoshela, ile a londeke ondado shihe li pauyuki, ashike ohe likelele okukatuka shihe li pauyuki; oha tokola pauyuki pokati komunhu nomunhu; 9 noha twikile okweenda meenghedimhango dange nokudiinina omatokolo ange, opo a ende moudiinini. Omunhu a tya ngaho omuyuki, nota ka kala shili nomwenyo,’ Omwene Omunamapangelo aeshe, Jehova, osho ta ti.

10 “‘Ashike natu tye nee ngeno okwa dala omonamati, oo e li omunyeki, ile omudipai,* ile ha ningi oinima imwe yomwaai, 11 (nonande xe ina ninga imwe yomoinima ei,) ha li oinima oyo ya yambelwa oikalunga keemhunda, ha nyateke omukulukadi wamukwao, 12 ha ungaunga nai naao e li momhumbwe nosho yo nohepele, ha kufa oinima ta nyeke, iha shunifa omukuli, he lineekele oikalunga itondifa, ha kufa ombinga moilonga itondifa, 13 ha londeke ondado shihe li pauyuki, nokupula oishoshela. Onghee omonamati oo ita ka kala nomwenyo. Omolwoinima aishe oyo itondifa a ninga, ota ka dipawa shili. Ohonde yaye otai ka kala kombada yaye.

14 “‘Ashike natu tye nee ngeno xe oku na omonamati, oo a mona omanyono aeshe oo xe a ninga, ndele nonande okwe a mona, ina ninga oinima ya tya ngaho. 15 Iha li oinima oyo ya yambelwa oikalunga keemhunda; ihe lineekele oikalunga itondifa yeumbo laIsrael; iha nyateke omukulukadi wamukwao; 16 iha ungaunga nande naumwe nai; iha kufa ko sha osho sha li sha yandjwa omukuli; iha kufa sha ta nyeke; oha yandje oikulya yaye mwene kwaao a fya ondjala noha uvike noshikutu oo e li hamunghele; 17 ohe likelele, opo aha fininike ohepele; iha londeke ondado shihe li pauyuki, ile a pule oishoshela; noha wanifa po omatokolo ange nokweenda meenghedimhango dange. Omunhu a tya ngaho, ita ka fya omolwepuko laxe. Ota ka kala shili nomwenyo. 18 Ashike molwaashi xe okwa longa oukengeleledi, a nyeka omumwainamati, nokuninga osho sha puka mokati koshiwana shavo, ota ka fya omolwepuko laye.

19 “‘Ashike otamu ka tya: “Omolwashike omonamati ita kala e na ondjo omolwepuko laxe?” Shaashi omonamati okwa ninga osho shi li mondjila nosha yuka, a diinina eenghedimhango dange adishe nokudulika kudo, ota ka kala shili nomwenyo. 20 Omwenyo* oo tau nyono otau ka fya. Omonamati ita ka kala e na ondjo omolwepuko laxe, na xe ita ka kala e na ondjo omolwepuko lomonamati. Omuyuki ota ka valulilwa ouyuki waye aeke, nomukolokoshi ota ka valulilwa oukolokoshi waye aeke.

21 “‘Ngeenge omukolokoshi okwa efa po omanyono aye aeshe oo a nyona, ndele ta diinine eenghedimhango dange, nokuninga osho shi li mondjila naasho sha yuka, ota ka kala shili nomwenyo. Ita ka fya. 22 Kape na nande olimwe lomatauluko oo a ninga tali ke mu tokolifa.* Ota ka twikila okukala nomwenyo, molwaashi okwa longa osho sha yuka.’

23 “‘Mbela ohandi hafele ngoo efyo lomukolokoshi?’ Omwene Omunamapangelo aeshe, Jehova, osho ta ti. ‘Mbela ihandi kala nda hala a efe po eendjila daye, noku kale nomwenyo?’

24 “‘Ashike ngeenge omuyuki okwa efa po ouyuki waye nokulonga osho sha puka,* ta ningi oinima aishe itondifa, oyo omukolokoshi ta ningi, ota ka kala tuu nomwenyo? Kape na oilonga youyuki, oyo a ninga, tai ka dimbulukiwa. Omolwokuhenouyuki kwaye nosho yo enyono olo a nyona, ota ka fya.

25 “‘Ndele otamu ka tya: “Ondjila yaJehova kai li pauyuki.” Nye eumbo laIsrael, alikana, pwilikineni! Mbela ondjila yange oyo ihe li pauyuki? Mbela eendjila deni hado dihe li pauyuki?

26 “‘Ngeenge omuyuki okwa efa po ouyuki waye nokulonga osho sha puka, ndele ta fi omolwasho, ota ka fya omolwepuko laye mwene.

27 “‘Nongeenge omukolokoshi okwa efa po oukolokoshi oo a ninga, ndele ta hovele okuninga osho shi li mondjila naasho sha yuka, ota ka xupifa onghalamwenyo* yaye mwene. 28 Ngeenge okwe shi didilike nokweefa po omanyono aye aeshe oo a nyona, ota ka kala shili nomwenyo. Ita ka fya.

29 “‘Ndele eumbo laIsrael otali ka tya: “Ondjila yaJehova kai li pauyuki.” Nye eumbo laIsrael, mbela eendjila dange odo ngoo shili dihe li pauyuki? Mbela eendjila deni hado dihe li pauyuki?’

30 “‘Onghee hano, nye eumbo laIsrael, ohandi ka tokola keshe umwe womunye she likolelela keendjila daye,’ Omwene Omunamapangelo aeshe, Jehova, osho ta ti. ‘Efeni po, heeno, efeni po filufilu omatauluko eni aeshe, opo aha kale oshipundukifo, osho tashi mu etele etimba. 31 Efeni po omatauluko eni aeshe, oo mwa ninga, ndele tamu likongele* omutima mupe nomhepo ipe, osheshi omolwashike mu na okufya, nye eumbo laIsrael?’

32 “‘Ihandi hafele nandenande efyo lomunhu nande oumwe,’ Omwene Omunamapangelo aeshe, Jehova, osho ta ti. ‘Onghee lialulukeni nokukala nomwenyo.’”